ءانشى سوپرانو ايزادا كاپونوۆا تۋعان ساحناسىندا بىرقاتار قايتالانباس بەينەلەردى جاساپ قانا قويماي, سونداي-اق قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ «رۋحاني جاڭعىرۋ» باعدارلاماسى اياسىندا الەمنىڭ ەڭ مارتەبەلى ساحنالارىندا گاسترولدىك ساپارمەن بىرنەشە رەت ونەر كورسەتكەن. قازاقستاندىق مادەنيەت قايراتكەرلەرىنىڭ كوپتەگەن جەتىستىكتەرىنىڭ ارقاسىندا وتاندىق ونەر حالىقارالىق ارەنادا باعالانىپ, بەدەلگە يە بولۋدا.
- تۇڭعىش پرەزيدەنت قورى سىيلىعىنىڭ لاۋرەاتى اتانۋ – مەن ءۇشىن ۇلكەن مارتەبە ءارى قۋانىش. ارتىستەردىڭ ەرەن ەڭبەگى مەن شىعارماشىلىعىن باعالاعانى ءۇشىن ەلباسى قورىنا العىسىم شەكسىز. جاستار جىلى اياسىندا كوپتەگەن جاس ادامداردىڭ وسىناۋ سىيلىقتى العانى ەرەكشە ماڭىزدى دەپ ويلايمىن, سەبەبى ول بىزگە ءوسىپ-وركەندەپ, ودان ءارى دامۋىمىزعا مۇمكىندىك بەرەدى. وتانىمىزدى تانىستىرىپ, الەمنىڭ ۇزدىك ساحنالارىندا ونەر كورسەتۋ ءارى قازاقستاننىڭ دامۋىنا ءوز ۇلەسىمىزدى قوسا وتىرىپ, ەلباسىمىز نۇرسۇلتان ءابىش ۇلى نازارباەۆتىڭ وراسان زور جوسپارلارىن ىسكە اسىرۋ مۇمكىندىگىمىزدىڭ بارىن ماقتان تۇتامىز, - دەپ اتاپ ءوتتى ايزادا كاپونوۆا.
ەسكە سالار بولساق, ءانشى قازاق ۇلتتىق مۋزىكا اكادەمياسىن «ۆوكال ونەرى» ماماندىعى بويىنشا تامامداعان (پروفەسسور, قازاقستاننىڭ ەڭبەك سىڭىرگەن ءارتىسى ق.ن.ومارباەۆ سىنىبى, 2008). ونىڭ جەڭىستەرىنىڭ اراسىندا – «شابىت» حالىقارالىق شىعارماشىل جاستار بايقاۋ-فەستيۆالىنىڭ ءىى سىيلىعى (استانا, 2007); حالىقارالىق ۆوكاليستەر بايقاۋى (الماتى, 2013) مەن دج.روسسيني اتىنداعى XV حالىقارالىق بايقاۋدىڭ (پەزارو ق., يتاليا, 2018) ءى جۇلدەلەرى, ن.تىلەنديەۆ اتىنداعى حالىقارالىق بايقاۋ-فەستيۆالىنىڭ باس جۇلدەسى (استانا, 2015) بار. ۆوكاليستىڭ رەپەرتۋارىندا م.تولابەۆتىڭ ء«بىرجان – سارا», ە.برۋسيلوۆسكيدىڭ «قىز جىبەك», ا.جۇبانوۆ پەن ل.ءحاميديدىڭ «اباي», دج.ۆەرديدىڭ «تراۆياتا» جانە «ريگولەتتو», گ.دونيتسەتتيدىڭ «ليۋچيا دي لاممەرمۋر», ج.وففەنباحتىڭ «گوفمان ەرتەگىلەرى», ۆ.ا.موتسارتتىڭ «سيقىرلى فلەيتا» جانە ت.ب. وپەرا جاۋھارلارىنان باستى پارتيالار بار.
عىلىم, مادەنيەت جانە ونەر سالاسىنداعى سىيلىق 2008 جىلى تاعايىندالعانىن اتاپ وتكەن ءجون. قوردىڭ ەڭ قۇرمەتتى ماراپاتتارىنىڭ ءبىرى جاس قازاقستاندىق دارىن يەلەرىنە ولاردىڭ وزىندىك شىعارماشىلىق جوبالارى, عىلىمي زەرتتەۋلەرى ءۇشىن بەرىلەدى. سىيلىق لاۋرەاتتارىنىڭ قاتارىندا – «استانا وپەرا» جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى – ايگەرىم بەكەتاەۆا, سۇندەت بايعوجين, جۇپار عابدۋللينا, سالتانات احمەتوۆا, مەدەت چوتاباەۆ, مەيىر باينەش, تالعات مۇساباەۆ; تەاتر سوليستەرى – بيبىگۇل جانۇزاق (قازاقستاننىڭ ەڭبەك سىڭىرگەن قايراتكەرى), بولات ەسىمحانوۆ, تاتيانا ۆيتسينسكايا; وپەرا ترۋپپاسىنىڭ كونتسەرتمەيستەرى گاۋحار تاسبەرگەنوۆا جانە ت.ب. بار.
