اقتوبەدەگى ورتالىق سپورت كەشەنىندە وتكەن بىرىنشىلىككە اتىراۋ, اقتاۋ جانە اقتوبە وبلىستارىنىڭ اسكەريلەرى قاتىستى. بالۋاندارعا 80 كەلىگە دەيىن جانە 80 كەلىدەن جوعارى ەكى سالماق دارەجەسىندە باق سىناسۋعا تۋرا كەلدى. سايىس قورىتىندىسى بويىنشا, كەلىسىمشارت بويىنشا اسكەري قىزمەتشى مۇراتبەك اەكەشوۆ «اسكەر بارىسى» اتاعىنىڭ جەڭىمپازى اتاندى. ال جەڭىل سالماقتا, مەرزىمدى اسكەري قىزمەتتەگى سارباز, قاتارداعى جاۋىنگەر تۇرسىن بايزاق جەڭىمپاز اتاندى. ەكەۋى دە اقتوبەدەگى 30238 اسكەري ءبولىمىنىڭ جاۋىنگەرلەرى.
جالپى كوماندالىق ەسەپتە اقتوبە كومانداسى ءبىرىنشى ورىندى, اتىراۋ ەكىنشى, ال ءۇشىنشى ورىندى اقتاۋ كومانداسى جەڭىپ الدى. ىرىكتەۋ سايىسىنىڭ جەڭىمپازدارى اعىمداعى جىلعى ناۋرىزدىڭ 15-ءى مەن 17-ءى ارالىعىندا سەمەي قالاسىندا وتەتىن «اسكەر بارىسى» اتاعىن يە بولۋ قۇقىعىنا ارنالعان, قر قارۋلى كۇشتەرىنىڭ چەمپيوناتىنا قاتىسادى.
قازاقستان ارمياسىندا دەنە دايارلىعى مەن سپورت جاۋىنگەرلىك دايارلىقتىڭ نەگىزى بولىپ تابىلاتىنىن ايتا كەتۋ قاجەت. وفيتسەرلەر مەن كەلىسىمشارت بويىنشا اسكەري قىزمەتشىلەر ۇدايى نەگىزدە پرەزيدەنتتىك تەستىلەر, اي سايىن دەنە دايارلىعى بويىنشا نورماتيۆتەر تاپسىرادى. ال جىل سوڭىندا قورىتىندى تەكسەرىستە وزدەرىنىڭ كورسەتكىشتەرىن راستايدى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى
