وسى جىلدار ىشىندە قازاق ءتىلىن مەڭگەرۋ دەڭگەيى دە ءبىرشاما جەتىلگەن. بۇگىندە قازاق تىلىندە ءوز ويىن ەركىن جەتكىزۋگە تىرىسىپ جۇرگەن كامس اباي اقىننىڭ شىعارمالارىنا قۇشتار.
اباي مەن ونىڭ انا ءتىلىن ارداقتاپ, ونى مەڭگەرۋگە تالاپتانعان كامس كامۋابونىڭ اقتاۋ قالاسىندا حالىقارالىق انا ءتىلى كۇنىنە وراي ۇيىمداستىرىلعان ء«تىل – تۇعىرىمىز, سوعىپ تۇرعان جۇرەگىمىز» اتتى تىلدەر سايىسىندا باعى جاندى.
قازاقستان حالقى اسسامبلەياسى ماڭعىستاۋ وبلىستىق فيليالىنىڭ ۇيىمداستىرۋىمەن 15-25 جانە 25-40 جاستاعى شەت ءتىلدى ازاماتتار اراسىندا العاش رەت ءوتتى. ۇلتتار دوستاستىعىن ارتتىرىپ, قازاق ءتىلىن ۇيرەنۋگە ىنتالاندىرۋ ماقساتىنداعى سايىس ەكى كەزەڭنەن تۇردى. ءبىرىنشى كەزەڭدە قاتىسۋشىلار ءوز انا تىلىندە بەلگىلى قالامگەرلەردىڭ تۋىندىلارىن جاتقا ايتسا, ەكىنشى كەزەڭدە شىعارمانى قازاق تىلىندە جاتقا ايتۋى كەرەك ەدى.
كامس كامۋابو كورەرمەندەردى اباي قۇنانباەۆتىڭ «جەلسىز تۇندە جارىق-اي» ءانىن قازاق تىلىندە ناقىشىنا كەلىپ ورىنداۋىمەن قۋانتتى جانە سايىس قورىتىندىسىندا باس جۇلدەگە يە بولدى.
– مەن ءتىل بايقاۋىنا العاش رەت قاتىسقاندىقتان قوبالجىدىم. بىراق كورەرمەندەردىڭ دەمەۋى ماعان تۋىندىلاردى كوڭىلدەن شىعاتىنداي ەتىپ ورىنداۋعا مۇمكىندىك بەردى. مەن اباي قۇنانباەۆتىڭ شىعارمالارىن جاقسى كورەمىن. اقىننىڭ «جەلسىز تۇندە جارىق اي» انىمەن بىرگە, «كوزىمنىڭ قاراسى» ءانى دە ماعان قاتتى ۇنايدى, – دەيدى ول.
جەڭىمپازدىڭ ويىنشا بايقاۋ بارىسىندا شىعارمانىڭ مازمۇنىن ءتۇسىنىپ ورىنداۋ ماڭىزدى. ابايدىڭ تەرەڭ ويلارىن اعىلشىن تىلىندە ايتىپ بەرگەن ول ۇلى ويشىلدىڭ ەڭبەكتەرىن ۇنەمى وقۋعا تىرىساتىن كورىنەدى.
– قازاق ءتىلى – ەرەكشە ءتىل. سوندىقتان ۇيرەنۋدى ءالى جالعاستىرامىن. ءبىزدىڭ مەكتەبىمىزدە شەتەل ۇستازدارىنا قازاق ءتىلىن ۇيرەنۋ ساباعى بار. سول ساباققا تۇراقتى تۇردە قاتىسىپ قانا قويماي, «قازاق» راديوسىن, تەلەارنالارداعى قازاق ءتىلدى شوۋلاردى كورگەندى جاقسى كورەمىن, – دەپ ءسوزىن ساباقتادى كامس.
سايىستا قازاق ءتىلىن مەڭگەرۋ شەبەرلىگىمەن ءتانتى ەتكەن زياتكەرلىك مەكتەپتىڭ حيميا ءپانى مۇعالىمى ۆەنەرا سۋروۆتسەۆا ەكىنشى ورىنعا لايىق دەپ تانىلدى.
شەتەلدىك ۇستازداردىڭ قازاق ءتىلىن بىلۋگە قىزىعۋشىلىعى جانە قازاق ءتىلىن وتە باي ءتىل دەپ جوعارى باعالاۋى كوڭىل ءوسىردى. كەيبىر باۋىرلارىمىز قادىرىن بىلمەي جۇرگەن قازىنامىزدى جاتجۇرتتىقتار زور تۇتىپ جاتسا, ارينە زور قۋانىش.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
