وقۋ-جاتتىعۋلارى وتكەن جەر كەزدەيسوق تاڭدالعان جوق. سەبەبى اباي اۋدانى وبلىستاعى كوكتەمگى تاسقىن قاۋپى جوعارى اۋدانداردىڭ ءبىرى.
شارا بارىسىندا جەرگىلىكتى اكىمدىكتەردىڭ, اۋداندىق اپاتتىق-قۇتقارۋ قىزمەتتەرىنىڭ دايىندىعى تەكسەرىلدى. سونىمەن قاتار سۋ قويماسىنداعى گيدروتەحنيكالىق قۇرىلىستاردىڭ جاعدايىن باقىلاۋعا الىندى.
– وقۋ-جاتتىعۋلاردا قۇتقارۋشىلاردىڭ بارلىق ازاماتتىق قورعانىس قىزمەتتەرىمەن ءوزارا ارەكەت ەتۋى كەزىندەگى اۋىزبىرلىگى سىنالدى, – دەيدى قاراعاندى وبلىسى بويىنشا تجد باستىعى ىبراھىم كۇلشىمباەۆ.
تاسقىنعا قارسى وقۋ-جاتتىعۋلار بارىسىندا وزەن ارنالارىن, سۋ وتكىزۋ قۇبىرلارىن تازارتۋ, جاعالاۋدى بەكىتۋ جانە جارىلىس جاساۋ جۇمىستارىنا باسا كوڭىل ءبولىندى.
– سوڭعى مالىمەتتەرگە ساي, شەرۋباي-نۇرا بويىندا قازىرگى تاڭدا قار قورى ورتاشا نورمادان تومەن. ەگەر جاعداي تۋرالى جالپى ايتار بولساق, وزەننىڭ باستاۋىندا قار كوبىرەك, ول ايماققا شامامەن 11 ەلدى مەكەن جاتادى. الايدا ول ايماقتاردىڭ بارلىعىندا سايكەسىنشە ءتيىستى جۇمىستار جۇرگىزىلدى. كەلەسى اپتادان باستاپ ءبىز سۋ تاسقىنى قاۋپى جوعارى اۋدانداردى ارالاي باستايمىز. بارلىق قاجەتتى ارەكەتتەردى جەرگىلىكتى جەرلەردە كورسەتىپ, دايىندايتىن بولامىز, – دەپ مالىمدەدى وبلىس اكىمىنىڭ ورىنباسارى ەرماعانبەت بولەكباەۆ.
قازگيدرومەتتىڭ الدىن الا بولجامى بويىنشا ناۋرىزدىڭ ورتاسىنان باستاپ كۇن جىلي باستايدى.
– الداعى كوكتەمگى سۋ تاسقىنى مەرزىمى توتەنشە جايتتارسىز وتەدى دەپ ۇمىتتەنەمىز. دايىندىق جاقسى, تەحنيكا بار, – دەيدى ەرماعانبەت بولەكباەۆ.
بۇگىندە قاراعاندى وبلىسىندا تاسقىنعا قارسى دايىندىق وتكىزۋ ءۇشىن ارنايى توپ قۇرىلعان. ونىڭ ساپىندا جەكە قۇرامنىڭ 6 مىڭنان استام ادامى جانە 2500-گە جۋىق ارنايى تەحنيكا بار. 2018 جىلى جول تالعامايتىن كولىك, ءورت ءسوندىرۋ بولىمشەلەرى ءۇشىن ارنايى كولىكتەر, قايىقتار سياقتى قوسىمشا تەحنيكالار, سونداي-اق سۋ تاسقىنىنىڭ سالدارىن جويۋ ءۇشىن 106 ساز سورعىشتار الىنعان بولاتىن.
قايرات ءابىلدا,
«ەگەمەن قازاقستان»
قاراعاندى
