« ۇلىستىڭ ۇلى كۇنى» جوباسىنىڭ شەڭبەرىندە كورەرمەندەر ۇلتتىق سالت-داستۇرلەر مەن ويىنداردىڭ تەاترلاندىرىلعان كورىنىسىن, اقىندار ايتىسىن, حالىق اۋەندەرىنە قۇرىلعان ءان شاشۋ مەن كۇي تارتىس سىندى ۇلتتىق مادەنيەتىمىزدىڭ وزىق ۇلگىلەرىن تاماشالاي الادى. بۇل كۇنى «قازاقستان» كونتسەرت زالىنىڭ ۇلكەن ساحناسى مەن فويەسىنىڭ دەكوراتسيالارى ەرەكشە ءسان-سالتاناتپەن بەزەندىرىلگەن كيىز ءۇي ۇلگىسىندە ۇسىنىلادى.
كونتسەرتتە «استانا ميۋزيكل» مەملەكەتتىك تەاترى ۇزدىك ميۋزيكلدەردىڭ ۇزىندىلەرىن ۇسىنادى. « ۇلىستىڭ ۇلى كۇنى» كونتسەرتىندە كورەرمەن ءسۇيىپ تىڭدايتىن حالىق اندەرى, زاماناۋي سازدى اۋەندەر جاندى داۋىستا «استانا سازى» جانە «Saz&soul» ۇجىمدارىنىڭ سۇيەمەلدەۋىمەن ورىندالماق. وتاندىق ەسترادا جۇلدىزدارىنىڭ جاڭا وبرازدارى, تاپتىرماس شوۋ جانە كۇتپەگەن دۋەتتەر ەرەكشە ءارى ەستەن كەتپەس اسەر قالدىرادى.
