الەمدە جىلىنا 36 ميلليوننان استام ادام ينفەكتسيالىق ەمەس اۋرۋلاردان كوز جۇمادى ەكەن. بۇل ءولىمنىڭ 63 پايىزىن قۇرايدى. ال قازاقستاندا قايتىس بولاتىنداردىڭ 80 پايىزى قاتەرلى ىسىك, اس قورىتۋ, تىنىس الۋ جانە جۇرەك-قانتامىر جۇيەسى اۋرۋىنا شالدىققاندار كورىنەدى. بۇل دەرەكتەر استانادا دۇرىس جانە قاۋىپسىز تاماقتانۋ مادەنيەتىن قالىپتاستىرۋ ماسەلەلەرى تالقىلانعان دوڭگەلەك ۇستەلدە ايتىلدى.
جيىندا ءسوز العان قوعامدىق دەنساۋلىق ساقتاۋ ۇلتتىق ورتالىعىنىڭ ديرەكتورى ءۋاليحان احمەتوۆ ەكونوميكالىق ىنتىماقتاستىق جانە دامۋ ۇيىمى ەلدەرىنىڭ الەمدىك تاجىريبەدە مويىندالعان دۇنيەجۇزىلىك دەنساۋلىق ساقتاۋ ۇيىمىنىڭ دۇرىس تاماقتانۋ ماسەلەلەرى جونىندەگى ۇسىنىستارىنا, قازاقستانداعى اعىمداعى جاعدايعا جانە دۇرىس تاماقتانۋ ساياساتىن قامتاماسىز ەتۋ بويىنشا مىندەتتەرگە جان-جاقتى توقتالدى.
ددسۇ-نىڭ ينفەكتسيالىق ەمەس اۋرۋلاردىڭ الدىن الۋ جانە وعان قارسى كۇرەس جونىندەگى ەۋروپالىق كەڭسەسىنىڭ باسشىسى, تاماقتانۋ, دەنە بەلسەندىلىگى جانە سەمىزدىك جونىندەگى باعدارلامانىڭ مەنەدجەرى جواو برەدا ددسۇ-نىڭ, ۇلتتىق ينستيتۋتتار مەن قوعامدىق دەنساۋلىق ساقتاۋ سالاسىنداعى قاۋىمداستىقتاردىڭ ءوزارا ءىس-قيمىلى تۋرالى ايتىپ بەردى. شەتەلدىك مامان تۇزدىڭ مولشەرىن ايقىنداپ, تۇتىنۋ قاپتاماسىنداعى تاڭبالاۋعا تاماق ونىمدەرىنىڭ ەرەكشە بەلگىلەرىن ەنگىزۋدى ۇسىنىپ وتىر. بۇل ەلىمىزدە دۇرىس جانە قاۋىپسىز تاماقتانۋ مادەنيەتىن قالىپتاستىرۋعا مۇمكىندىك بەرمەك. «بىرىنشىدەن, تۇزدىڭ مولشەرىن كۇنىنە 5 گرامعا دەيىن ازايتۋ كەرەك. 5 گرامم دەگەنىڭىز جارتى قاسىققا جەتەر-جەتپەس. ۇيدە تۇزدى مۇمكىندىگىنشە پايدالانباعان ابزال. ەكىنشىدەن, جەمىس-جيدەكتەر مەن كوكونىستەردى ءجيى تۇتىنۋ قاجەت. ياعني, كۇنى بويى جەمىس-جيدەكتەر مەن كوكونىستەردەن تۇراتىن 5 ءتۇرلى تاعام جەۋ وتە ماڭىزدى. ۇشىنشىدەن, قانتتى از تۇتىنۋ, گازدالعان جانە ءتاتتى سۋسىندار وندىرىسىنە قانتتى از قوسۋ», دەيدى ول.
قوعامدىق دەنساۋلىق ساقتاۋ ۇلتتىق ورتالىعى ددسۇ ەۋروپالىق كەڭسەسى بىرلەسىپ وتكىزگەن دوڭگەلەك ۇستەلگە قاتىسۋشىلار, سونىمەن قاتار تاماق ونىمدەرىنە جانە اۋىز سۋعا, ءتيىمدى جانە دۇرىس تاماقتانباۋعا بايلانىستى اۋرۋلاردىڭ تارالۋ دەڭگەيىن تومەندەتۋ, تاماقتانۋ, تاماق ونىمدەرىنىڭ قاۋىپسىزدىگى سالاسىندا جانە قوعامدىق دەنساۋلىق ساقتاۋ سالاسىندا عىلىمي زەرتتەۋلەر جۇرگىزۋ سياقتى ماسەلەلەردى تالقىلادى.
مايگۇل سۇلتان,
«Egemen Qazaqstan»
