جۋىردا شىمكەنت قالاسىنا ارنايى ءىس-ساپارمەن كەلگەن پاۆلودارلىق دەلەگاتسيا قالالىقتارعا ءوز ۇسىنىستارىن ايتىپ, سولتۇستىككە جۇمىسقا شاقىرىپ قايتتى. 40 شاقتى بوس جۇمىس ورنىن ۇسىنىپ وتىرعان پاۆلودارلىقتار 100-دەن اسا وتباسىن باسپانامەن قامتۋعا ءازىرمىز دەيدى. ءال-فارابي اۋدانى اكىمدىگىندە جەرگىلىكتى حالىقپەن كەزدەسكەن قوناقتار سولتۇستىككە قونىس اۋدارۋعا ارنالعان مەملەكەتتىك باعدارلامانى ەگجەي-تەگجەيلى ءتۇسىندىردى.
سونداي-اق قونىس اۋداراتىن وتباسىنا ءبىر رەتتىك جاردەماقى مەن باسپانانى جالعا الۋ اقىسىمەن قوسا كوممۋنالدىق تولەمدەرى دە تولەنەتىندىگىن جەتكىزدى. بۇل يگىلىكتى ءىس «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» اياسىندا جۇزەگە اسادى.
وتكەن جىلى شىمكەنت قالاسى جۇمىسپەن قامتۋ ورتالىعىنىڭ ماماندارى ءوتىنىش بىلدىرگەن 81 وتباسىن سولتۇستىك قازاقستان, قوستاناي, پاۆلودار, شىعىس قازاقستان وبلىستارىنا قونىس اۋدارۋعا ىقپال ەتكەن. وسىلايشا جۇمىسقا قابىلەتتى 300-گە جۋىق تۇرعىن تۇراقتى جۇمىسپەن قامتىلدى دەيدى جاۋاپتىلار. ولار بۇگىندە مۇعالىم, دارىگەر, اگرونوم سياقتى ءتۇرلى ماماندىقتار بويىنشا جۇمىسقا ورنالاسىپ, ءتىپتى جەكە كاسىپتەرىن دە دوڭگەلەتىپ وتىر. قالالىق جۇمىسپەن قامتۋ ورتالىعى ماماندارى قۇنارلى سولتۇستىك وڭىردە ءتورت ت ۇلىكتى تۇلەتۋگە مۇمكىندىك مول ەكەندىگىن ايتادى. بيىل جىل سوڭىنا دەيىن 54 وتباسىنى قامتىعان 200-دەن اسا تۇرعىندى اتالعان وڭىرلەرگە قونىس اۋدارتىپ, ەكى قولعا ءبىر كۇرەك ۇستاتۋ جوسپاردا بار ەكەن.
نۇرشات توكەن,
«Egemen Qazaqstan»
شىمكەنت
