وليمپيادا اياقتالدى. قاي ەل قانداي ناتيجە كورسەتتى؟

بياتلوننان وتكەن ەستافەتالىق سايىستا قازاقستان قۇراماسى ساپىندا يان ساۆيتسكي, دياس كەنەشەۆ, نيكولاي برايچەنكو, الەكساندر چەرۆياكوۆ ونەر كورسەتتى. الايدا, ولار 18-ورىندا قالىپ قويدى. شاڭعىدان 30 شاقىرىمدىق ايەلدەر ەستا­فە­تا­سىندا دا ورتاشا ونەر كورسەتتىك. ەڭ دۇ­رىس ناتيجەگە وكسانا ياتسكايا قول جەت­كىزدى. ول 19-ورىن السا, ەلەنا كو­لومينا, مارينا ماتروسوۆا جانە سۆە­تلانا مالاحوۆا سوڭعى لەكتە كو­رىندى. سوڭعى كۇنى ەرلەر 50 شا­قى­رىم­عا جۇگىردى. بۇل رەتتە ءبىز الەكسەي ءپولتوراننينىڭ تىلەۋىن تىلەدىك. بۇعان دەيىن ەكى قاشىقتىقتا 5-ورىنعا تابان تىرەگەن جەر­لەسىمىز شەشۋشى ساتتە جاسىنداي جار­قىراۋعا ءتيىس دەپ ۇمىتتەندىك. سونداي-اق, مارافوندا ەۆگەني ۆە­ليچكو جارىس جولىنا شىقتى. وكىنىشكە قاراي, جەرلەس­تە­رىمىز توپ جارا المادى. پولتورانين 27-ورىندى يەلەنسە, ۆەليچكو 39-ساتىعا تابان تىرەدى. ەڭ قىزىقتى تارتىس شايبالى حوككەيدەن ءوتتى. جارتىلاي فينالدا اقش قۇراماسى فينليانديانى تاس-تالقان ەتىپ ۇتتى. امەريكالىقتاردىڭ العاشقى كەزەڭدە سالعان التى شاي­با­سىنا سكانديناۆتار بىرەۋمەن عانا جاۋاپ قايىردى – 6:1. كانادا مەن سلوۆاكيا قاتتى تىرەستى. ءاۋ باستا اي­دىن يەلەرىنىڭ قارقىنى تىم كۇشتى ەدى, الايدا ۋاقىت وزا قوناقتار دا نا­مىسقا قامشى باستى. اقىرى ماتچ 3:2 ەسەبىمەن اياقتالدى. جەڭىسكە جەت­كەندەر فينالعا شىقتى دا, جە­ڭىل­گەن­دەر قولا مەدال ءۇشىن تالاستى. بۇل ماتچتىڭ ەكەۋى دە وتە تارتىستى ءوتتى. ءۇشىن­شى ورىنعا تالاسقان كو­مان­دا­لار­دىڭ تارتىسى قىزىققا تولى بولدى. سكانديناۆيا تۇبەگىنىڭ ساڭلاقتارى ماتچتىڭ سوڭعى نۇكتەسىن قويدى. ەسەپ – 5:3. اقتىق ايقاستا كانادا مەن اقش كەزدەستى. كورشىلەس مەملەكەتتەر ارا­سىن­داعى تەكەتىرەس وتە تارتىستى ءوتتى. ەكى جاق ءبىر-ءبىرىنىڭ ۇزاعانىن قالاماي, ۇنەمى تا­رازى باسىن تەڭسەلتىپ وتىردى. ءبى­رىن­شە كەزەڭدە كانادالىقتار العا شىقتى. ۇزىلىستەن كەيىن قوس كوماندا ءبىر رەتتەن نىسانانى ءدال كوزدەدى. ءۇشىنشى كەزەڭنىڭ سوڭىنا دەيىن شابۋىل­شى­لار­دىڭ بار ەڭبەگى زايا كەتتى. دەسەك تە سوڭعى سە­كوندت­­تەر­دە امەريكالىقتار نىسانانى ءدال كوزدەپ, ەسەپتى تەڭەستىردى. ال وۆەر­تايم­دا سيدني كروسبي سالعان شايبا كانادا قۇراماسىنىڭ مەرەيىن ۇستەم ەتتى. ەسەپ – 3:2. كوماندالىق ەسەپتە 26 مەدالدى جەڭىپ العان كانادا قارا ءۇزىپ كەتتى. ولار 14 التىن 7 كۇمىس جانە 5 قولا جۇلدەمەن كوش باستادى. ەگەر سپورت تاريحىنا جۇگىنسەك, ءبىر وليمپيادادا وسىنشاما كوپ مولشەردە باس جۇلدە العان كوماندا بولماعان ەكەن. 1976 جىلى ينسبۋركتە كسرو جانە 2002 جىلى سولت لەيك سيتيدە نورۆەگيا قۇراماسى 13 التىنعا قول جەتكىزگەن. ال كانادالىقتار ۆان­كۋۆەردە ولاردىڭ بارلىعىنان اسىپ ءتۇستى. 2-ورىندى الاڭ يەلەرىنەن ءتورت مەدالى كوپ بولسا دا ءتورت التىن جۇلدەنى كەم يەلەنگەن گەرمانيا ەنشىلەدى. ولاردىڭ بۇدان باسقا تاعى 7 كۇمىس جانە وسىنشاما قولا مەدالى بار. 3-ورىنعا بيىلعى وليمپيادادا ەڭ كوپ مەدالدى جەڭىپ العان اقش قۇراماسى جايعاستى. بيىلعى باسەكەدەن امەريكا­لىق­تار­دىڭ قور­جى­نىنا 9 التىن, 15 كۇمىس پەن 13 قولا مە­دال ءتۇستى. ال ءبىزدىڭ كور­شىلەرىمىز قىتاي مەن رەسەيگە كە­لەر بولساق, ونىڭ ءبى­رىن­شىسى 11 جۇلدە الىپ, 7-ورىنعا تابان ءتى­رەدى. شى­عىس­تاعى كورشىمىزدىڭ ەنشىسىندە 5 التىن, 2 كۇمىس جانە 4 قولا بار. بيىلعى وليمپيادادا رەسەي قۇرا­ما­سى لايىقتى دەڭگەيدە ونەر كورسەتە العان جوق. سوڭعى ءۇش قىسقى ويىنداردا ءداستۇرلى تۇردە العاشقى بەستىككە كىرىپ جۇرگەن سولتۇستىكتەگى ورمانداي ەل وسى جولعى جارىستا ارەڭ دەگەندە جەتتى دەسەك بولادى, 3 التىن, 5 كۇمىس جانە 7 قولا مەدالدى جەڭىپ الدى. بارلىعى – 15 جۇلدە. جالپى, وليمپيادا كەزىندە رەسەيلىكتەردىڭ “تۆ تس”, “روسسيا 24”, “روس­سيا” سياقتى تەلەارنالارىنداعى “پوستكريپتۋم”, “ۆەستي” باعدارلا­ما­لا­رىندا وتانداستارىنىڭ ونەرلەرىنە ريزا بولماي, بيىلعى وليمپيادانى سوڭعى كەزدەرى بولعان ەڭ ءساتسىز جارىس, رەسەي باسەكەلەر باستالعان كۇننەن بەرى قوناق كۇتۋ, ءتۇرلى كەشتەر وتكىزۋ مەن انشىلەر شا­قىرىپ كونتسەرت قويۋدان عانا ءبىرىنشى ورىن الىپ وتىر دەپ بەرگەن باعالارىنا قوسىلۋعا بولادى. “سىرت كوز – سىنشى” دەيدى. وليمپيادا كەزىندە ءبىزدىڭ بايقاعانىمىز ءدال وسىلاي بولدى. ەندى سولتۇستىكتەگى كورشىمىز وسىدان ساباق الىپ, كەلەسى جولى ءوز الاڭىندا وتەتىن وليمپياداعا ساقاداي-ساي بولىپ دايىندالاتىنىنا سەنگىمىز كەلەدى. ال تمد جانە بالتىق جاعالاۋى ەلدەرىنىڭ اراسىنان بەلارۋس 1 التىن, 1 كۇمىس جانە 1 قولا مەدالمەن تۋرنير كەستەسىندەگى 17-ورىندى يەلەنسە, 1 كۇمىس جۇلدەنى قاناعات تۇتقان قازاقستان مەن ەستونيا 25-ورىندى ءبولىستى. قورىتا ايتقاندا, قازاق ەلىنىڭ قىسقى ويىندار سياقتى ءتورت جىلدا ءبىر كەلىپ, قىرۋار ەڭبەكتى تالاپ ەتەتىن باسەكەدە وتىزدىققا كىرۋى وڭاي شارۋا ەمەس دەۋگە بولادى. بۇعان دەيىن بول­عان ءۇش وليمپيادادا قور­جى­نى­مىز بوس قايتقان كۇندەردى ەسكەرسەك, ءۇي­ەڭ­كى جاپىراقتى ەلدە ۇلتتىق قۇ­رامانىڭ كۇمىس جۇلدەنى ۇلى دالا ەلىنە ارقالاپ كەلە جاتقانى حالىق­ارا­لىق ساحنادا قازاقستاننىڭ بە­دە­لىنە بەدەل قوساتىن جەتىستىك ەكەنى ءسوزسىز. ءسوز سوڭىندا بيىلعى وليم­پياداعا 82 ەلدەن 2 766 سپورتشىنىڭ جارىستىڭ 15 ءتۇرى بويىنشا 86 مەدال جيىنتىعىن ساراپقا سالعانىن ەسكەرتكىمىز كەلەدى. عالىم سۇلەيمەن, ارنايى “ەگەمەن قازاقستان” ءۇشىن –ۆانكۋۆەردەن.