بۋبنوۆسكي ادىستەمەسى ومىرتقا جارىعى, ارتريت, ارتروز سىندى بۋىن جانە ومىرتقا اۋرۋلارىن ەمدەيتىن زاماناۋي كينەزيتەراپيانىڭ تۇرىنە جاتادى. بۇل ورتالىق قازاقستاندا العاش رەت 2001 جىلى استانا قالاسىندا اشىلىپ, 18 جىلدان بەرى جۇمىس ىستەپ كەلەدى.
ء«ادىستىڭ نەگىزگى اۆتورى ەلورداعا ءجيى كەلىپ, ناۋقاستارعا كەڭەس بەرىپ تۇرادى. سەمينار ۇلتتىق دەنساۋلىق ساقتاۋ ورتالىعىمەن بىرلەسىپ حالىققا بۇل ادىسپەن قالاي ەمدەلەتىنى, وسىنداي اۋرۋلارمەن اۋىرعاندا نە ىستەۋ قاجەت ەكەندىگى تۋرالى اقپارات الۋ ءۇشىن جاسالىپ وتىر. قازىر ءار ورتالىققا ايىنا 200-دەن استام ادام كەلەدى. استانادا 35 مىڭنان استام ناۋقاس ءبىزدىڭ ورتالىققا كەلىپ, سىرقاتتارىنان ايىعىپ كەتتى. بۇل ەمدەۋ ءادىسىنىڭ ەرەكشەلىگى ناۋقاستار ءوزى قيمىل-قوزعالىسقا ءتۇسۋ ارقىلى ەمدەلەدى. ەمدەۋ بۋبنوۆسكيدىڭ ارنايى جاتتىعۋلارى ارقىلى جۇرگىزىلەدى. قازىرگى كەزدە استانادا وسى اۋرۋمەن اۋىراتىن ناۋقاستاردى ەمدەۋگە ارنالعان 5 ورتالىعى بار», – دەدى بۋبنوۆسكي ورتالىعىنىڭ باس دارىگەرى راۆيل تايرحان ۇلى.
تمد ەلدەرى مەن الىس شەتەلدەردە ءوزىن كورسەتە بىلگەن ادىستەمەنى ميحايل بۋبنوۆسكيدىڭ اكەسى, رەسەيلىك بەلگىلى حيرۋرگ, پروفەسسور, مەديتسينا عىلىمدارىنىڭ دوكتورى, اعزانى ساۋىقتىرۋ جونىندەگى كوپتەگەن كىتاپتىڭ اۆتورى سەرگەي بۋبنوۆسكي ازىرلەگەن. ادىستەمەنى قولدانعان جىلدارى 1,5 ميلليوننان استام ادام قوزعالۋ مۇمكىندىگىنە يە بولعان.
«دەنساۋلىق – قوزعالىستا» دەگەن ۇرانمەن جۇمىس ىستەيتىن بۋبنوۆسكي ورتالىعى جانە قوعامدىق دەنساۋلىق ساقتاۋ ۇلتتىق ورتالىعىنىڭ ميسسياسى بىردەي. ويتكەنى باسىمدىق – ەمدەۋ ەمەس, حالىققا قالاي اۋىرماۋ كەرەكتىگىن, اۋرۋدىڭ الدىن الۋ, دەنساۋلىقتى قالپىنا كەلتىرۋ شارالارىن ۇيرەتۋ, ءوز دەنساۋلىعىن باسقارۋ.
«قوعامدىق دەنساۋلىق ساقتاۋ ۇلتتىق ورتالىعى بۋبنوۆسكي ورتالىعىمەن بىرلەسىپ وسى سەميناردى ۇيىمداستىردى. 350 ادام قاتىستى. ونىڭ ىشىندە ناۋقاستار, رەابيليتولوگ جانە نەۆروپاتولوگ دارىگەرلەر بار. كينەزيتەراپيا – ەجەلدەن بەلگىلى ەمدەۋ ءادىسى. ويتكەنى باياعىدا گرەكيادا, ريمدە وسى ەمدەۋ ءتۇرىن قولدانعان ەكەن. مەديتسينانىڭ اتاسى گيپوكراتتىڭ ءوزى وسىنداي قيمىلمەن, دەنە شىنىقتىرۋمەن ەمدەۋ ءتاسىلىن پايدالانعان. سوڭعى 30 جىلدىڭ ىشىندە بۇل ەمدەۋ ءتۇرى س.بۋبنوۆسكيدىڭ باستاماسىمەن قايتا جاڭعىردى. ونىڭ ورتالىعى تمد ەلدەرىندە عانا ەمەس, دۇنيە ءجۇزىنىڭ باسقا دا ەلدەرىندە اشىلدى», – دەدى قوعامدىق دەنساۋلىق ساقتاۋ ۇلتتىق ورتالىعى ديرەكتورىنىڭ كەڭەسشىسى داۋلەتحان سەرعازى ۇلى.
دەنساۋلىق ساقتاۋ سالاسىنداعى ارىپتەستىك شەڭبەرىندە جەكە مەنشىك سەكتور مەن حالىقتىڭ مۇددەلى توپتارىنىڭ بىرلەسكەن كۇشتەرىمەن, ۇيىمنىڭ ەشقايسىسى جەكە قامتاماسىز ەتە المايتىن دەنساۋلىق كورسەتكىشتەرىن جاقسارتۋعا قول جەتكىزە الادى. وسىعان بايلانىستى قوعامدىق دەنساۋلىق ساقتاۋ ۇلتتىق ورتالىعى قۇرىلعان ساتتەن باستاپ حالىقارالىق جانە قوعامدىق بىرلەستىكتەرمەن, دەنساۋلىق ساقتاۋ جانە ءبىلىم بەرۋ ۇيىمدارىمەن ىنتىماقتاستىق تۋرالى مەموراندۋمدار جاساستى. قدسۇو حالىقتىڭ ءومىر ءسۇرۋ ساپاسىن جاقسارتۋعا باعىتتالعان مىندەتتەردى شەشۋ اياسىندا بۋبنوۆسكي ورتالىعىمەن دە ءوزارا ءىس-قيمىل جاساۋعا نيەتتى.
«ەگەمەن-اقپارات»
