مەديتسينالىق قىزمەت كورسەتۋدەگى قوردالانعان ماسەلەلەردى ءتورت تۇيىنگە جيناقتاعان مينيستر بىلاي دەدى: «ەڭ باستى مىندەت – مەديتسينالىق قىزمەتتىڭ قولجەتىمدىلىگى مەن ساپاسىن ارتتىرۋ. مينيسترلىك مەملەكەتتىك ورگاندار مەن الەۋمەتتىك جەلى ارقىلى مەديتسينا سالاسىنا دەگەن حالىقتىڭ پىكىرىن زەرتتەپ, ولاردى نە مازالايتىنىن انىقتادى. بىرىنشىدەن, ساپاسىز مەديتسينالىق قىزمەتتەر ەمحانالاردا, جەدەل جاردەم جانە اۋرۋحانالاردىڭ قابىلداۋ بولىمدەرىندە وتە ءجيى كەزدەسەدى. ەكىنشى ماسەلە – مەديتسينالىق قىزمەتتىڭ قولجەتىمدىلىگى. بۇل كوپ جاعدايدا ءتۇرلى تەحنولوگيالارعا, مەديتسينالىق قىزمەتتىڭ جانە ءدارى-دارمەكتىڭ باعاسىنا بايلانىستى بولىپ وتىر. ۇشىنشىدەن, دەنساۋلىق ساقتاۋ سالاسىنىڭ اشىقتىعى. حالىق مەديتسينالىق قىزمەتتەردىڭ قالاي ۇيىمداستىرىلىپ, قالاي جەتكىزىلىپ جاتقانىن تۇسىنبەيدى. ولار قانداي جۇيەلى شارالار مەن جاڭا تارتىپتەردىڭ ەنگىزىلگەنىنەن حابارسىز. ونى ءبىز دۇرىستاپ كورسەتپەيمىز. سوڭعى ءبىر ماڭىزدى ماسەلە – حالىقتىڭ دەنساۋلىق جاعدايى».
اسىرەسە ناۋقاستار شۇعىل, جوسپاردان تىس ستاتسيونارعا تۇسكەن كەزدە مەديتسينالىق قىزمەتتىڭ دۇرىس كورسەتىلمەيتىنىن ايتقان مينيستر قابىلداۋ بولىمدەرىنە شۇعىل كومەك كورسەتەتىن دارىگەر ەنگىزىلەتىنىن جەتكىزدى.
مايگۇل سۇلتان,
«Egemen Qazaqstan»
