باتىس قازاقستان وبلىستىق قوعامدىق كەڭەس توراعاسى ەربول سالىقوۆتىڭ ايتۋىنشا, 2016 جىلى اقپان ايىندا 41 ادامنان قۇرىلعان قوعامدىق كەڭەس مۇشەلەرىنىڭ ناقتى سانى قازىر 38 ادامعا تۇراقتاعان, ونىڭ 31-ءى – ازاماتتىق قوعام وكىلدەرى ەكەن. قوعامدىق كەڭەس قۇرىلعالى بەرى وتكەن ءۇش جىل ىشىندە 23 مارتە كەڭەيتىلگەن وتىرىس, 60 مارتە تورالقا وتىرىسى وتكەن. باتىس قازاقستان وبلىسىنىڭ زەلەنوۆ اۋدانىنىڭ اتاۋى پرەزيدەنت جارلىعىمەن بايتەرەك بولىپ وزگەرۋى, وزگە دە ەلدىمەكەندەر مەن كوشەلەر اتاۋىن اۋىستىرۋ الدىمەن وسى قوعامدىق كەڭەس وتىرىستارىندا قارالعان. كەڭەس قۇرىلعان العاشقى جىلى بۇكىل قوعامدى الاڭداتقان جەر ماسەلەسىنە وراي 2016 جىلى باتىس قازاقستان وبلىستىق قوعامدىق كەڭەسىنىڭ كەڭەيتىلگەن وتىرىسى ءبىر ايدا 5 رەت ۇيىمداستىرىلعان. بۇل جيىنعا 500-دەن اسا ادام قاتىسىپ, 126 ادام سويلەگەن. وسىنىڭ ءوزى-اق قوعامدىق كەڭەستىڭ ەل-جۇرت الدىندا بەدەلدى, سەنىمدى الاڭعا اينالعانىن كورسەتەدى. تەك 2018 جىلى عانا قوعامدىق كەڭەستىڭ 7 وتىرىسى وتكىزىلىپ, 125 قۇقىقتىق-نورماتيۆتىك اكتىلەر قارالعان.
- ەلباسىنىڭ «ۇلت جوسپارى – بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام» باعدارلاماسىنان باستاۋ العان قوعامدىق كەڭەستەر قۇرىلعالى بەرى وتكەن ءۇش جىل ىشىندە بيلىك پەن حالىق اراسىنداعى پىكىر الماسۋ الاڭىنا اينالدى, - دەيدى باتىس قازاقستان وبلىستىق ءماسليحات حاتشىسى مالىك قۇلشار.
جيىندا ءوڭىردىڭ الەۋمەتتىك-ەكونوميكالىق دامۋى بويىنشا اتقارىلعان جۇمىستار مەن 2019 جىلدىڭ دامۋ جوسپارى تۋرالى بايانداعان باتىس قازاقستان وبلىسىنىڭ اكىمى التاي كولگىنوۆ ەل يگىلىگى, قوعام جاراسىمى ءۇشىن اقىسىز-پۇلسىز كوپ جۇمىس اتقارىپ جۇرگەن قوعامدىق كەڭەس مۇشەلەرىنە ۇلكەن العىس ايتتى.
- 2018 جىلدىڭ قورىتىندىسى بويىنشا وڭىردەگى ونەركاسىپ كولەمى 2,5 ترلن. تەڭگەنى قۇرادى. وڭدەۋشى ونەركاسىپتىڭ ەكسپورتى 202 ملن. اقش دوللار, ينۆەستيتسيا كولەمى 453 ملرد. تەڭگە بولدى. شيكىزاتتىق ەمەس سەكتورداعى ينۆەستيتسيا 11,4%-كە ءوستى, سونىڭ ىشىندە اۋىل شارۋاشىلىق سالاسىنداعى ينۆەستيتسيالار 42%-تەن جوعارى بولدى. مەملەكەت بيۋدجەتىنە 304 ملرد. تەڭگە مولشەرىندە سالىق ءتۇستى. ءجىو قۇرىلىمىندا شاعىن جانە ورتا بيزنەستىڭ ۇلەسى 40%-دان اسادى. 2018 جىلى 432 مىڭ. شارشى مەتر تۇرعىن ءۇي سالىندى. وسىنىڭ ءبارى, قۇرمەتتى كەڭەس مۇشەلەرى, وزدەرىڭىزدىڭ تىكەلەي ارالاسۋىڭىزبەن جۇزەگە استى, - دەدى التاي كولگىنوۆ.
وبلىس اكىمى مەملەكەتتىك باعدارلامالار مەن قازاقستان حالقىنا جولداۋىنا سايكەس جۇزەگە اسىرىلعان شارالاردى دا اتاپ ءوتتى.
باتىس قازاقستان وبلىسى ەكونوميكاسىنىڭ ارقاسۇيەرى – مۇناي-گاز سالاسى ەكەندىگى بەلگىلى. بىراق سوڭعى جىلدارى ەكونوميكانى ءارتاراپتاندىرۋ جۇيەلى قولعا الىندى. سونىڭ ىشىندە ءوڭىردىڭ اۋىل شارۋاشىلىق الەۋەتى ءوسىپ كەلەدى. ماسەلەن 2018 جىلى اۋىل شارۋاشىلىعىنىڭ جالپى ءونىمى 140 ملرد. تەڭگەدەن استام بولدى. سونىڭ ىشىندە ءتورت ت ۇلىكتىڭ دە سانى ارتقان: ءىرى قارا - 3,7% (565,6 مىڭ باس), جىلقى - 9,4% (180,6 مىڭ باس), قوي - 0,6% (1 082,4 مىڭ باس), قۇس - 39,3% (1 859 , 4 مىڭ باس)-قا كوبەيگەن. اسىل تۇقىمدى مال سانى 35%-عا ارتقان. سوڭعى 4 جىلدا اسىل تۇقىمدى مال وسىرۋمەن اينالىساتىن شارۋاشىلىقتاردىڭ سانى دا ەكى ەسە ءوستى.
- مال باسىنىڭ ءوسۋى ەت ەكسپورتىن ۇلعايتۋعا مۇمكىندىك بەردى. بۇگىن ءبىز ەت پەن ەت ونىمدەرىن رەسەي, يران, قىتاي, ارمەنيا, بەلورۋسسيا جانە باسقا ەلدەرگە جەتكىزەمىز. 2017 جىلمەن سالىستىرعاندا ەت ەكسپورتى 34 پايىزعا كوبەيدى نەمەسە 3 مىڭ تونناعا ارتتى, - دەيدى ءوڭىر باسشىسى.
بىلتىر وڭىردە اۋىل شارۋاشىلىق ونىمدەرىن قايتا وڭدەيتىن 4 كاسىپورىن ىسكە قوسىلدى. سۋارمالى القاپ كولەمى 43,8 مىڭ گەكتارعا جەتتى. سوڭعى 4 جىلدىڭ وزىندە 8 ءىرى يرريگاتسيالىق نىسان قالپىنا كەلتىرىلگەن. وبلىس اكىمى وسى سۋلاندىرۋ جۇيەسىنە رەسپۋبليكالىق بيۋدجەتتەن قارجى كوزىن قاراستىرۋعا قولعابىس ەتكەن وسى وڭىردەن شىققان پاولامەنت دەپۋتاتتارىنا العىس ايتتى.
- وتكەن جىلى اق جايىق ءوڭىرى كوپتەگەن الەۋمەتتىك-ەكونوميكالىق دامۋ كورسەتكىشىنە قول جەتكىزدى. بۇل بارلىق مەملەكەتتىك ورگانداردىڭ جانە ازاماتتىق قوعام وكىلدەرىنىڭ بىرلەسىپ اتقارعان جۇمىستارىنىڭ ناتيجەسى. ءبىز بۇل جۇمىسپەن توقتاپ قالماي, الدىمىزدا تۇرعان زور مىندەتتەردى جۇمىلا اتقارۋعا ءتيىسپىز. حالقىمىزدىڭ ءال-اۋقاتىن جاقسارتۋعا باعىتتالعان «نۇرلى جول», «نۇرلى جەر», «7-20-25» مەملەكەتتىك جانە باسقا دا سالالىق باعدارلامالاردى ءساتتى جۇزەگە اسىرۋىمىز كەرەك. بۇل تاپسىرمالار ەلباسىنىڭ جولداۋىندا ناقتى ايقىندالعان. سوندىقتان بارشاڭىزدى ەلىمىزدىڭ باسەكەگە قابىلەتتى 30 مەملەكەت قاتارىنا كىرۋىنە, وبلىسىمىزدىڭ ودان ءارى كوركەيۋىنە ۇلەس قوسۋعا شاقىرامىن, - دەپ قورىتتى التاي كولگىنوۆ ءوز ەسەبىن.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
