ول ۇلى وتان سوعىسىنىڭ ارداگەرى, ءتاريح پانىنىڭ ارداگەر مۇعالىمى ەدى. قازاقستاننىڭ ەڭبەك سىڭىرگەن قىزمەتكەرى. قازاقستان ءبىلىم سالاسىنىڭ قۇرمەتتى قىزمەتكەرى بولعان.
س.يساەۆ قاراعاندى وبلىسى اقتوعاي اۋدانى №9 اۋىلىندا دۇنيەگە كەلگەن.
1941 جىلى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ تاريح فاكۋلتەتىن بىتىرگەن.
ەڭبەك جولىن 1941 جىلى الماتى وبلىسى ەڭبەكشىقازاق اۋدانىنىڭ ورتالىعىنداعى ەسىك قازاق ورتا مەكتەبىندە تاريح پانىنەن ساباق بەرۋدەن باستاعان.
1942 جىلى ارميا قاتارىنا شاقىرىلىپ, ورلوۆ اسكەري ۋچيليششەسىنە وقۋعا جىبەرىلەدى. قىسقا مەرزىمدى ۋچيليششەنى لەيتەنات اسكەري اتاعىمەن ءبىتىرىپ, اشحابادتاعى №18 مەرگەندەر مەكتەبىندە ۆزۆود كومانديرى بولىپ قىزمەت ىستەپ, 1943 جىلى سوعىس مايدانىنا اتتانادى. 2-ۋكراين مايدانىندا 41-گۆارديا ديۆيزياسىنىڭ 24-پولكى ءبىرىنشى باتالونىنىڭ قۇرامىندا سوعىستا بولادى. دنەپر شايقاسى مەن كورسۋن – شەۆچەنكونى قورشاۋ جانە ونى بوساتۋ شايقاسىنا قاتىسىپ, ەرلىكتەر كورسەتەدى. سوعىستا ەكى رەت جارالانىپ, سوڭعى اۋىر جارادان ارميا قاتارىنا جارامسىز مۇگەدەك رەتىندە ەلىنە ورالادى.
سوعىستان كەلگەن سوڭ پەداگوگيكالىق جۇمىسىنا كىرىسىپ كەتەدى. الماتى وبلىسى قاراساي اۋدانى ەسىك ورتا مەكتەبىندە مۇعالىمدىك, مەكتەپ ديرەكتورىنىڭ وقۋ-تاربيە جۇمىسى جونىندەگى ورىنباسارى, ديرەكتورى بولىپ قىزمەت اتقاردى.
1948 جىلى قاسكەلەڭدەگى اباي اتىنداعى قازاق ورتا مەكتەبى ديرەكتورىنىڭ وقۋ-تاربيە جۇمىسى جونىندەگى ورىنباسارى قىزمەتىنە اۋىستىرىلىپ, بىرنەشە جىل سوندا قىزمەت اتقارىپ, كەيىن اۋداندا جاڭادان اشىلعان قاراساي اۋداندىق تاريحي-ولكەتانۋ مۋزەيىنە عىلىمي قىزمەتكەر بولىپ اۋىسادى.
1999 جىلى قۇرمەتتى دەمالىسقا شىقتى. ودان كەيىن اۋدانداعى ارداگەرلەر كەڭەسىن باسقاردى. ءومىرىنىڭ سوڭىنا دەيىن قاسكەلەڭ قالاسىندا تۇردى. ول بىرنەشە كىتاپتىڭ اۆتورى.
