باعدارلاما ءوز جەمىسىن بەرە باستادى
بەيسەنبى, 26 قاڭتار 2012 6:45
مەملەكەتىمىزدە ەلىمىزدى ءوركەندەتۋ ماقساتىندا ءتۇرلى باعدارلامالار مەن جوسپارلار جاسالىنىپ جاتادى. سونىڭ ىشىندە «سالاماتتى قازاقستان» اتتى دەنساۋلىق ساقتاۋ سالاسىن دامىتۋ جونىندەگى مەملەكەتتىك باعدارلامانىڭ ءجونى ءبىر بولەك.
بۇل باعدارلامانىڭ ناتيجەسى دە ءوز جەمىسىن بەرە باستادى. ەڭ باستىسى, قازاقستاندىقتار بۇرىنعىعا قاراعاندا دەنساۋلىق قامىن كوبىرەك كۇيتتەيتىن بولدى دەسەك, بۇرناعى جىلمەن سالىستىرعاندا, وتكەن جىلى ۆيچ, ياعني ادامنىڭ يممۋنتاپشىلىعى ۆيرۋسىنا تەكسەرۋشىلەردىڭ سانى 10 پايىزعا وسكەنى دە ءبىراز جايتتى ايتىپ تۇرعانى انىق.
بەيسەنبى, 26 قاڭتار 2012 6:45
مەملەكەتىمىزدە ەلىمىزدى ءوركەندەتۋ ماقساتىندا ءتۇرلى باعدارلامالار مەن جوسپارلار جاسالىنىپ جاتادى. سونىڭ ىشىندە «سالاماتتى قازاقستان» اتتى دەنساۋلىق ساقتاۋ سالاسىن دامىتۋ جونىندەگى مەملەكەتتىك باعدارلامانىڭ ءجونى ءبىر بولەك.
بۇل باعدارلامانىڭ ناتيجەسى دە ءوز جەمىسىن بەرە باستادى. ەڭ باستىسى, قازاقستاندىقتار بۇرىنعىعا قاراعاندا دەنساۋلىق قامىن كوبىرەك كۇيتتەيتىن بولدى دەسەك, بۇرناعى جىلمەن سالىستىرعاندا, وتكەن جىلى ۆيچ, ياعني ادامنىڭ يممۋنتاپشىلىعى ۆيرۋسىنا تەكسەرۋشىلەردىڭ سانى 10 پايىزعا وسكەنى دە ءبىراز جايتتى ايتىپ تۇرعانى انىق.
سپيد-ءتىڭ الدىن الۋ مەن كۇرەسۋ جونىندەگى رەسپۋبليكالىق ورتالىعى ماماندارىنىڭ زەرتتەۋىنشە, ەلىمىزدە 2011 جىلدىڭ 11 ايىندا ۆيچ ينفەكتسياسىنا تەست تاپسىرعاندار سانى – 2048202 بولسا, 2010 جىلى بۇل كورسەتكىش 1940980 ادامدى قۇراعان ەكەن.
قازاقستاندا ۆيچ ينفەكتسياسىنا تەكسەرىلۋ ەرىكتى جانە تەگىن تۇردە جۇرگىزىلەدى. دونورلار عانا مىندەتتى تۇردە وسى دەرتتەن امان ەكەندىگىن ايعاقتاپ وتىرۋى قاجەت. ال اياعى اۋىر ايەلدەر ۆيچ ينفەكتسياسىنا جۇكتىلىك مەرزىمىندە ەكى رەت تەكسەرىلەدى. بۇل اتالمىش دەرتتى دەر كەزىندە انىقتاپ, ونى اسقىندىرماۋدىڭ كەشەندى شارالارى جاسالۋى ءۇشىن قاجەت.
– بۇگىنگى تاڭدا ۆيچ جۇقپالى اۋرۋىنىڭ تارالۋى 15-49 جاستاعى توپتار اراسىندا 0,2 پايىزعا دەيىن ازايدى. بۇعان قازاقستان رەسپۋبليكاسىنداعى دەنساۋلىقتى ساقتاۋ مەملەكەتتىك باعدارلاماسى ايتارلىقتاي وڭ ىقپالىن تيگىزۋدە. دسۇ ساراپشىلارىنىڭ باعالاۋىنشا, قازاقستان قازىر ەپيدەميانىڭ كونتسەنتراتسيالانعان كەزەڭىندە تۇر, سوعان سايكەس تۇرعىندار اراسىندا ۆيچ-ءتىڭ تارالۋى 0,18 پايىزدان اسپايدى. بۇل شىعىس ەۋروپا ەلدەرى جانە ورتالىق ازياداعى كورسەتكىشتەن بىرنەشە ەسە تومەن. ۆيچ-ءتىڭ الدىن الۋ شارالارى جوعارىدا اتالعان «سالاماتتى قازاقستان» مەملەكەتتىك باعدارلاماسىنا ساي جۇرگىزىلىپ وتىر, – دەيدى سپيد-ءتىڭ الدىن الۋ مەن كۇرەسۋ ءجونىندەگى رەسپۋبليكالىق ورتالىعىنىڭ ديرەكتورى مارات تۇكەەۆ.
ۆيچ-كە تەست تاپسىرۋدىڭ ءناتيجەسى ساپالى ءارى سەنىمدى بولۋى ءۇشىن ەلىمىزدەگى بارلىق سپيد ورتالىقتارى ەڭ زاماناۋي دياگنوستيكالىق قۇرال-جابدىقتارمەن قامتاماسىز ەتىلگەن.
– مەملەكەتىمىز ۆيچ ينفەكتسياسىنىڭ باستاپقى كەزەڭىندە-اق ءتيىمدى ەمدەۋگە كوپ نازار اۋدارادى. دياگنوز قويىلىپ, كەشەندى ەمدەۋ شارالارىن جۇرگىزۋ ءۇشىن سپيد ورتالىقتارى لابوراتوريالىق زەرتتەۋلەردى قايتا تياناقتايدى. ال لابوراتوريالىق قۇرالدار «سالاماتتى قازاقستان» شارالارى جوسپارىنىڭ 102-104-پۋنكتتەرىنە سايكەس ساتىپ الىنعان, – دەيدى مارات تۇكەەۆ.
سول سياقتى اتالمىش باعدارلاما اياسىندا ۆيچ-پەن ءومىر ءسۇرىپ جاتقان ادامدارعا رەسپۋبليكالىق بيۋدجەت ەسەبىنەن تەگىن ءدارى-دارمەكتەر بەرىلەتىندىگىن دە ايتا كەتۋ كەرەك. وتكەن جىلى وسى ماقساتقا بولىنگەن قاراجات 1,5 پايىزعا ۇلعايىپ, 400,8 ميلليون تەڭگە جۇمسالعان.
ايناش ەسالي.
الماتى.
