جالپى, ەلباسى اتاپ وتكەن اگروونەركاسىپ كەشەنى وبلىس ەكونوميكاسىنىڭ نەگىزگى درايۆەرىنە اينالدى. ونىڭ ءبىر مىسالىن الماتى وبلىسىندا وندىرىلگەن اۋىل شارۋاشىلىعى ءونىمىنىڭ ۇلەسى تۇتاس ەل بويىنشا وندىرىلگەن ءونىمنىڭ 17 پروتسەنتىن قۇراعانىنان انىق بايقاۋعا بولادى. قازىر جەتىسۋلىق اگرارلار ەگىستىكتى ءارتاراپتاندىرۋدىڭ ارقاسىندا قانت قىزىلشاسىنىڭ القابىن 2000 گەكتارعا, جۇگەرى ەگىستىگىن 1453 گەكتارعا, جەم-ءشوپ داقىلدارىن 1215 گەكتارعا جانە كوكونىس ءوسىرۋدى 707 گەكتارعا ۇلعايتتى. مۇنان بولەك, ەجەلدەن المانىڭ وتانى اتانعان وڭىردە باۋ-باقشا ەگىستىگىنىڭ كولەمى دە ارتتى. ءبىر عانا الما باقتارىنىڭ القابى 2,4 مىڭ گا ۇلعايىپ, وتكەن جىلى وڭىردە 65 000 توننا الما جينالعان ەكەن. سونداي-اق, ايماقتىڭ جۇگەرى وسىرەتىن شارۋاشىلىقتارى دا وتكەن جىلى رەكوردتىق ءونىم الدى. ماسەلەن, پانفيلوۆ اۋدانىنىڭ جۇگەرى القاپتارىندا گەكتارىنا 120 تسەنتنەرگە دەيىن ءونىم جينالعان. بۇل جالپى وبلىستاعى كورسەتكىشتەن 2 ەسەگە ارتىق ەكەن.
مەملەكەت باسشىسى نۇرسۇلتان نازارباەۆ ۇكىمەتتىڭ كەڭەيتىلگەن وتىرىسىندا الماتى وبلىسىنداعى اۋىل شارۋاشىلىعى سالاسىنىڭ دامۋىنا قاتىستى ايتا كەلە «سوڭعى 5 جىل ارالىعىندا ايماقتا قانت قىزىلشاسىنىڭ ەگىستىگى 10 ەسەگە كوبەيدى» دەگەن ەدى. ياعني, ءوڭىردىڭ اگروونەركاسىپ كەشەنىندەگى نەگىزگى ۇلەس وسى ءتاتتى ءتۇبىر وسىرۋشىلەر مەن قانت وندىرىسىنە بۇيىرىپ تۇرعانىن ايتۋىمىز كەرەك. ناقتى دەرەككە جۇگىنسەك, وتكەن جىلى وبلىس شارۋالارى 11200 گەكتارعا ءتاتتى ءتۇبىر تۇقىمىن سەۋىپ, ودان 440 مىڭ توننا قانت قىزىلشاسىن جينادى. بۇل ارعى جىلمەن سالىستىرعان 32 پروتسەنتكە ارتىق. ال, وبلىس بويىنشا جينالعان قانت قىزىلشاسىنىڭ ورتاشا ونىمدىلىك كورسەتكىشى 400 تسەنتنەردەن اينالدى. ال جەكەلەگەن شارۋا قوجالىقتارىنداعى ءتۇسىم كورسەتكىشى كەڭەس وداعى كەزىندەگى رەكوردتىق كورسەتكىشتەن دە اسىپ ءتۇسىپ, 800 تسەنتنەرگە دەيىن جەتكەن.
ارينە, ءتاتتى ءتۇبىر تاناپتارىنىڭ جىل سايىن كوبەيۋى ايماقتاعى وڭدەۋ وندىرىسىنە دە جان ءبىتىردى. بۇعان دەيىن وبلىستا جالعىز عانا قانت زاۋىتى جۇمىس ىستەگەن بولسا, وتكەن جىلى تاعى ءبىر ءوندىرىس ىسكە قوسىلدى. ياعني, كوكسۋ قانت زاۋىتىنىڭ مۇمكىندىگى شارالاردىڭ قارقىنىنا توتەپ بەرە الماي, شيرەك عاسىرعا جۋىق جۇمىس ىستەمەي تۇرعان اقسۋ قانت زاۋىتىنىڭ جەدەل جاڭعىرتىلىپ, ىسكە قوسىلۋىنا ۇلاستى. ناتيجەسىندە, وبلىستا بيىل 40 000 تونناداس استام تازا قانت ءونىمى شىعارىلدى. ال, جەتىسۋ تۇرعىندارىنىڭ تاتتىگە سۇرانىسى 30 000 توننا شاماسىندا ەكەن. دەمەك, ءوڭىردىڭ قانت زاۋىتتارى ىشكى نارىقتى تولىق قامتىپ, ەندى بۇكىل ەلگە تازا تابيعي ءونىم ءتۇرىن ۇسىنا باستادى دەپ سەنىممەن ايتۋعا بولادى. دەمەك, تابىس جولى جالعاسا بەرمەك. وعان نەگىز دە بار. ۇكىمەتتىڭ جالپى وتىرىسىندا ەلباسى نۇرسۇلتان نازارباەۆتىڭ ساۋالىنا وراي «كەلەشەكتە تاعى ەكى قانت زاۋىتى, قارابۇلاق, الاكول قانت زاۋىتتارىن ىسكە قوسۋ جوسپارلانىپ وتىر. قازىر ينۆەستورلارمەن كەلىسسوزدەر جۇرگىزىلۋدە» دەگەن بولاتىن وبلىس اكىمى اماندىق باتالوۆ. ەندىگى بۇل باعىتتاعى جۇمىستار قارقىن الدى.
- جۋىردا ەلباسى ۇكىمەتتىڭ كەڭەيتىلگەن كەڭەسىن وتكىزىپ, ايماقتاردىڭ دامۋىنا ەرەكشە نازار اۋدارىپ, مىندەتتەر جۇكتەدى. سوعان سايكەس وبلىستىڭ ەكونوميكالىق دامۋ مۇمكىندىكتەرىن ودان ءارى كەڭەيتۋىمىز قاجەت. كوكسۋ مەن اقسۋ قانت زاۋىتتارىن ىسكە قوستىق. ولار جينالعان ءونىمدى قازىرگە دەيىن وڭدەپ جاتىر. ەرتەڭ يرريگاتسيالىق جۇيەلەر قالپىنا كەلتىرىپ, سۋارمالى جەرلەردىڭ كولەمى ارتقان كەزدە, قانت قىزىلشاسى تاعى دا القابى ۇلعايادى, سوندا بۇل ەكى زاۋىتتىڭ قۋاتتىلىعى بىزگە ازدىق ەتە باستايدى. سول ءۇشىن الداعى ۋاقىتتا الاكول جانە قارابۇلاق قانت زاۋىتتارىن قايتا جاڭعىرتساق, ودان باسقا تاعى ءبىر قانت زاۋىتىن سالساق دەگەن جوسپارىمىز بار. ەلباسى يمپورتتى ازايتىپ, ەكسپورتتى ۇلعايتۋ تۋرالى تاپسىرما بەردى. جەتىسۋ شارۋالارى بۇل ۇدەدەن شىعىپ, ەكونوميكانىڭ گۇلدەنۋىنە ۇلەس قوسا بەرەدى, - دەيدى ايماق باسشىسى اماندىق باتالوۆ.
قالماحانبەت مۇقامەتقالي,
«Egemen Qazaqstan»
الماتى وبلىسى
