اتىراۋ وبلىسىنىڭ اكىمى نۇرلان نوعاەۆتىڭ تاپسىرماسى بويىنشا 2019 جىلدىڭ اقپانىنان باستاپ مەملەكەتتىك ورگانداردىڭ باسشىلارى الەۋمەتتىك جەلىلەردەگى اتىراۋ وبلىستىق اكىمدىگىنىڭ رەسمي پاراقشالارىندا تىكەلەي ەفيرگە شىعىپ, حالىققا ەسەپ بەرۋدى باستادى.
1 اقپاندا الەۋمەتتىك جەلى قولدانۋشىلارىنىڭ ساۋالدارىنا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى ۇلىقبەك تىناليەۆ پەن قالالىق جۇمىسپەن قامتۋ جانە الەۋمەتتىك باعدارلامالار ءبولىمى باسشىسى نۇرلى حابيەۆا جاۋاپ بەردى.
- اتىراۋ وبلىسىنىڭ اكىمى نۇرلان نوعاەۆتىڭ تاپسىرماسى بويىنشا ءبىز الەۋمەتتىك جەلىلەر ارقىلى جاسالىپ جاتقان جۇمىستار مەن جوسپارلار تۋرالى ايتامىز. قازىر تۇرعىنداردىڭ كوپشىلىگى اقپاراتتى الەۋمەتتىك جەلىلەردەن الاتىندىقتان وسى ءۇردىستى دۇرىس دەپ ويلايمىز. ءبىز اشىق ديالوگقا, جۇمىسىمىزدى انىق, ادال جاساۋعا قاشان دا دايىنبىز, - دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى ۇلىقبەك تىناليەۆ.
جۇمىسپەن قامتۋ, جاردەماقى ەسەپتەۋ, ءوزىن ءوزى جۇمىسپەن قامتىپ وتىرعان تۇرعىنداردىڭ ماسەلەلەرى تالقىلانعان تىكەلەي ەفير ەكى ساعاتقا سوزىلدى. تىكەلەي ەفيردى 5 مىڭعا جۋىق ادام قاراپ, 100-دەن استام سۇراق قويىلدى.
باقىتگۇل باباش,
«Egemen Qazaqstan»
اتىراۋ
