ايدار مەن ايناگۇل 2017 جىلى تانىسقان. كۇيەۋ جىگىت «ەكسپو» كورمەسىندە جۇمىس ىستەسە, قالىڭدىق حالىقارالىق ەكسپوزيتسيانى تاماشالۋعا كەلگەن. الايدا سول كەزدە كورمەدە كورىسۋ ەكى جاسقا بۇيىرماپتى. جارتى جىل وتكەن سوڭ ايدار مەن ايناگۇل الەۋمەتتىك جەلىلەردىڭ بىرىندە حات الماسىپ, ءبىر ۇيدە تۇراتىن كورشى ەكەندەرىن بىلگەن. ايدار ولاردىڭ شاڭىراق قۇرۋى ماڭدايلارىنا جازىلعانىن ايتادى. ۇيلەنۋ تويىنىڭ الدىندا كۇيەۋ جىگىت مەملەكەت باسشىسىنىڭ باتاسىن الۋدى ءجون كورگەن ەكەن. قاڭتاردا جاس جىگىت اقورداعا ەلەكتروندى حات جولداپ, ۇيلەنۋ تويىنا قازاقستان پرەزيدەنتىن شاقىرعان.
«بۇل باستاپقىدا مەنىڭ يدەيام بولدى. بۇل كۇننىڭ ماڭگىگە ەستە قالعانىن قالايمىن. بىرىنشىدەن, ەكەۋمىزدىڭ دە اكەمىزدىڭ كوزى ءتىرى ەمەس. سول سەبەپتى ۇلى ادامداردىڭ باتاسىن الساق, نۇر ۇستىنە نۇر بولار ەدى دەگەن وي كەلدى. بۇل ءبىز ءۇشىن وتە ماڭىزدى. سەبەبى ءبىز قازاقستاننىڭ تۇرعىندارى ەمەسپىز بە؟! كەز كەلگەن جاعدايدا ادامدارعا جاقسىلىق تىلەسەڭ, وزىڭە ەسەلەپ قايتادى. ونىڭ ۇستىنە, ەلىمىزدە «جاستار جىلى» باستالدى. مۇنىڭ ءبارى تاعدىر ىسپەتتى. ءارتۇرلى قالالاردان كەلسەك تە, ءبىزدى استانا بايلانىستىردى. كەزدەستىك, وتباسىن قۇرۋدامىز, مەن بۇعان وتە قۋانىشتىمىن, ەلوردادا ءومىر ءسۇرىپ جاتقانىما باقىتتىمىن», – دەدى ايدار سۇلەيمەنوۆ.
استانا اكىمى باقىت سۇلتانوۆ جاس جۇبايلارعا قازاقستان پرەزيدەنتى نۇرسۇلتان نازارباەۆتىڭ قۇتتىقتاۋ حاتىن تابىستادى. اكىمنىڭ ايتۋىنا قاراعاندا, ەلباسى جاس جۇبايلاردىڭ شاقىرۋ حاتىن ىستىق ىقىلاسپەن قابىل الىپ, ايدار مەن ايناگۇل سۇلەيمەنوۆتاردى وتباسىلىق ومىرگە قادام باسۋلارىمەن قۇتتىقتادى. سونداي-اق, مەملەكەت باسشىسى قوس عاشىققا زور دەنساۋلىق, باقىت پەن جارقىن بولاشاق تىلەدى.
«ەلباسى جانە استانا تۇرعىندارىنىڭ اتىنان سىزدەردى شىن جۇرەكتەن نەكە قيۋ كۇنىمەن قۇتتىقتايمىن! وسى جىلدى مەملەكەت باسشىسى جاستار جىلى دەپ جاريالاعانىن بىلەسىزدەر. بۇل – سىزدەر سياقتى ازاماتتارعا دەگەن ارتىلعان ۇلكەن ءۇمىت, بەرىلگەن وراسان مۇمكىندىك. وسىعان وراي, استانادا جاستاردىڭ الەۋمەتتىك جاعدايىن كوتەرۋ, دەنساۋلىعىن ساقتاۋ, شىعارماشىلىق باستاۋلارىن قولداۋ بويىنشا كوپ جۇمىستار جاسالادى. مەنىڭ بىلۋىمشە, ايدار قاراعاندى وبلىسىنان, ال ايناگۇل اقمولا وبلىسىنان استاناعا كەلدىڭىزدەر. سىزدەردى تابىستىرعان – ەلوردامىزدا وتكەن «ەكسپو-2017» كورمەسى. «ەكسپو» – ەلباسىمىزدىڭ ستراتەگيالىق جوباسىنىڭ ءبىرى. وزدەرىڭ دە كوردىڭدەر, كورمەنىڭ بەرگەن اسەرى دە, جاڭالىعى دا وتە كوپ. ەلوردامىزدى جاستاردىڭ ارمانى ورىندالىپ, ماحابباتىنا قول جەتكىزەتىن مەكەن دەپ اتاۋعا بولادى. سوندىقتان سىزگە ماحاببات, تاتۋلىق پەن كەلىسىم تىلەيمىن!», – دەدى باقىت سۇلتانوۆ.
