پوەزيا كەشىنىڭ شىمىلدىعى اقىننىڭ ءوز داۋىسىمەن وقىعان «بۇلقىنىپ جاتىر» ولەڭىمەن اشىلدى. ايگىلى اقىندى ەسكە الۋعا ارنالعان شارادا ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى قۇرعان «ميزام» ادەبي كلۋبىنىڭ مۇشەلەرى كورەرمەندەردى مۇقاعالي جىرلارىمەن سۋسىنداتتى. ال جاس انشىلەر اقىننىڭ سوزىنە جازىلعان اندەردى ناشىنە كەلتىرىپ ورىندادى. سونداي-اق كەشتە دارىندى جاستاردىڭ ءىزباسارى, 4 سىنىپتىڭ وقۋشىسى بال ءتىلدى ايشا امانبەكقىزى ء«ۇش باقىتىم» ولەڭىن مانەرلەپ وقىپ, كوپشىلىكتى ءتانتى ەتتى.
جىر سۇيەر قاۋىمعا كوتەرىڭكى كوڭىل كۇي سىيلاعان جاستار الماتى وبلىسىنىڭ تىلدەردى دامىتۋ جونىندەگى باسقارماسىنىڭ العىس حاتىمەن ماراپاتتالدى.
- بۇل شارانىڭ ماقساتى – مەملەكەتتىك ءتىلدىڭ قولدانىلۋ اياسىن كەڭەيتىپ, قوعامدىق ساناعا ورنىقتىرۋ, اقيىق اقىننىڭ جالىندى جىرلارى ارقىلى جاستاردىڭ ازاماتتىق جانە پاتريوتتىق الەۋەتىن دامىتۋ, - دەيدى باسقارمانىڭ تىلدەردى دامىتۋ ءبولىمىنىڭ باسشىسى تۋعاناي راحىمبەرلينا.
قالماحانبەت مۇقامەتقالي,
«Egemen Qazaqstan»
الماتى وبلىسى
