جاستارعا جالىنداعان جاراسادى
سارسەنبى, 21 قاراشا 2012 7:09
وتكەن دۇيسەنبى كۇنى شىعىس قازاقستان وبلىسىنىڭ اكىمى بەردىبەك ساپارباەۆ «جاس وتان» جاستار قاناتىنىڭ II سەزىنە قاتىسقان 88 دەلەگاتپەن كەزدەستى. وعان جوعارى وقۋ ورىندارىنىڭ رەكتورلارى, باسقارما, دەپارتامەنت باسشىلارى, بۇقارالىق اقپارات قۇرالدارىنىڭ وكىلدەرى قاتىستى.
سارسەنبى, 21 قاراشا 2012 7:09
وتكەن دۇيسەنبى كۇنى شىعىس قازاقستان وبلىسىنىڭ اكىمى بەردىبەك ساپارباەۆ «جاس وتان» جاستار قاناتىنىڭ II سەزىنە قاتىسقان 88 دەلەگاتپەن كەزدەستى. وعان جوعارى وقۋ ورىندارىنىڭ رەكتورلارى, باسقارما, دەپارتامەنت باسشىلارى, بۇقارالىق اقپارات قۇرالدارىنىڭ وكىلدەرى قاتىستى.
– بۇگىن سىزدەرمەن كەزدەسكەنىمە قۋانىشتىمىن, – دەپ باستادى اڭگىمەسىن ءوڭىر باسشىسى, «نۇر وتان» حدپ شىعىس قازاقستان وبلىستىق فيليالىنىڭ توراعاسى ب.ساپارباەۆ. – ەلباسى «جاس وتان» جاستار قاناتىنىڭ جاڭا ستراتەگياسى جايلى ويلارىن ءبىلدىرىپ, رۋحى كۇشتى, جالىنداعان جاستاردىڭ باستامالارىنا ءاردايىم جولدىڭ اشىق ەكەندىگىن ايتىپ بەردى. مەملەكەتتىڭ دامۋى, وركەندەۋى جاستارعا بايلانىستى. قازىرگى تاڭدا قازاقستاندى بۇكىل الەم تانيدى, قارىشتاپ العا باسىپ كەلە جاتقان ەلىمىز الەمدەگى دامىعان 50 مەملەكەتتىڭ قاتارىنا قوسىلۋ جولىندا ىزدەنىستەر تانىتۋدا. قانداي مەملەكەت بولسا دا ونىڭ العا باسىپ, وركەندەۋى ءۇشىن العا قويعان ماقساتى مەن مىندەتى بولاتىنى بەلگىلى. مىنە, سوندا عانا كوزدەگەن جەتىستىككە جەتە الاسىز. قازىرگى تاڭدا وڭىردە 18 مىڭنان استام «جاس وتان» جاستار قاناتىنىڭ ءمۇشەسى بار. وبلىستىڭ 19 ايماقتىق فيليالىندا, ۇكىمەتتىك ەمەس ۇيىمدارىندا جاڭا ستراتەگيا تالقىلانعانى ءمالىم. جاستار سەزىندە ەلباسى ن.نازارباەۆ جاستاردى جۇمىسپەن قامتۋ مەن جۇمىسقا ورنالاستىرۋداعى پروبلەمالار, ساپالى ءبىلىمنىڭ قولجەتىمدىلىگىنە قول جەتكىزۋ, دەنساۋلىق ساقتاۋ, تۇرعىن ءۇي ءماسەلەلەرى تۋرالى وي ءبولىستى. سونىمەن قاتار, قازاقستاندىق جاستاردىڭ مادەني دامۋى مەن ءبىرلىگى جولىنداعى كەلىسىم ۇلگىسىن نىعايتۋ, جاستار اراسىنداعى كاسىپكەرلىكتى دامىتۋ مەن مەملەكەت باسشىسىنىڭ زياتكەر ۇلت قۇرۋ تۋرالى يدەياسىن ىسكە اسىرۋ, وتانىمىزدىڭ شىنايى پاتريوتتارىن تاربيەلەۋ جونىندە دە جاڭا مىندەتتەر قويىلدى, – دەپ ءسوزىن جالعاستىردى ءوڭىر باسشىسى.
ەندى, وڭىردە اتقارىلىپ جاتقان ىستەرگە توقتالا كەتسەك.ۇستىمىزدەگى جىلدىڭ 10 ايىندا جۇمىسسىزدىق 5 پايىز تومەندەدى, بۇل رەسپۋبليكالىق كورسەتكىشتەن تومەن. «جاڭا تەحنولوگيا» بويىنشا 613 ميلليارد تەڭگەنىڭ 39 جوباسى جۇزەگە اسىرىلماق. ءبىر عانا «ازيا اۆتو» كولىك قۇراستىرۋ زاۋىتىن الايىق. كەلەر جىلى كاسىپورىنعا 1539 ادام جۇمىسقا قابىلدانباق. ونىڭ ىشىندە ينجەنەر, شەبەر, باسقا دا ماماندىق يەلەرى بار. ال بۇل ماماندىقتى الىپ شىققان جاستار الىسقا بارماي-اق, ءوز جەرىندە ەڭبەك ەتۋى ءتيىمدى ەمەس پە. «ەلەكتروندى ەڭبەك بيرجاسى» ارقىلى جاستاردىڭ قالاعان ماماندىعى بويىنشا جۇمىسقا ورنالاسۋعا مۇمكىندىك تۋماق. ول بارلىق اۋدانداردا بولادى. جوعارى وقۋ ورىندارىنا ۇبت كەزىندە جاستار تومەن باعا الىپ جاتادى. نەگە؟ بۇدان قورىتىندى شىعارۋ ءۇشىن كەشەندى تەستىلەۋگە ازىرلىك ءجونىندەگى ورتالىق اشىلماق. ول جەردە مەكتەپ ءبىتىرۋشى تۇلەكتەر ءازىرلەنىپ قانا قويماي, سىناقتىڭ قىر-سىرى جايلى مالىمەتتەر الا الادى.
ءوڭىر باسشىسىنىڭ ايتۋىنشا, شىعىس قازاقستان وبلىسىنىڭ گرانت مولشەرى جىل سايىن ءوسىپ كەلەدى. ماسەلەن, 2007 جىلى كوبىنەسە اۋىل جاستارىنا باسىمدىق بەرەتىن 180 جاسقا تەگىن وقىتۋ گرانتى بولىنسە, قازىر ونىڭ سانى 820-عا جەتكەن. ال كەلەر جىلى تالاپتى تۇلەكتەرگە دەپ 900 گرانت بولىنگەن. ءبىلىم الىپ جاتقان جاستاردى جاتاقحانامەن قامتاماسىز ەتۋ دە نازاردا.
قازىرگى جاستار دەنساۋلىعى مىقتى, سپورتتى سەرىك ەتكەن, تەپسە تەمىر ۇزەتىن, جالىنداعان, رۋحى كۇشتى, العا قويعان ماقساتتارىن ورىندامايىنشا تىنىم تاپپايتىن قاسيەتتەرىمەن ەرەكشەلەنىپ تۇرۋى ءتيىس. ول ءۇشىن وبلىستا بارلىق جاعداي جاسالعان. بۇل كۇندەرى وڭىردە 2784 سپورت قوندىرعىسى جۇمىس ىستەپ تۇر, 291 مادەنيەت ءۇيى بار. 2013 جىلى بارلىق اۋداندار مەن قالالاردا جاساندى فۋتبول الاڭدارى ىسكە قوسىلماق.
سەمەي مەملەكەتتىك پەداگوگيكالىق ينستيتۋتىنىڭ ستۋدەنتى, «جاس وتان» جاستار قاناتى سەمەي فيليالىنىڭ اتقارۋشى ديرەكتورى, سەزد دەلەگاتى ەركەبۇلان بالتابەكوۆ ءوڭىر باسشىسىنىڭ وزدەرىمەن كەزدەسكەنىنە العىسىن ايتىپ, سەمەي اتوم پوليگونىنداعى يادرولىق قارۋدان باس تارتۋ جونىندەگى ەلباسىنىڭ كورەگەندىك ساياساتىن قولدايتىنىن, وسىعان بايلانىستى سەمەي مەن كۋرچاتوۆ قالالارىندا جاستاردىڭ بىرقاتار يگى شارالاردى وتكىزگەنىن جاستار فورۋمىندا ايتقانىن تىلگە تيەك ەتتى.
– سەزدەن ارقالانىپ قايتتىم. ەلباسى جاستار فورۋمىندا جوعارىدان تومەنگە, ياعني قالادان اۋىلعا قاراي بەت بۇرىپ, جاستار ورتالىعىن قۇرۋ, ولاردىڭ بەلسەندى ارەكەت جاساۋلارى جونىندە ايتتى. جارما اۋدانىنىڭ جاستارى دا بۇل باعىتتا ءبىرشاما جۇمىستاردى اتقارىپ جاتىر. ءبىزدىڭ جاستار ۇيىندە 7 ادام قىزمەت ەتەدى. 12 ميلليون تەڭگە قارجى ءبولىندى. بۇل قارجىنى ءتيىمدى جۇمساپ, ءبىر جىلدا جۇزگە جۋىق شارا وتكىزدىك. الداعى ۋاقىتتا دا جارمالىقتار ەلىمىزدىڭ كوركەيۋىنە ءوز ۇلەستەرىن قوسا بەرەدى, – دەدى كەزدەسۋدە ءسوز العان جارما اۋدانىنداعى جاستار ءۇيىنىڭ ديرەكتورى مارجان باقىتقىزى.
– مارجان وتە ورىندى ايتتى. ءبىر اۋدانعا 12 ميلليون كوپ قارجى ەمەس. باسقا اۋدانداردا دا جاستار ءۇيى بەلسەندى جۇمىس ىستەۋى ءتيىس. جاقىندا وبلىستىق مادەنيەت باسقارماسى باسشىلارىنا جاستار راديوسىن جانە ينتەرنەت-تەلەۆيزيا اشۋ ءجونىندە تاپسىرما جۇكتەدىم. بۇدان بىلاي بەلسەندىلەردىڭ ءوز ويىن راديودا نەمەسە ينتەرنەت-تەلەۆيزيادا بىلدىرۋىنە شەك قويىلمايدى, – دەدى ءوڭىر باسشىسى.
بۇدان كەيىن ءسوز العان بەلسەندىلەر «جاس وتان» جاستار قاناتىنىڭ قوعام ومىرىنە بەلسەنە ارالاسۋى, پروبلەمالار مەن كەمشىلىكتەردى بىرلەسىپ شەشۋ, وڭىردەگى ماڭىزدى باستامالاردى قولداۋ, وعان ءۇن قوسۋ جايلى ءپىكىر ءبىلدىردى. وبلىس اكىمى بەردىبەك ساپارباەۆ كەزدەسۋ سوڭىندا جاستارعا وقۋدا الدا, ەڭبەكتە ۇزدىك بولۋعا تىلەك ءبىلدىرىپ, ەل يگىلىگى جولىندا ايانباي تەر توگۋگە شاقىردى.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى.
