ۇكىمەتتىڭ ونكولوگيالىق اۋرۋلاردىڭ الدىن الۋ جونىندەگى كەشەندى جوسپارى جۇزەگە اسىپ وتىر ما؟

ال 2018-2022 جىلدارعا ارنالعان ونكولوگيالىق اۋرۋلارمەن كۇرەسۋدىڭ كەشەندى جوسپارى 4 باعىتتى قاراستىرادى:

1. قاۋىپ فاكتورلارىنىڭ پروفيلاكتيكاسى جانە باسقارۋ

2. جوعارى ءتيىمدى ەرتە دياگنوستيكالاۋ

3. ونكولوگيالىق كومەك كورسەتۋدىڭ ينتەگرالداۋ مودەلىن  ەنگىزۋ 

4. عىلىم مەن كادرلىق الەۋەتتى دامىتۋ

2018 جىلدىڭ قورىتىندىسى بويىنشا قاتەرلى ىسىككە شالدىعۋ 100 مىڭ تۇرعىنعا شاققاندا 195,7 بولدى, ياعني 35 753 ادام دەرتتى ەكەندىگى جاڭادان انىقتالعان.

اۋرۋدىڭ قۇرىلىمىندا ءبىرىنشى ورىندى ءسۇت بەزى قاتەرلى ىسىگى (12,6%), ەكىنشى ورىندى – وكپەنىڭ قاتەرلى ىسىگى (9,9%), ءۇشىنشى ورىندى – اسقازان قاتەرلى ىسىگى (7,4%), 4 ورىندى – جاتىر موينى قاتەرلى ىسىگى مەن توق ىشەك قاتەرلى ىسىگى 4,7%  الىپ تۇر.

ونكولوگيالىق اۋرۋلاردىڭ ەلەكتروندىق ءتىزىلىمىنىڭ كورسەتكىشتىك مالىمەتى بويىنشا, قاتەرلى ىسىك اۋرۋلارىنىڭ ءولىم دەڭگەيى 100 مىڭ تۇرعىنعا شاققاندا 78,3 بولدى (2017 جىلى 93,3).

ءسۇت بەزى قاتەرلى ىسىگىمەن اۋىرىپ, بىراق 5 جانە ودان كوپ جىل ءومىر ءسۇرىپ كەلە جاتقان ونكولوگيالىق ناۋقاستاردىڭ ۇلەسى 54,4%-عا دەيىن (ينديكاتور كورسەتكىشى –51,4%, 2017 جىلى – 53,2%), جاتىر موينى قاتەرلى ىسىگىمەن 55,5% دەيىن (ينديكاتور كورسەتكىشى -53,9%, 2017 جىلى – 54,2%), كولورەكتالدى قاتەرلى ىسىگىمەن 45,4% دەيىن (ينديكاتور كورسەتكىشى – 43,1%, 2017 جىلى – 43,7%) ءوستى.

سونداي-اق, ونكولوگيالىق اۋرۋلاردى ەرتە انىقتاۋ, ياعني دياگنوستيكالاۋ جاقساردى. قاتەرلى ىسىكتەردىڭ جاڭا جاعدايلاردىڭ جالپى قۇرىلىمىندا 0-I ساتىسى 26,2% -دى قۇرايدى (ينديكاتور كورسەتكىشى 24,1%, 2017- 24,7%).

جانە 2018-2022 جىلدارعا ارنالعان ونكولوگيالىق اۋرۋلارمەن كۇرەس بويىنشا كەشەندى جوسپار شەڭبەرىندە ونكولوگيالىق كومەكتى كورسەتۋ ستاندارتتارى جەتىلدىرىلۋدە.

وعان قوسا قازاقستان رەسپۋبليكاسى ۇكىمەتىنىڭ 2018 جىلعى 11 مامىردا №255 «ۇلتتىق عىلىمي ونكولوگيالىق ورتالىعىن» قۇرۋ تۋرالى قاۋلىسى قابىلداندى.

وڭىرلەردە (الماتى, اتىراۋ, قىزىلوردا, ماڭعىستاۋ, وڭتۇستىك قازاقستان وبلىستارى), ونىڭ ىشىندە ءمجا-ءنى تارتا وتىرىپ, ونكولوگيالىق ورتالىقتارى بار كوپ بەيىندى ەمحانالار سالۋ جونىندە ماسەلە قاراستىرىلۋدا. 

پاللياتيۆتىك كومەك جانە اۋىرسىنۋعا قارسى تەراپيا بويىنشا جاتتىقتىرۋشىلاردى دايارلاۋ جالعاسىن تاۋىپ وتىر. ياعني, وڭىرلەردەگى العاشقى مەديتسينالىق-سانيتارلىق كومەك كورسەتۋ ماماندارى ءۇشىن ونكولوگيالىق ناۋقاستاردى وڭالتۋ جانە ەمدەۋ ءۇشىن جانە اۋرۋعا ۋاقىتشا جەڭىلدىك بەرەتىن كومەكتىڭ پسيحولوگيالىق اسپەكتىلەرى بويىنشا 109 بىلىكتىلىكتى ارتتىرۋ كۋرسى جۇرگىزىلدى.