ارىپتەسىمىز, گازەتىمىزدىڭ ءتىلشىسى گۇلنۇر قۋانىشبەكقىزى 2018 جىلى قىركۇيەكتىڭ 28-ندە بوسانىپ, اياق-قولىن باۋىرىنا العان سوڭ, ياعني قازان ايىندا ەلەكتروندىق ۇكىمەتكە (egov) ەنگىزگەن جۇيە بويىنشا, ينتەرنەت ارقىلى جاردەماقىعا قاجەتتى قۇجاتتاردى تاپسىرادى. سول كەزدە ءبىر رەتتىك جورگەكپۇلدى العانىمەن, اي سايىنعى جاردەماقىسى تۇسپەگەن. قاراشادا ءتۇسۋى ءتيىس اقشانى الا الماعاندىقتان, گۇلنۇر «مەملەكەتتىك زەينەتاقى تولەۋ ورتالىعىنا» (ودان ءارى – مزتو) بارادى. ونداعىلار: «قۇجاتتارىڭىز قابىلدانعان, باستىسى ءبىر رەتتىك جورگەكپۇلدى الدىڭىز. دەمەك, بۇل دا ءتۇسۋى ءتيىس. كەي جاعدايدا قۇجاتتى تاپسىرعان كۇنگە قاتىستى ىلىنبەي قالىپ جاتادى, سوندايدا 2 ايدىڭ اقشاسىن قوسىپ بەرەدى, كەلەسى ايدا جىبەرەتىن بولار. بۇل سۇراعىڭىزعا ناقتى جاۋاپتى الەۋمەتتىك ساقتاندىرۋ ورتالىعى بەرەدى», دەپ شىعارىپ سالادى. ەمىزۋلى بالامەن وتىرعان انا ءارى-بەرى جۇگىرۋدەن گورى كۇتۋدى قۇپ كورگەن. بىراق جاردەماقى جەلتوقساندا دا تۇسپەيدى. امالسىزدان مزتو-نىڭ 1411 بىرىڭعاي بايلانىس نومىرىنە حابارلاسقاندا, بازانى تەكسەرگەن قىزمەتكەر اي سايىنعى جاردەماقىنىڭ بۇعاتتالعانىن ايتادى. سودان تىركەۋدە تۇرعان استانا قالاسىنىڭ الماتى اۋداندىق مزتو-عا قايتادان بارسا, ولار: ء«سىزدىڭ مەكەنجايىڭىز ەسىل اۋداندىق مزتو-عا ءوتىپ كەتكەن. سوندا باراسىز», دەپ سىلتەگەن. تىركەۋ بويىنشا الماتى اۋدانى, ال مزتو-دا ونىڭ تۇراتىن كوشەسى ەسىل اۋدانىنا قارايدى ەكەن. سىلتەگەن جەرگە بارعانىمەن بۇل ورتالىق شەتەلدە تۇرمايتىنىن دالەلدەيتىن قۇجاتتارىن سۇراپ, گۇلنۇردىڭ وزىنە ءوتىنىش جازعىزىپ, قارجىنىڭ قاڭتاردا تۇسەتىنىن ايتادى. بىراق قارجى تۇسپەگەندىكتەن, سەبەبىن سۇراۋعا تاعى باردى. ورتالىق وكىلى: ء«بىز 13 جەلتوقساندا استانا قالاسىنىڭ پوليتسيا دەپارتامەنتى كوشى-قون پوليتسياسى باسقارماسىنا رەسمي حات جازدىق, ءالى جاۋاپ كەلمەدى, ءسىز ەڭبەك جانە كوشى-قون كوميتەتىنە بارىڭىز», دەيدى. يمانباەۆ كوشەسىندەگى 16 ءۇي مەكەنجايىنداعى كوميتەتكە بارسا, ونداعى قىزمەتكەر گۇلنۇردىڭ تامىز ايىندا دەكرەتتىك دەمالىسقا شىققانىن, ال قىركۇيەكتە جۇمىس ورنىنان زەينەتاقى اۋدارىلعانىن ايتىپ, جۇمىسقا شىقپاعانى جونىندە انىقتاما تاپسىرۋدى تالاپ ەتەدى. جۇمىس ىستەپ, ايلىق الىپ وتىرسا, اي سايىنعى جاردەماقى بەرىلمەيدى ەكەن. ال ول شىن مانىندە جۇمىسقا شىقپاعان, وعان تۇسكەن اقشا بۇدان بۇرىن جازعان ماقالاسىنىڭ قالاماقىسىنان اۋدارىلعان زەينەتاقى بولىپ شىعادى. ءارلى-بەرلى ساندالعان انا جۇمىسىنا كەلىپ, ايتىلعان انىقتامانى الىپ, قايتا ەسىل اۋداندىق مزتو-عا بارادى. «ەندى ماسەلەم شەشىلدى عوي» دەپ سەنەدى, بىراق بۇل «جىر» بىتپەپتى.
2018 جىلدىڭ 13 جەلتوقسانىندا جازىلعان, 2 اپتادا جاۋاپ بەرىلەدى دەگەن حاتقا 2019 جىلى 14 قاڭتاردا جاۋاپ كەلدى. سونى العا تارتقان ورتالىقتاعىلار: «كوشى-قون پوليتسياسىنان ءسىزدىڭ شەتەلگە 2016 جىلى شىعىپ كەتكەنىڭىز تۋرالى رەسمي حات كەلدى, سوعان سايكەس سىزگە جاردەماقى تولەنبەيدى», دەيدى. گۇلنۇردىڭ ويىنشا, «داۋدىڭ ءبىر باسى» وسىندا بولىپ تۇر, ويتكەنى ول 2016 جىلى ەۋروپادا جولدامامەن تاعىلىمدامادان ءوتىپ كەلگەن. زاڭ بويىنشا شەتەلگە شىققان نەمەسە تۇراتىن قازاقستان ازاماتىنا مەملەكەتتىك جاردەماقى بەرىلمەيدى. بىراق گۇلنۇر شەتەلگە كوشپەگەن جانە كوشۋ تۋرالى ءوتىنىش تە بەرمەپتى. سالىپ ۇرىپ رەسمي حاتقا جاۋاپ جازعان كوشى-قون پوليتسيا باسقارماسىنا بارسا, ولار: «بازادا قاتە كەتىپتى, ونى كوميتەت جوندەيدى, ءبىز حات جازامىز», دەيدى. 29 قاڭتاردا حات جىبەرۋى كەرەك بولعان. گۇلنۇر حابارلاسسا, راسىمەن دە شەتەلدە تۇرمايتىنىن انىقتاۋ ماقساتىندا قىزمەتتىك تەكسەرۋ جۇرگىزىپ جاتقانىن جەتكىزىپتى. «شىدامىمنىڭ بىتكەن جەرى وسى بولدى», دەيدى اشىنعان انا.
جورگەكتەگى ءسابيىن قۇشاقتاپ جاردەماقىنىڭ سوڭىنان جۇگىرگەن انانىڭ تابان توزدىرۋى «يت ءيتتى, يت قۇيرىعىن جۇمسايدى» دەگەندى ەرىكسىز ەسكە تۇسىرەدى.
ماسەلەنىڭ ەندىگى ءمان-جايىن بىلمەككە بەل بۋىپ, كوشى-قون قىزمەتتەرى ورتالىعىنا باردىق. وسى ىسكە جاۋاپتى پوليتسيا كاپيتانى انار امانتايقىزىنىڭ ايتۋىنشا, گۇلنۇر 2007 جىلى العان جەكە كۋالىگىن 2015 جىلى جاڭا ۇلگىدەگى چيپتىك كۋالىككە اۋىستىرعان. «ول 2015 جىلى سەمەيدەن استانا قالاسىنا كوشىپ كەلگەن. قازىر ەلەكتروندى چيپتىك ۇلگىدەگى كۋالىكتەن اقپاراتتى الۋ دا, اۋىستىرعان كەزدە ونداعى مالىمەتتى اۋدارۋ دا وڭاي. ال ەسكى ۇلگىدەگى مالىمەتتى جاڭارتقاندا جانە سول ۋاقىتتا بىزدە مالىمەتتەر بازاسىن جۇيەلەۋ ماقساتىندا جۇرگىزىلگەن اۋقىمدى اكتسيا كەزىندە, قۇجاتتى تولتىرعان قىزمەتكەر گۇلنۇردىڭ سەمەي قالاسىنان استاناعا قونىس اۋدارۋىن «رەسپۋبليكا اياسىندا» دەگەندى «قازاقستاننان تىس تۇراقتى تۇرۋعا» دەپ قاتە تولتىرىپ جىبەرگەن. بۇل – ادامدىق فاكتوردىڭ قاتەلىگى», دەدى كاپيتان. گۇلنۇر وسى ورتالىقتاعى پوليتسيا مايورى ەربول ماحمەتوۆكە حابارلاسقاندا قاتەلىك جىبەرگەن قىزمەتكەردىڭ جازالاناتىنىن ايتقان بولاتىن. ال ا.امانجولقىزى الماتى اۋداندىق دەپارتامەنتىندەگى قاتەلەسكەن قىزمەتكەردى جاۋاپكەرشىلىككە تارتۋ مۇمكىندىگى جوق ەكەنىن جەتكىزدى, ويتكەنى ول قازىر وندا جۇمىس ىستەمەيتىن كورىنەدى. ال ونىڭ ۇستىنەن قاراعان جاۋاپتى پودولكوۆنيك ا.ش.جارىلعانوۆا 2018 جىلى 3 ناۋرىزدا وتستاۆكاعا كەتىپتى.
قىزمەتتىك تەكسەرىس ناتيجەسىندە قازىر گۇلنۇردىڭ شەتەلگە تۇرعىلىقتى تۇرۋعا كەتپەگەنى انىقتالعان. ونىڭ ۇستىنە 2015 جىلعى جەكە كۋالىگى ءالى جارامدى قۇجات, سول سەبەپتى الماتى اۋداندىق دەپارتامەنتى كوشى-قون قىزمەتتەرى ورتالىعىنا «تۇزەتۋ حاتى» دەپ اتالاتىن قۇجاتتى جىبەرگەن. ال قۇجاتتى قابىلداعان كاپيتان كەشە ىشكى ىستەر مينيسترلىگىنىڭ كوشى-قون كوميتەتىنە مالىمەتكە تۇزەتۋ ەنگىزۋىن سۇراپ حات جازعان. «وسىنداي وقيعا ورىن العانى ءۇشىن گۇلنۇر قۋانىشبەكقىزىنان كەشىرىم سۇرايمىز. تۇزەتىلگەن مالىمەت جەكە تۇلعالاردىڭ مەملەكەتتىك مالىمەتتەر بازاسىنا ەنگىزىلەدى. بۇعان 2-3 كۇن ۋاقىت كەرەك. سودان كەيىن جاردەماقىسىن الا الادى», دەپ سەندىردى ا.امانجولقىزى.
گۇلنۇر الەۋمەتتىك جەلىدە جاريالاعان دەپارتامەنتتىڭ حاتىندا تاعى ءبىر ەكىنشى ازاماتتىڭ اتى جازىلىپتى. كاپيتاننان بۇل ازاماتتى دا سۇرادىق. ا.امانجولقىزى: «ەكىنشى ازاماتتىڭ ماسەلەسى گۇلنۇردىڭ ماسەلەسىندەي قاتەلىكتەن بولعان دەپ ايتا المايمىن. ويتكەنى بۇل تەكسەرۋ جۇرگىزۋدى قاجەت ەتەدى. بۇل ءۇشىن ازامات ءوتىنىش بەرۋ كەرەك. ءبىر انىعى, بۇل ازاماتتىڭ جەكە كۋالىگى 2016 جىلدان بەرى «تۇراقتى تۇراتىن جەرىن اۋىستىرۋ» بويىنشا جويىلعان. ودان بەرى 2 جارىم جىل بويى ادام جارامسىز قۇجاتپەن جۇرە المايدى. ول شەتەلگە شىققان بولۋى مۇمكىن. ونى ناقتىلاۋ كەرەك», دەدى. ءبىز دە باسىلىمنىڭ بۇل ماسەلەنى دە باقىلاۋدا ۇستايتىنىن, لايىقتى جاۋاپ كۇتەتىنىن جەتكىزدىك.
گۇلنۇر شىدامى تاۋسىلعان سوڭ ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى ا.سادۋباەۆقا حابارلاسىپ, ماسەلەنىڭ تەزدەتىپ شەشىلۋىن سۇراعان ەكەن. «سودان كەيىن كىشكەنە قيمىلداي باستاعانى بايقالادى. ءۇمىتىم بار», دەيدى ول. كوزىمىز كورگەننەن كەيىن كوكەيگە: «مۇنداي كۇيدە جۇرگەندەردىڭ قاتارى كوپ ەمەستىگىنە كىم كەپىل؟», دەگەن وي كەلدى. نەگە؟ سەبەبى وزگەنىڭ كۇيىن كۇيتتەپ, جانايقايىن جەتكىزىپ جۇرەتىن ءجۋرناليستىڭ ءوزى وسىنداي جاعدايدا جۇرسە, قالعان ازاماتتىڭ حالى قالاي بولماق؟
ايدانا شوتبايقىزى,
«ەگەمەن قازاقستان»
