– ەرلان تىنىمباي ۇلى, ءسىز باسقارىپ وتىرعان ارنانى ۇلت مادەنيەتىنىڭ ۇيتقىسى دەۋگە بولادى. دەسەك تە, اسا قۋاتتى اقپاراتتىق قۇرىلىمنىڭ قازاق قوعامىنداعى مىندەت-ماقساتى جايلى نە ايتار ەدىڭىز؟
– راسىندا ۇلتتىق ارنا ءوزىڭىز ايتىپ وتىرعانداي, ۇلت مادەنيەتىنىڭ ۇيتقىسى بولۋىمەن قاتار, ەلىمىزدەگى ىرگەلى مادەني شاڭىراقتىڭ ءبىرى. ءارى بۇل مەكەمەنى قايراتكەر-زيالى تۇلعالار ءۇنىن حالىققا جەتكىزەتىن جانە قازاق ونەرپازدارى مەن شىعارماشىلىق ادامداردى كوپشىلىككە تانىتاتىن, ولاردى شىڭدايتىن ۇستاحانا ىسپەتتەس ورىن دەۋگە بولادى. دەمەك, ۇلتتىق ارنانىڭ اركەزدەگى مىندەتى – ۇلتتىڭ ساياسي دامۋىنداعى باسىمدىقتاردى ايقىنداپ, قوعامدى توپتاستىراتىن ىستەردى جۇيەلى تۇردە ناسيحاتتاۋ. اشالاپ ايتار بولسام, ۇلتتىق ارنانىڭ نەگىزگى باعىتى – اعارتۋشىلىق. سول سياقتى ۇلتتىق ونەردىڭ ناسيحاتتالۋىنا, ءتول مادەنيەتىمىزدىڭ دامۋىنا قولداۋ كورسەتۋ ماسەلەسى دە ارقاشان كۇن تارتىبىنەن ءتۇسىپ كورگەن جوق.
ەكىنشىدەن, ۇلتتىق ارنا ۇلتتىق سانانىڭ قالىپتاسۋىندا ۇلكەن ءرول اتقاردى دەسەك بولادى. مىسالى, وتكەن عاسىردىڭ 80-90 جىلدارى حالىققا رۋحاني سىلكىنىس بەرگەن ساعات اشىمباەۆتىڭ «قارىز بەن پارىز» اتتى باعدارلامالىق جوباسى, شەرحان مۇرتازا جۇرگىزگەن «ۇلت پەن سانا», ەتنوگراف, جازۋشى اقسەلەۋ سەيدىمبەكوۆ پەن ءانشى جانىبەك كارمەنوۆ بىرلەسىپ جاساعان تەلەۆيزيالىق حابارلار جانە ت.ب. وسى ۇردىستەر تاۋەلسىزدىك داۋىرىنەن كەيىن دە جالعاسىن تاپتى.
ۇشىنشىدەن, ەلباسىمىزدىڭ باستاماسىمەن سوڭعى كەزدەرى دۇنيەگە كەلگەن قوعامدىق-ساياسي ماڭىزعا يە رەفورمالار دەسەك, وسى تاريحي وزگەرىستەردى قوعامعا جەتكىزىپ, ناسيحاتتاۋ مىندەتىن دە ۇلتتىق ارنا اتقارىپ كەلەدى. قىسقاسى, تۇيىندەپ ايتار بولساق, ۇلتتىق ارنا حالىققا جانە مەملەكەتتىك مۇددەگە جۇمىس ىستەۋدىڭ جارقىن ۇلگىسىن قالىپتاستىرا الدى.
– «قازاقستان» رەسپۋبليكالىق تەلەراديوكورپوراتسياسى وتكەن جىلى 60 جىلدىق مەرەيتويىن اتاپ ءوتتى. وسى مەرەكەلىك شارا اياسىندا اتقارىلعان جۇمىستارعا توقتالىپ وتسەڭىز؟
– وتكەن 2018 جىلى قازاق تەلەۆيدەنيەسى ءۇشىن داتالى جىل بولدى. بۇل وقيعانى ءبىز مەرەيتوي دەپ ەمەس, قازاق تەلەۆيدەنيەسىنىڭ دامۋىنداعى جاڭا كەزەڭ دەپ توپشىلاپ, مەرەكەمىزدى توي ەسەبىندە ەمەس, ۇرپاقتار ساباقتاستىعىن قالىپتاستىرۋداعى نەگىزگى ۇستانىم رەتىندە وتكىزۋدى ءجون كوردىك. ەڭ اۋەلى, وتكەن جىلدىڭ باسىندا اتالمىش سالانىڭ ارداگەرلەرى مەن قىزمەتكەرلەرى قاتىسقان ۇلكەن جيىن وتكىزدىك. وسى باسقوسۋدا جىل بويى وتكىزىلۋگە ءتيىس شارالار تىزبەگى ماقۇلداندى. اتاپ ايتقاندا, بىرنەشە عىلىمي كونفەرەنتسيالار, جوعارىدا ايتىپ كەتكەندەي ۇرپاقتار ساباقتاستىعىن ورنىقتىرۋ ماقساتىندا جاس جۋرناليستەر مەن ارداگەرلەردىڭ تاجىريبە الماسۋ ءۇردىسىن قالىپتاستىرۋ باعىتىندا بىرقاتار شارالار اتقارىلدى.
سونىمەن قاتار بۇعان دەيىن قوعامدىق سىلكىنىس تۋدىرعان ۇلتتىق ارنانىڭ «التىن قورىندا» ساقتالعان باعدارلامالاردى تەحنيكالىق تۇرعىدان قايتا وڭدەپ, اپتانىڭ ءار جەكسەنبىسىندە ەفيرگە شىعاردىق. ءبىر قىزىعى, سول حابارلاردا كوتەرىلگەن ماسەلەلەر مەن ساراپتاۋلار ءالى كۇنگە دەيىن قۇنىن جويماعانى, سول كەزدە ايتىلعان وي-پىكىرلەر قازىرگى كورەرمەن ءۇشىن وزەكتىلىگىن جوعالتپاعانى جانە ونى بۇگىنگى كۇن ۇردىسىمەن سالىستىرۋعا مۇمكىندىك تۋدى. بۇل جۇمىستار مەرەكەلىك ءىس-شارادان كەيىن دە توقتاپ قالماي, جىل بويى جالعاسىن تاپتى.
جوعارىداعى ءۇردىستى ءارى قاراي جالعاستىرۋ جايىندا شىعارماشىلىق ۇجىمنىڭ جىلدىق قورىتىندى ەسەبى بارىسىندا شەشىم قابىلداندى. ناتيجەسىندە, بيىل دا كورەرمەندەرىمىز ءار اپتانىڭ جەكسەنبىسىندە «التىن قورداعى» اسىل قازىنامىزدان ءسۇزىپ الىنعان سۇبەلى حابارلاردى تاماشالاي الاتىن بولدى. وسى ارقىلى ءبىزدىڭ ۇجىم – ۇرپاق ساباقتاستىعىن جالعاستىرىپ, رۋحانيات ءۇشىن تەر توككەن اسىل تۇلعالارىمىزدىڭ جارقىن بەينەسىن جاڭعىرتۋدى كوزدەۋدە.
– ۇرپاق ساباقتاستىعىن جاڭعىرتۋ جولىنداعى ىستەرىڭىزگە ساتتىلىك سەرىك بولعاي. بىراق قورداعى مۇرالاردىڭ ساقتالۋى قازىرگى تاڭدا قانداي كۇيدە؟
– قورداعى بارلىق ماتەريالداردىڭ ساقتالۋ فورماتى كاسىبيلىك دەڭگەيدە اتقارىلىپ وتىر دەۋگە بولادى. سونىمەن قاتار ەسكى مۇرالاردى تسيفرلاندىرۋ جۇمىسى تۇراقتى تۇردە, جۇيەلى ءجۇرىپ جاتىر. بۇل ءىس تەك بەينەجازبالاردى عانا قامتىپ قويماي, قازاق راديوسى قورىنداعى اۋديو جازبالاردى دا قامتيدى. ءتىپتى كەيبىر اسا قۇندى دۇنيەلەردى قاجەتتىلىگىنە بايلانىستى مەملەكەتتىك مۇراعات قورىنا تاپسىرۋدى دا نازارىمىزعا الىپ وتىرمىز. جالپى, 2018 جىلدىڭ اياعىنا دەيىن 7263 بەينەتاسپا جانە 40505 اۋديوتاسپا تسيفرلاندى.
– جۋىقتا « ۇلى دالا سازى» اتتى ۇلكەن جوبانى قولعا العاندارىڭىز جايلى ءباسپاسوز ءماسليحاتىن وتكىزدىڭىزدەر. بۇل ءىستىڭ نەگىزگى ەرەكشەلىگى قانداي؟
– اتالمىش جوبا بىرنەشە ماقساتتى توپتاستىرىپ وتىر. نەگىزگىسى – ۇلتتىق ونەردى ناسيحاتتاۋ. ياكي, حالقىمىزدىڭ بايىرعى ءداستۇرلى ونەرى: جىرشىلىق, كۇيشىلىك, انشىلىك, جىراۋلىق مەكتەپتەردىڭ وڭىرلىك ەرەكشەلىكتەرىن جاس ۇرپاققا تانىستىرۋ ماقساتىندا, سەكەن تۇرىسبەكوۆ, جانعالي ءجۇزباي, بەكبولات تىلەۋحان, رامازان ستامعازيەۆ سىندى 90-عا جۋىق ءداستۇرلى ونەر وكىلدەرىن جيناپ, مۇرالارىن جازىپ الدىق. بۇل ءبىر جاعىنان ۇلتتىق مۇرامىزدى ناسيحاتتاۋ بولسا, ەكىنشى جاعىنان ونەرلى تۇلعالاردىڭ ءان-جىرى «التىن قوردا» ساقتالادى دەگەن ءسوز. بولاشاقتا جاس ونەرپازدار مەن زەرتتەۋشىلەر قورداعى ونەر وكىلدەرىمىزدىڭ بەينەسىن كورىپ قانا قويماي, ءداستۇرلى مۋزىكانى تىڭداۋ ارقىلى بوي تۇزەيدى, ءوزىن شىڭدايدى, رۋحاني وسۋىنە سەپتىگىن تيگىزەدى. وسى جازبالار تىزبەگى جاقىندا ەفيرگە شىعا باستايدى. ياعني, قاڭتار ايىنان باستاپ, شىلدەنىڭ اياعىنا دەيىن ءار اپتا سايىن ءبىر ساعاتتىق باعدارلامانى ارنا كورەرمەندەرى تاماشالاي الادى.
– جوعارىداعى جوبانى «مەن قازاقپىن» جوباسىنىڭ جالعاسى ىسپەتتەس دۇنيە دەپ تۇسىنسەك بولا ما؟
– ولاي ەمەس. « ۇلى دالا سازى» جوباسى «مەن قازاقپىن» جوباسىنا قاراعاندا بولەكتەۋ. «مەن قازاقپىن» جوباسىنىڭ ماقساتى وڭىرلەردەگى جانە شەتەلدەردەگى قازاقتىڭ جاس ونەرپازدارىن ناسيحاتتاۋمەن بىرگە, سالىستىرۋ, بايقاۋ, سىنالتۋ فورماتىندا ءوتتى. «مەن قازاقپىن» جوباسىنىڭ العاشقىسىنا 3000-نان استام ۇمىتكەر ءوتىنىش ءبىلدىرىپ, ايماقتىق ىرىكتەۋگە 700-دەي ادام قاتىسقان بولاتىن. بۇل جوبا ءداستۇرلى ونەرىمىزدى دارىپتەپ قانا قويماي, جاس ونەرپازداردىڭ ۇلكەن ساحناعا قادام جاساۋىنا ۇيىتقى بولىپ, جول اشتى. ال « ۇلى دالا سازى» جوباسىنىڭ وزگەشەلىگى – ءداستۇرلى مۋزىكانى ۇلىقتاۋمەن قاتار, وسى سالادا جۇرگەن بارلىق ونەرپازداردىڭ باسىن قوسىپ, بۇگىندە ۇمىت بولىپ بارا جاتقان حالىق اندەرى مەن قازاق كومپوزيتورلارىنىڭ شىعارمالارىن جاڭاشا ستيلمەن ناسيحاتتاۋ.
– سوڭعى جىلدارى سىزدەر تاريحي-دەرەكتى بىرنەشە فيلم تۇسىردىڭىزدەر, وسى ءۇردىس بولاشاقتا جالعاسىن تاباتىن بولار؟
– قازاق تەلەۆيدەنيەسى تاريحىندا وتاندىق كوركەم نەمەسە دەرەكتى فيلم ءتۇسىرۋ ءۇردىسى بۇرىننان كەلە جاتقان ءداستۇر. جىل سايىن ءارتۇرلى تاقىرىپتا ون شاقتى فيلم تۇسىرىلەدى. قازىر ءبىز كورەرمەندەردىڭ جاس ەرەكشەلىگىنە وراي ءارتۇرلى تاقىرىپتى قامتىعان وتباسىلىق مەلودراما, تاريحي وقيعالارعا بايلانىستى فيلمدەر ءتۇسىرىپ كەلەمىز. مۇنداعى باستى شارت: جۇمىسقا تەك قازاق اۆتورلارىن تارتۋمەن قاتار, ستسەناريلەردىڭ بارلىعى دەرلىك قازاق تىلىندە جازىلۋىن تالاپ ەتۋدى قولعا الدىق جانە كوركەمدىك كەڭەس قۇردىق. كەڭەس قۇرامىنا تەلەۆيدەنيە سالاسىندا تاجىريبەسى مول ماماندار تارتىلدى. كوركەمدىك كەڭەس شەشىمىمەن جىل سايىن حالىقتىڭ رۋحىن كوتەرەتىن, مىنەز-ق ۇلىق سيپاتىن ايگىلەيتىن تاريحي دراما ءتۇسىرۋ قولعا الىندى. اتالمىش تاقىرىپتا تۇسىرگەن العاشقى تۋىندىمىز الاش قايراتكەرلەرىنە ارنالعان 12 بولىمدىك «تار زامان» اتتى تۋىندىنى كورەرمەن جاقسى قابىلدادى. ودان كەيىن وسى وقيعامەن جەلىلەس, ناقتىراق ايتقاندا حح عاسىر باسىنداعى الاساپىراننىڭ ەكىنشى بەتى «كەيكى مەرگەندى» تۇسىردىك. 16 ءبولىمدى بۇل تۋىندى حالىقتىڭ قىزىعۋشىلىعىن وياتىپ, قاتپارى قالىڭ تاريحي وقيعانى اۋديتورياعا جەتكىزۋگە ۇلكەن سەپ بولدى. مىسالى, YouTube كانالىنا جۇكتەلگەن «كەيكى مەرگەن» ءفيلمىن ءدال قازىرگى ۋاقىتتا جارتى ميلليونعا جۋىق ادام كورىپ ۇلگەرىپتى.
وسى ورايدا ايتا كەتەتىن تاعى ءبىر وقيعا, وتكەن جىلى ءبىز شەتەلدەگى قازاقتار شوعىرلانعان مەكەندەرگە ارنايى ءتۇسىرىلىم توبىن جىبەرىپ, 12 بولىمنەن تۇراتىن «كوشپەندىلەر» اتتى دەرەكتى فيلمدەر تسيكلىن جاساپ شىقتىق. بۇل تۋىندىدا شەتتە تۇرىپ جاتقان قازاقتاردىڭ تاريحى مەن تاعدىرى, بۇگىنگى ءومىر-سالتى, ۋايىم-ارمانى سياقتى دۇنيەلەر قامتىلدى. فيلم وتكەن قازان ايىندا ەفيرگە شىعىپ, العاشقى كەيىپكەر بايولكەلىك بۇركىتشى قىز ايشولپاننىڭ كورەرمەنمەن جۇزدەسكەنىن بىلەسىزدەر. بيىل قازاق تاريحىندا ەرەكشە ورنى بار «وربۇلاق» شايقاسى جايلى فيلم ءتۇسىرۋدى جوسپارلاپ وتىرمىز.
– سىزدەر ەفيرگە شىعاتىن تەلەونىمدى ءوز كۇشتەرىڭىزبەن دايىندايسىزدار ما, الدە...
– كوپ باعدارلامالاردى ءوز كۇشىمىزبەن دايىندايمىز. مىسالى, «پاراسات مايدانى», «دارا جول», «تاڭشولپان», «مىنبەر» ت.ب. سونداي-اق ءبىز وتاندىق مەديانارىقتى قولداۋ ماقساتىندا, جەكەمەنشىك شىعارماشىلىق كومپانيالاردىڭ قاتىسۋىمەن دە تەلەونىم دايىندايمىز. ولارعا قارجى-شىعىن جانە ۋاقىت ماسەلەسىندە قاتاڭ تالاپ قويامىز. وسى ماقساتتا جۇمىس ىستەيتىن ارنايى ءبولىم دە قۇرىلدى.
ءبىزدىڭ قازىرگى جانە الداعى ۋاقىتتاعى ماقساتىمىز – تەلەونىمدەردى وتاندىق اۋديتورياعا دايىنداۋمەن قاتار, ەلىمىز جايلى تانىمدىق-تاريحي دەرەكتى اقپارلاردى, ياعني ءوز ونىمدەرىمىزدى شەتەلدىك نارىققا شىعارۋدى كوزدەپ وتىرمىز. ويتكەنى ءبىز بۇعان دەيىن تەك تۇتىنۋشىلىق قابىلەتكە يە بولىپ كەلدىك. وسىدان قۇتىلۋ ءۇشىن شەتەلدىك ونىمدەردى ازايتۋدى ءجون كوردىك. قازىرگى تاڭدا ەفيردەن كورسەتىلىپ جاتقان شىعارىلىمداردىڭ 80 پايىزى ءوزىمىزدىڭ ءونىم, ال وتكەن جىلى ءبىز جەتى ءفيلمدى شەتەلگە ساتتىق.
تەلەۆيدەنيەمەن قاتار ارنانىڭ الەۋمەتتىك جەلىلەردەگى ناسيحاتىن جەتىلدىرۋ جۇمىسى دا قولعا الىنۋدا. سايتىمىز بار, ودان باسقا وتكەن جىلى شىققان «Qazaqstan tv» ءموبيلدى قوسىمشامىزدى از عانا ۋاقىت ارالىعىندا 492 036-دان استام قولدانۋشى جۇكتەپ ۇلگەردى. وسى قوسىمشا ارقىلى سايتقا سالىنعان قىزىقتى كونتەنتتى تەگىن جۇكتەپ الۋعا تولىق مۇمكىندىك جاسالعان. سونداي-اق YouTube-تاعى «Qazaqstan tv» ارناسىنىڭ كورسەتىلىم سانى 132 ملن-عا جەتتى. كورپوراتسيامىزدىڭ قۇرامىنا كىرەتىن مەديااكتيۆتەردىڭ رەسمي اككاۋنتتارىندا دا وڭ وزگەرىستەر بايقالادى. فەيسبۋك, ينستاگرامم جانە ت.ب الەۋمەتتىك جەلىلەردەگى اككاۋنتتارعا جازىلعانداردىڭ سانى ءبىر جىل ىشىندە 9% وسكەن. سونىمەن قاتار مينيسترلىكتىڭ تاپسىرماسىمەن «Balapan» ارناسىن كورشىلەس رەسپۋبليكالاردا, ناقتىراق ايتقاندا, شەكارالىق ايماقتاردا ءومىر ءسۇرىپ جاتقان قانداستارىمىزعا تاراتۋ جۇمىستارى تياناقتالدى.
– وتكەن جىلدىڭ سوڭىندا ەلباسىنىڭ « ۇلى دالانىڭ جەتى قىرى» اتتى ماقالاسى جاريالانىپ, تاريحي سانانى قالىپتاستىرۋدىڭ جولدارى ايقىندالدى. وسى ماقساتتا قانداي شارالار جوسپارلانۋدا؟
– ەلباسىنىڭ « ۇلى دالانىڭ جەتى قىرى» سياقتى باستامالارى شىعارماشىلىق ۇجىمدارعا تىڭنان شابىت بەرگەنى شىندىق. ءتىپتى كەيبىر ويدا جۇرگەن يدەيالارىمىز وسى رۋحاني باعداردان كورىنىس تاۋىپ جاتقانى ءبىزدى ەرەكشە قۋانتىپ وتىر. وسى ورايدا, ءبىزدىڭ ۇجىم تاعى ءبىر شىعارماشىلىق جۇمىستى باستاپ كەتتى. اتاپ ايسام, ءبىر جارىم جىل بۇرىن كانادالىق تانىمال كومپانيامەن كەلىسىمشارت جاساسىپ, ايگىلى كانادالىق رەجيسسەر, انتروپولوگ نايوبي تومپسوننىڭ كىرىسۋىمەن ارقايسىسى 50 مينۋتتىق «EQUUS» («جىلقى تاريحى») اتتى دەرەكتى تريلوگياسىن قولعا العان بولاتىنبىز. قازاقستان جىلقىنى العاش قولعا ۇيرەتكەن جانە اتبەگىلىك ونەردىڭ نەگىزىن قالىپتاسىرعان ەل ەكەنى بەلگىلى. سوڭعى جىلدارى تابىلعان ارحەولوگيالىق جادىگەرلەر, جىلقىنى قولعا ۇيرەتكەن العاشقى ادامدار قازاق جەرىندە ءومىر سۇرگەنىن ايقىنداي ءتۇستى. «EQUUS» دەرەكتى تريلوگياسى جىلقى جانۋارىنىڭ ادامزات تاريحىنداعى ءرولىن اشىپ, ورتالىق ازيادا جىلقىنىڭ شىعۋ تەگى جايلى باياندايدى. بۇل فيلم بولجام بويىنشا الەمنىڭ 50-دەن استام ەلىندە ميلليونداعان اۋديتوريا جينايدى دەپ كۇتىلۋدە. تۋىندى اعىلشىن, قازاق, ورىس تىلدەرىندە دايىندالدى.
– سىزدەر قازاق تىلىندەگى بىردەن ءبىر ارناسىزدار. سول سەبەپتى ءتىل تازالىعى جايلى ايتپاسقا بولماس, سونىڭ ىشىندە «Qazsport» ارناسىندا سپورتتىق شارالاردى جۇرگىزىپ وتىرعان جۋرناليستەردىڭ, اسىرەسە ۇلتتىق سپورت تۇرلەرىن تاپسىرلەۋشى ازاماتتاردىڭ ءتىل جۇتاڭدىعى مەن ۇلتتىق-سپورتتىق اتاۋلاردى بىلمەيتىندىگى قىنجىلتادى. ەكىنشىدەن, الەۋمەتتىك جەلىلەردە ۇلتتىق ارنا ەفيرىندە ساتيرالىق جەڭىل-جەلپى دۇنيەلەر كوپ بەرىلۋدە دەگەن سىن-پىكىرلەردى دە كوزىمىز شالىپ قالادى. وسىعان نە ايتاسىز؟
– كومەنتاتورلارمەن جۇمىستى قولعا الىپ جاتىرمىز. بىرنەشە رەت كاستينگ تە جاريالادىق. بۇل جەردە مىنا ءبىر جايتتى ەرەكشە ايتسام دەيمىن, سەبەبى, جۋرناليست-كومەنتاتورلاردى دايىندايتىن ءبىز ەمەس, جوعارى وقۋ ورىندارى. دەيتۇرعانمەن ۇلتتىق ارنا ءسىز ايتىپ وتىرعان ماسەلەنى نازاردان تىس قالدىرمايدى. تەلەجۇرگىزۋشى نەمەسە سپورتتىق ويىنداردى جۇرگىزەتىن كومەنتاتورلاردى سىناقتان وتكىزىپ, قابىلدايتىن بولدىق. تاڭداۋ بارىسىندا ەڭ ءبىرىنشى تالاپتاردىڭ ءبىرى – كوممەنتاتورلاردىڭ ءتىل بايلىعى مەن سپورتتىق ءبىلىمى.
«Qazsport» ارناسىندا وتكەن جىلى «Qazaqstan FIGHTER» كوپ ءبولىمدى تەلەۆيزيالىق رەاليتي-شوۋ ەفيرگە شىققان بولاتىن. بۇل جوبادا جاس سپورتشىلار «ارالاس جەكپە-جەكتەن قازاقستاننىڭ ەڭ مىقتى سپورتشىسى» اتاعى ءۇشىن سىنعا ءتۇستى. سونداي-اق سپورتتىق ارنا بۇكىلالەمدىك UFC سپورت ۇيىمىنىڭ جەكپە-جەكتەرىن قازاقستان اۋماعىندا ءبىر جارىم جىل بويى كورسەتۋ قۇقىعىنا يە بولعانىن بىلەسىزدەر. UFC جەكپە-جەكتەرى كورەرمەندەر اراسىندا ۇلكەن قىزىعۋشىلىق وياتىپ, كورسەتىلىم بويىنشا ەڭ جوعارعى رەيتينگكە جەتتى.
ال كەلەسى سۇراققا كەلەتىن بولساق, ۇلتتىق ارنادا بۇرىندارى كورسەتىلىپ جۇرگەن ءازىل-سىقاق جوبالارى ەداۋىر ازايدى. ءبىزدىڭ ارنا مەيلىنشە بارلىق جانردى قامتۋى كەرەك, سەبەبى كورەرمەندەرىمىزدىڭ تالعامىن دا ەسكەرۋىمىز قاجەت. ارينە ۇلتتىق ارنا كوشباسشى ارنا بولعاندىقتان, ءبىز ارقاشان دا ەل اۋزىندا, حالىق نازارىندا بولا بەرەمىز. سوندىقتان سىن-پىكىرلەردىڭ بولۋى دا زاڭدىلىق, ونسىز وزگەرىس بولمايدى. قازىرگى كەزدە ەفيرگە تەك كاسىبي, مامان جۋرناليستەردى شىعارۋ جولعا قويىلدى. وسى رەتتە باعدارلامالاردىڭ جانرلىق ۇلەسى جايىندا دا ايتا كەتكەنىم ءجون بولار, باعدارلامالاردىڭ 19%-عا جۋىعى گۋمانيتارلىق باعىتتا, 10,1% – قوعامدىق-ساياسي, 8,1% – جاڭالىقتار بولسا, 8,7% عانا ءوزىڭىز ايتىپ وتىرعان ويىن-ساۋىق جانرىنداعى جوبالاردى قۇرايدى.
ۇلتتىق ارنا قاشاندا كورەرمەندەرىنە ساپالى دا, قىزىقتى جوبالاردى ۇسىنۋدى كوزدەيدى. سوندىقتان ءبىز ۇنەمى ىزدەنىس ۇستىندەمىز, بولاشاقتا دا كورەرمەندەرىمىزدى ساپالى دۇنيەلەرمەن, قىزىقتى تۋىندىلارمەن قۋانتامىز دەگەن ويدامىز.
اڭگىمەلەسكەن بەكەن قايرات ۇلى,
«Egemen Qazaqstan»
