اۋدارما • 29 قاڭتار، 2019

وڭتۇستىك كورەيا جاڭاشىل باستامادان قينالىپ وتىر

507 رەتكورسەتىلدى

اقش پرەزيدەنتى دونالد ترامپ سالىق ازايتىپ، نارىقتى رەتتەۋمەن كۇرەسسە، الەمنىڭ تاعى ءبىر الپاۋىت ەكونوميكاسى باسقاشا باعىت ۇستانعان. 

فابريكا يەسى سەيۋنگ مۋن وڭتۇستىك كورەياداعى تومەنگى جالاقىنى وسىرگەننەن كەيىن جۇمىسشى جالداۋدى ازايتقانىن ايتادى. فابريكانىڭ ىشىندە. تيم فرانكو، «نيۋ-يورك تايمس»

مايكل چۋمان،

«نيۋ-يورك تايمس» – ينچحون، وڭتۇستىك كورەيا

پرەزيدەنت مۋن چجە ين باسقارعان وڭتۇستىك كورەيا سالىقتى كوتەرىپ، ەڭ تومەنگى جالاقى مولشەرىن ارتتىرۋعا ۋادە بەردى. الايدا جوسپار جۇزەگە اسپايتىن ءتۇرى بار.

ەكونوميكانىڭ ىلگەرىلەۋى باياۋلاعان، جۇمىسسىزدىق وسكەن. مۋن سيۋنگ سەكىلدى شاعىن كاسىپكەرلەر ءجيى شاعىم ايتادى. ينچحونداعى اۆتوكولىك بولشەكتەرىن شىعاراتىن «داسۋنگ» كومپانياسىنىڭ نەگىزىن قالاۋشى مۋن مىرزانىڭ ايتۋىنشا، جۇمىسشىلارعا تولەيتىن جالاقى مولشەرى 3 پايىزعا ۇلعايعان. ويتكەنى بىلتىر ەڭ تومەنگى جالاقى مولشەرى ساعاتىنا 7530 كورەيالىق ۆونعا، ياعني شامامەن 2550 تەڭگە دەيىن وسكەن. ناتيجەسىندە مۋننىڭ ونسىز دا از تابىسىن تىپتەن تومەندەتىپ، جۇمىسشى جالداۋىن توقتاتۋعا ماجبۇرلەدى. «كوپكە شامامىز كەلمەيدى»، دەيدى س.مۋن.

پرەزيدەنت مۋن ءورشىل باستامالارى ارقىلى الەمنىڭ كوپ بولىگى، سونىڭ ىشىندە اقش تاپ بولىپ وتىرعان بىرقاتار ەكونوميكالىق ماسەلەلەردىڭ شەشىمىن تابۋعا تالپىنادى. ەكونوميكالىق پروبلەمالار قاتارىندا باي مەن كەدەيدىڭ ايىرماسى، ءوسىمنىڭ باياۋلاۋى جانە جالاقىنىڭ ازايۋى بار.

قابىلدانعان شەشىمدەردىڭ العاشقى ناتيجەلەرى مۋن مىرزانىڭ قاتەلەسكەنىن، د.ترامپتىڭ ارەكەتى دۇرىس ەكەنىن بىلدىرمەيدى. اقش-تاعى جالاقىنىڭ ءوسىمى كەيىنگى ايلاردا قارقىندى وسكەنىنە قاراماستان، جالپى العاندا تومەن دەڭگەيدە قالىپ وتىر. ءارى 2019 جىلى امەريكالىق ەكونوميكا باياۋلايتىنى بولجانعان. ال كاسىپكەرلىكتى قولدايتىن ساياسات ۇستاناتىن ەۋروپا ەلدەرىندە كەيىنگى كەزدە جاپپاي نارازىلىق اكتسيالارى ءوتىپ جاتىر.

ايتسە دە، وڭتۇستىك كورەيانىڭ تۇيتكىلدەرى ەكونوميكالىق قيىندىقتان شىعار كەزدە مەملەكەتتىڭ كەمشىلىكتەرىن كورسەتىپ بەردى. اسىرەسە، قۇرىلىمدىق وزگەرىس كەزىندە قاتتى بايقالادى.

وڭتۇستىككوريالىقتارعا قازىرگى ەكونوميكالىق احۋال وڭايعا سوقپايدى. ەل ەكونوميكاسى 1960-ءشى جىلدارداعى كەدەيشىلىكتەن قۇتىلىپ، الەمدەگى الپاۋىت ونەركاسىپكە يە مەملەكەت اتاندى. سمارتفوندار مەن تەلەۆيزور جاساۋ بويىنشا جاھاندىق نارىقتىڭ نەگىزگى كۇشىنە اينالدى.

اۆتوبولشەكتەر جاسايتىن كومپانيانىڭ نەگىزىن قالاۋشى سەيۋنگ مۋن تومەنگى جالاقى مولشەرىن جوعارىلاتۋعا رازى ەمەس. تيم فرانكو، «نيۋ-يورك تايمس»

وڭتۇستىك كورەيانىڭ جان باسىنا شاققانداعى ىشكى جالپى ءونىم كولەمى (30 000 دوللار) شامامەن يتاليا جانە يسپانيامەن تەڭ. سونداي-اق 51 ميلليون حالىقتى اسىراپ وتىرعان مەملەكەت ءوسىمنىڭ باياۋلاۋى، قارتايۋ جانە قىتايمەن باسەكەلەستىك سەكىلدى دامىعان ەلدەر كەزدەسەتىن قيىندىقتارعا تاپ كەلىپ وتىر.

2017 جىلعى مامىرداعى سايلاۋدان كەيىن مۋن مىرزا ەكونوميكالىق ساياساتىن كۇرت وزگەرتتى. ول جالاقىنىڭ ءوسۋىن، جۇمىس ۋاقىتىنا قويىلاتىن تالاپتى كۇشەيتۋدى، الەۋمەتتىك ماسەلەگە بولىنەتىن قارجىنى ۇلعايتۋدى كوزدەيدى. ەسەسىنە، كومپانيالار مەن تابىسى كوپتەرگە سالىناتىن سالىق كولەمى ءوستى.

مۋن مىرزا ەلدەگى قاراپايىم وتباسى تابىسىن ۇلعايتۋدى كوزدەيدى. ونىڭ ماقساتى – تۇرعىنداردىڭ ساتىپ الۋ قابىلەتىن ۇلعايتۋ ارقىلى ەكسپورتقا تاۋەلدىلىكتى ازايتىپ، جاھاندىق ەكونوميكانىڭ تيگىزەر اسەرىن تومەندەتۋ.

بىلتىر تامىزدا تومەنگى جالاقى مولشەرى قابىلدانعاننان كەيىن جۇمىسسىزدىق دەڭگەيى سەگىز جىلدا بولماعان دەڭگەيگە جەتىپ، 4،2 پايىزدى قۇرايدى. الايدا قازىر بۇل كورسەتكىش جاقسارىپ كەلەدى. ءوسىم كولەمى ءۇشىنشى توقساندا الدىڭعى جىلمەن سالىستىرعاندا 2 پايىزعا وسكەن. بىراق ەكىنشى توقساندا ءوسىم 2،8 پايىزدى قۇراعان ەدى.

ەڭ ۇلكەن قيىندىق شاعىن كاسىپكەرلىككە ءتۇسىپ وتىر. 2017 جىلى شاعىن بيزنەس وكىلدەرى اراسىندا جۇرگىزىلگەن ساۋالنامادا ولاردىڭ 42 پايىزى جالاقى وسكەندىكتەن جۇمىسشىلارىن قىسقارتقانىن مالىمدەگەن.

الايدا كەيبىر ۇيىمداردىڭ باسشىلارى تومەنگى جالاقى بىردەن وسپەگەنىن ايتىپ وتىر. وسىعان بايلانىستى بىلتىر 21 قاراشادا 160 000 قىزمەتكەر نارازىلىققا شىقتى.

«ۇكىمەتتەن كۇتەرىمىز كوپ. بىراق قازىرگى تاڭدا ولار بۇعان دەيىن ۇستانعان ساياساتىنان باس تارتىپ، كەرى شارالار قابىلداي باستاۋى ىقتيمال» دەيدى ساۋدا ۇيىمى بويىنشا كورەيا كونفەدەراتسياسىنىڭ وكىلى لي دجو-حو.

مۋن مىرزا ۇستانعان باعىتىن جۇزەگە اسىرۋ بارىسىندا ساياسي تۇرعىدا ۇتىلدى. Gallup ساۋالناماسىنىڭ دەرەكتەرى بويىنشا، ونى قولدايتىندار سانى 2017 جىلعى 84 پايىزدىق كورسەتكىشتەن 45 پايىزعا دەيىن ءتۇسىپ كەتكەن.

ال سەيۋنگ مۋن ەل پرەزيدەنتىن كورەيالىق كاسىپكەرلەر كەزدەسىپ وتىرعان تۇيتكىلدى شەشىپ، تەپە-تەڭدىك ۇستاۋعا شاقىرادى. «مەنىڭ ايتارىم اسىقپاۋ كەرەك»، دەيدى ول.

سوڭعى جاڭالىقتار

تەاتردىڭ ونلاين تارتۋى

رۋحانيات • كەشە

ءۇي جانۋارىنان ۆيرۋس جۇعا ما؟

كوروناۆيرۋس • كەشە

ۇقساس جاڭالىقتار