بۇل جوباعا بىلتىر شىعىس قازاقستان جاستارى تاراپىنان اۋەلى 473 ءوتىنىم ءتۇسىپ, اقىر سوڭىندا سونىڭ 149-ى كادەگە جاراپتى. بۇگىن وسكەمەندەگى د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىندە وتكەن ايماقتىق جاستار فورۋمىندا وسى جوبانىڭ قورىتىندىسى ششىعارىلدى. فورۋم باستالماس بۇرىن شاراعا كەلگەن جۇرت دالىزدەگى كورمە ارقىلى جوبا اياسىندا جۇزەگە اسىرىلعان جۇمىستارمەن تانىستى. وبلىستىق ىشكى ساياسات باسقارماسى باسشىسىنىڭ ورىنباسارى ايدار سادىرباەۆ, «نۇر وتان» پارتياسى وبلىستىق فيليالى توراعاسىنىڭ ورىنباسارى ولەگ چۋگۋنكوۆ پەن وبلىستىق جاستار رەسۋرستىق ورتالىعىنىڭ ديرەكتورى ارايلىم ەسىمبەكقىزى ءار جوباعا قىزىعۋشىلىق تانىتىپ, جاستارمەن پىكىرلەستى. ءوزىمىز دە تاڭعالدىق. جاستاردىڭ جوبالارى بىرىنەن ءبىرى وتەدى. سەمەيلىك جاس جىگىت 60 انانى بالاعا ماسساج جاساۋعا ۇيرەتىپ, وقىتىپ, قولدارىنا سەرتيفيكات بەرىپتى.
زايسان قالاسىندا «وتباسىندا زورلىق-زومبىلىققا جول جوق» جوباسى ارقىلى 300 ايەل ادامعا پسيحولوگيالىق-قۇقىقتىق كومەك كورسەتىلىپتى. اياجان اتتى بويجەتكەن گلۋبوكوە اۋدانىندا 50 زەينەتكەردى كومپيۋتەرلىك ساۋاتتىلىققا ۇيرەتىپتى. زايسان اۋدانى قارابۇلاق اۋىلىنىڭ ءبىر بوزبالاسى اكىمدىك بەرگەن ءتىزىم بويىنشا الەۋمەتتىك از قامتىلعان وتباسىلاردىڭ اياق كيىمدەرىن جوندەپ بەرىپتى. التاي قالاسىندا ءبىر جىگىت ءوزىنىڭ جوباسى اياسىندا مۇگەدەك جانداردىڭ كولىكتەرىن تەگىن جوندەپ, العىستارىنا بولەنىپتى. اسپەتتەپ, تاڭعالىپ وتىرعانىمىز, جاستار وسىنداي ساۋاپتى ىستەرى ءۇشىن ءبىر تيىن دا اقشا الماپتى. جوبانىڭ ماقساتى دا وسى ەكەن. «جوبانىڭ ناتيجەسىندە وبلىسىمىزدا ءسۇت جانە ەت ونىمدەرىن ءوندىرۋ بويىنشا 37 جوبا قولعا الىنىپ, 10 سپورت ۇيىرمەسى, 21 تىلدەردى جانە كومپيۋتەردى ۇيرەتۋ كۋرسى, 14 ۆولونتەرلىك جوبا, 8 ناۋبايحانا, 7 شاشتاراز بەن سۇلۋلىق سالونى, 4 اتەلە, بالاردى دامىتۋ ۇيىرمەسى, 3 كىشى قۇس فەرماسى, ومارتا, دىبىس جازۋ ستۋدياسى, پوليگرافيا جانە كوررەكتسيالاۋ سىنىبى, يپپوتەراپيا كۋرسى, اياق كيىم شەبەرحاناسى اشىلدى. اي سايىن وزدەرىنىڭ جوبالارى اياسىندا 491 قاتىسۋشى مىڭداعان شىعىسقازاقستاندىقتارعا تەگىن قىزمەت كورسەتىپ كەلەدى. بالكىم بىرەۋگە بۇل جاي عانا قاراپايىم ساندار بولىپ كورىنەتىن شىعار. بىراق ونىڭ ارتىندا تەك وزىنە عانا ەمەس, قورشاعان ورتاعا كومەك كورسەتۋدى ارمانداعان جاستاردىڭ جەڭىستەرى تۇر. ءبىز وسى جاستارعا جوبا كەزەڭىندە يگەرگەن بىلىمدەرى دارا تۇلعا رەتىندە دامۋىنا, كومەككە ءزارۋ ادامدارعا پايداسىن اكەلۋگە, قارجىلاندىرۋ اياقتالعان سوڭ جوبانى جالعاستىرۋعا كومەكتەسەدى دەگەن سەنىمدەمىز», - دەيدى اتالمىش جوبانىڭ شىعىس قازاقستان وبلىسى بويىنشا ايماقتىق ۇيلەستىرۋشى سەرىك ءجۇنىسوۆ.
جوبا شەڭبەرىندە شىعىس قازاقستاننىڭ جاستارىنا 260 ميلليون تەڭگەدەن استام قارجى ءبولىنىپتى, ونىڭ 130 ميلليونى گرانتتاردى قارجىلاندىرۋعا, 135 ميلليونى ستيپەنديا تولەۋگە جۇمسالىپتى. جوبانى جاستارعا جەتكىزۋ ءۇشىن كونسۋلتانتتار 4594 ءۇيدى ارالاپ, جيىنى 1631 اداممەن 88 اقپاراتتىق كەزدەسۋ وتكىزىپتى.
ازامات قاسىم,
«Egemen Qazaqstan»
وسكەمەن
سۋرەت ناسيما قورعانبەكوۆانىڭ فەيسبۋكتەگى پاراقشاسىنان الىندى
