جايىق جاعاسىنان ارمان قاناتىندا الماتىعا اتتانىپ, ءدۇلدۇل دومبىراشى دارەجەسىنە دەيىن جەتكەن قارشىعا احمەدياروۆ حالىق ءارتىسى, مەملەكەتتىك سىيلىقتىڭ يەگەرى, داۋلەسكەر كۇيشى, كومپوزيتور عانا ەمەس, تالانتتى شاكىرتتەردىڭ تالىمگەرى اتانعان ۇلاعاتتى ۇستاز بولدى. ەسكەرتكىش جانىنا جينالعان جەرلەستەرى ءبىرتۋار ونەر يەسىنىڭ دارا قاسيەتتەرى, ادامدىعى مەن ادالدىعى تۋرالى ءسوز ءوربىتىپ, ەسكە الدى.
بەس جاسىندا قولىنا العان قازاقتىڭ قاسيەتتى دومبىراسى ومىرلىك سەرىگى بولدى. قارشىعا احمەدياروۆ بەلگىلى كۇيشىلەردىڭ شىعارمالارىن ورىنداپ قانا قويعان جوق, ءوزى دە 60-تان استام كۇي شىعاردى. تالانتتى جاستاردىڭ تالابىن وڭداعان, ۇلتتىق سانانىڭ قالىپتاسۋىنا ۇلكەن ەڭبەك سىڭىرگەن ونەر قايراتكەرى رەتىندە قارشىعا احمەديار ۇلىنىڭ ەسىمى قۇرمەتپەن اتالادى,-دەدى ەسكەرتكىشتىڭ اشىلۋ سالتاناتىندا وبلىس اكىمى نۇرلان نوعاەۆ.
دومبىراسىن قولىنا الىپ تۇعىرعا قونعان كۇيشى ەسكەرتكىشى – قر مادەنيەت قايراتكەرى, ءمۇسىنشى ەدىگە راحماديەۆتىڭ جۇمىسى. «قازاقستان» قوناق ءۇيىنىڭ جانىنان ورىن العان ەسكەرتكىشتىڭ بيىكتىگى 3,5 مەتر.
قاي ونەر ادامى ءۇشىن دە تۋعان جەردىڭ قۇرمەتى بارىنەن بيىك. دۇنيە ءجۇزىنىڭ ساحنالارىندا قازاقتىڭ كۇيىن كۇمبىرلەتىپ, عاجاپ ورىنداۋشىلىق شەبەرلىگىمەن ءتانتى ەتكەن ءدۇلدۇل دومبىراشى قارشىعا احمەدياروۆ تۋرالى فاريزا وڭعارسىنوۆا: «كەتپەسە قانى اۋىسىپ, كۇي سازىن حان, قازى دا تىڭدار, ءسىرا! قاناتى كوك اسپاندى دارا قۇشىپ, سامعاسىن كۇي-قارشىعا!», دەپ جىرلاعان ەدى. پوەزيا پاديشاسىنىڭ اتىراۋداعى ەسكەرتكىشىنە قارسى كوشەدەن ورىن العان كۇي پاديشاحىنىڭ قولا بەينەسى ەكى الىپتىڭ تۋعان جەر قۇشاعىنداعى ماڭگىلىك ءومىرىنىڭ كورىنىسى ىسپەتتى اسەر قالدىرادى.
باقىتگۇل باباش,
«Egemen Qazaqstan»
اتىراۋ
