«جامبىل وبلىسىنىڭ ءتۋريزمى – وڭىرارالىق جەكە شەكارا ىنتىماقتاستىعى سالاسىندا ۇلكەن الەۋەتكە يە. سوندىقتان دا بۇل سالانى دامىتۋدا بار مۇمكىندىكتەر قاراستىرىلۋدا. اتالعان باسقارمادا وتكەن جىلى وڭىرلەردى دامىتۋ باعدارلاماسى اياسىندا جەتى نىسانالى ينديكاتور بەكىتىلگەن. مەجەلەنگەن مىندەتتەردىڭ قاتارىندا ىشكى تۋريزم بويىنشا قىزمەت كورسەتىلەتىن كەلۋشىلەر سانىن ارتتىرۋ. ەكىنشى, ءتۋريزمدى دامىتۋ باعىتىندا سىرتتان كەلەتىن تۋريستەر سانىن كوبەيتۋ جانە تۋريستەرگە ۇسىنىلعان قوناق ۇيلەر مەن سەرۆيستىك قىزمەت ساپاسىن ارتتىرۋ», دەيدى باسقارما باسشىسى.
سونىمەن قاتار, قارلىعاش ارالبەكوۆا ءوز سوزىندە تۋريزم سالاسىندا وتكەن جىلدىڭ توعىز ايىنىڭ كورسەتكىشى بويىنشا اتالعان ينديكاتورلار تاراز قالاسى, ت.رىسقۇلوۆ جانە مەركى اۋداندارىندا تولىق ورىندالماعانىن جەتكىزدى. ناقتى ايتقاندا, اتالعان ايماقتاردا قوناق ۇيلەردىڭ جوقتىعى مەن كەلۋشىلەرگە دۇرىس قىزمەت كورسەتىلمەۋى دە ايتىلدى. بۇل رەتتە جاۋاپتى ماماندار كەتكەن كەمشىلىكتەردى قولعا الىپ, جۇمىس جاسايمىز دەپ سەندىردى.
باسقارما باسشىسىنىڭ ايتۋىنشا, تۋريزم سالاسىنا قاتىستى وزەكتى ماسەلەنىڭ تاعى ءبىرى ايماقتا تاريحي-مادەني ورىنداردىڭ دەنى رەسپۋبليكالىق دەڭگەيدەگى نىساندار قاتارىنا ەنگىزىلگەن. بۇگىنگى تاڭدا وڭىردەگى «ايشا ءبيبى», «قاراحان» كەسەنەسى, «اقىرتاس» كەشەنى كەلۋشىلەرگە اقىلى تۇردە قىزمەت كورسەتكەنىمەن دە, ونداعى سەرۆيستىك قىزمەت ساپاسى كوپشىلىك كوڭىلىنەن شىعا بەرمەيدى. ال, بۇل قاسيەتتى ورىندار رەسپۋبليكا بيۋدجەتىنە قاراعاندىقتان, ولارعا جەرگىلىكتى بيۋدجەتتەن قارجى بولىنبەيدى. ال, جامبىل وبلىسىنىڭ اكىمى اسقار مىرزاحمەتوۆ بۇل ماسەلەنى شەشۋ كەرەك ەكەنىن ايتقان بولاتىن.
سونىمەن قاتار, اعىمداعى جىلى تۋريزم سالاسىن كەشەندى دامىتۋ باعدارلاماسى اياسىندا قۇنى 7,401 ميلليارد تەڭگە بولاتىن 30 جوبا قولعا الىنباق. ونىڭ بۇگىندە جەتەۋى دايىن ەكەن. «باتىس ەۋروپا – باتىس قىتاي» اۆتوجولى بويىندا تۋريستەرگە ارنالعان جول بويىنداعى سەرۆيستىك كەشەندەردىڭ ۇلتتىق ستاندارتتارعا سايكەستەندىرۋ بويىنشا دا جۇمىستار قولعا الىناتىن بولادى.
حاميت ەسامان,
«Egemen Qazagstan»
جامبىل وبلىسى
