ءباسپاسوز قىزمەتىنىڭ مالىمەتىنشە, ج.ماسسنەنىڭ مۋزىكاسىنا قويىلعان XX عاسىردىڭ كورنەكتى حورەوگرافى ك.ماكميللاننىڭ ەرەكشە كورىنىستى «مانون» بالەتى «استانا وپەرا» تەاترىندا ورىن العان پرەمەراسىنان باستاپ-اق كورەرمەندەردىڭ ىستىق ىقىلاسىنا بولەندى. «قازىر قارقىندى دايىندىق جۇمىستارى جۇرگىزىلۋدە, سوليستەرمەن ۇساق-تۇيەك جايتتاردىڭ ءبارىن قوسا تولىققاندى جۇمىس جاساۋدامىز.
«مانون» بالەتىندە وتە نازىك, بىراق ەرەكشە ماڭىزدى دۇنيەلەر كوپ. «استانا وپەرانىڭ» بالەت ترۋپپاسى وتە مىقتى. بۇعان دەيىن بىرگە ارىپتەس بولعان ادامدارمەن جۇمىس جاساۋ وتە كەرەمەت, سەبەبى ارامىزدا مەنىڭ وتكەن جولعى جۇمىس بارىسىمدا ورىن العان ءوزارا تۇسىنىستىگىمىز بار. باستى پارتيالاردى ەكى جىل بۇرىن ورىنداعان سوليستەر ازىرلەپ جاتىر, قايتا ورالعان كەزىمدە ءبىرشاما ەسەيگەن ءارى تاجىريبە جيناقتاعان ارتىستەرمەن كەزدەسۋ قانداي كەرەمەت ەدى. قازىر ولار ءوز رولدەرىن ورىنداۋدا ءبىراز كەمەلدىككە جەتكەن», – دەيدى قويۋشى-بالەتمەيستەر كارل بيورنەتت. ەسكە سالار بولساق, كەننەت ماكميللان بالەتكە ارنالعان ليبرەتتونى اببات پرەۆونىڭ «كاۆالەر دە گريە مەن مانون لەسكونىڭ وقيعاسى» رومانىنىڭ جەلىسى بويىنشا جازعان. وركەسترگە لايىقتاپ, ارانجيروۆكاسىن جاساعان – مارتين يەتس. دەكوراتسيالار جانە كوستيۋمدەر بويىنشا سۋرەتشى – نيكولاس گەورگياديس. «استانا وپەرا» ساحناسىندا قويىلىمدى جۇزەگە اسىرعان بالەتمەيستەرلەر كارل بيورنەتت, پاتريسيا رۋانن.
دەكوراتسيالار بويىنشا ۇيلەستىرۋشى – چينتسيا لو فاتسيو, كوستيۋمدەر بويىنشا ۇيلەستىرۋشىلەر – ناتاليا ستيۋارت, اراسەل دوسمۇراتوۆا, جارىق بويىنشا سۋرەتشى – ياكوپو پانتاني. «استانا وپەرا» سيمفونيالىق وركەسترى قويۋشى ديريجەر ارمان ورازعاليەۆتىڭ جەتەكشىلىگىمەن ونەر كورسەتەدى. 30 قاڭتار كۇنى مانون پارتياسىن قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا ورىندايدى, كاۆالەر دە گريە – ولجاس تارلانوۆ. لەسكو – ارمان ورازوۆ, لەسكونىڭ كوڭىلدەسى – قازاقستاننىڭ ەڭبەك سىڭىرگەن قايراتكەرى انەل رۇستەموۆا. گ.م. مىرزا – جانىبەك يمانقۇلوۆ, قارت مىرزا – رۋسلان تەمىربەكوۆ, قاراۋىل باسشىسى – ولجاس ماحانبەتاليەۆ, مادام – التىناي قاعازباەۆا, كەدەيلەردى باستاۋشى – بەيبارىس اقارىس. «استانا وپەرا» بالەت ترۋپپاسىنىڭ كوركەمدىك جەتەكشىسى – رەسەيدىڭ حالىق ءارتىسى التىناي اسىلمۇراتوۆا. سپەكتاكلدىڭ باستالۋى ساعات 19:00-دە.
