اۋليەاتا ءوڭىرىنىڭ مادەنيەتىن دامىتۋ ماقساتىندا وسى ۋاقىتقا دەيىن اۋىلدىق جەرلەردەگى مادەنيەت نىساندارىنىڭ جۇمىسىن جۇيەلەندىرۋ, ارحيۆتەردى تسيفرلاندىرۋ, اقپاراتتىق ورتالىق قۇرۋ, بۇدان وزگە وبلىستا وتەتىن مادەني كوپشىلىك ءىس-شارالاردىڭ ماڭىزدىلىعىن ارتتىرۋ سەكىلدى جۇمىستار اتقارىلعان بولاتىن. ءوڭىر مادەنيەتىن دامىتۋ ماقساتىندا جامبىل وبلىسىنىڭ اكىمى اسقار مىرزاحمەتوۆتىڭ قاتىسۋىمەن وتكەن جيىندا وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ مىندەتتەلگەن مەجەلەردىڭ كورسەتكىشتەرىنە توقتالدى. ونىڭ ايتۋىنشا, وبلىس اكىمى مەن اۋدان اكىمدەرى, باسقارما مەن اۋدان اكىمدەرى اراسىنداعى ناقتىلانعان مەجەلى ينديكاتورلاردىڭ ارقاسىندا سالاداعى جۇمىستار جۇيەلەنىپ, وڭ ناتيجەلەر بەرە باستاعان.
ماسەلەن, وبلىس اكىمىنىڭ تاپسىرماسىنا سايكەس بىلتىر اۋدانداردا 71 تسيفرلاندىرىلعان اقپاراتتىق ورتالىق اشىلعان بولاتىن. بۇل نەگىزىنەن اۋىل تۇرعىندارىنىڭ يگىلىگىنە ارنالعانىن ايتا كەتۋ كەرەك. اۋىلدىقتار ورتالىق ارقىلى بۇگىندە «www.egov.kz» پورتالىمەن 6 ءتۇرلى مەملەكەتتىك قىزمەتتى الۋدا. سونداي-اق, بىلتىر بىرقاتار جاستاردىڭ باس قوساتىن پىكىرتالاس الاڭدارى – كوۆوركينگ ورتالىقتارى دا ەل يگىلىنە بەرىلگەن. وڭىردەگى كىتاپحانالار ءموبيلدى ستاندارتقا كوشىرىلىپ, «قاسيەتتى تاراز» سايتى ءوز جۇمىسىن باستاعان.
باسقارما باسشىسى ءوز سوزىندە وتكەن جىلى وڭىردە ءالجان انا مۋزەيى, جۋالى اۋداندىق تاريحي-ولكەتانۋ مۋزەيى مەن «جەلتوقسان, 86» ورتالىقتارىنىڭ اشىلعانىن جەتكىزدى. شىعارماشىلىق سالاسىندا دا جۇمىستار بار دەگەن باسقارما باسشىسى وڭىردەگى ونەر ۇجىمدارىنىڭ شەتەلدەرمەن مادەني بايلانىسى نىعايا تۇسكەنىن ايتىپ ءوتتى.
جيىندا اعىمداعى جىلعا ارنالعان جوسپارلى شارالار دا ايتىلدى. بيىل جامبىل وبلىسىنىڭ 80 جىلدىق مەرەيتويى دەسەك, باسقارما بۇل ورايدا ولكە شەجىرەسىنەن سىر شەرتەتىن كوپتومدىق كىتاپتىڭ العاشقى 80 تومىن جارىققا شىعارۋدى كوزدەپ وتىر. بۇدان بولەك, اۋقىمدى 7 مادەني شارا وتەدى دەپ كۇتىلۋدە. سونىڭ ءبىرى بىلتىر باستاۋ العان «جامبىل – مەنىڭ جاي اتىم, حالىق – مەنىڭ شىن اتىم» اتتى رەسپۋبليكالىق اقىندار ايتىسى. قازىرگى تاڭدا رەسپۋبليكالىق ايتىستىڭ اۋداندىق, وبلىستىق ىرىكتەۋلەرى ءوتىپ, وعان وڭىرىمىزدەگى 100-دەن استام تالانتتار قاتىسىپ, باق سىناۋدا.
اتقارىلعان شارۋالار از ەمەس, الايدا, تۇيتكىلدى ماسەلەلەر دە بار بولىپ شىقتى. ماسەلەن, وڭىردە ونەر مەكتەبىن اشۋ تۋرالى ۇسىنىس ءالى بەرىلمەگەن. 26 ەلدى مەكەنگە كلۋب قاجەت دەسەك, ءتيىستى شارالار اۋدان اكىمدەرى تاراپىنان سىلبىر اتقارىلۋدا ەكەن. قورداي مەن شۋ اۋداندارىنداعى مەملەكەتتىك ارحيۆتەرى عيماراتتارىنىڭ جاي-كۇيى دە نازارعا الىندى. ال, تاراز قالاسىنداعى شوقان ءۋاليحانوۆ اتىنداعى وبلىستىق امبەباپ-عىلىمي كىتاپحاناسى عيماراتىنىڭ سىرتىنا جوندەۋ جۇمىستارىنىڭ قاجەتتىگى دە ءسوز بولدى.
حاميت ەسامان,
«Egemen Qazaqstan»
جامبىل وبلىسى
