جاقىندا ىلە اۋداندىق سوتىندا جابىرلەنۋشى مۇعالىمنىڭ ارىزىنا وراي قوزعالعان قىلمىستىق ءىس بويىنشا سوت شەشىمى شىقتى. جالپى, جىلعا جۋىق ۋاقىت بويى تەرگەلىپ, سوتقا دەيىنگى انىقتاۋ شاراسىنا بىرنەشە رەت قورعاۋشى تاراپىنان نارازىلىق جاسالىپ, پروكۋراتۋرانىڭ ارالاسۋىمەن اياقتالعان ءىس سوت بارىسىندا دا ۇزاق قارالدى. وتكەن اپتادا اياقتالعان سوت وتىرىسىندا سۋديا ەركىن سەيىتوۆ «قىلمىستىق كودەكستىڭ» 107-بابىنىڭ 1-ءبولىمى بويىنشا قىلمىس جاساعان ميتروشەنكو نادەجدا پاۆلوۆانى ايىپتى دەپ تاۋىپ, وعان 250 ساعات كولەمىندە قوعامدىق جۇمىستارعا تارتۋ جازاسىن تاعايىندادى.
سوت وتىرىسىنان كەيىن جۋرناليستەرمەن كەزدەسكەن گۇلزيرا بايدىلداەۆا ىلە اۋداندىق سوتىنىڭ سۋدياسى ەركىن سەيىتوۆتىڭ شىعارعان ۇكىمىمەن كەلىسپەيتىنىن ايتىپ, جوعارى ادىلەت ينستانتسياسىنا اپپەلياتسيالىق شاعىم تۇسىرەتىن حابارلادى.
- سوققى سالدارىنان ميىم شايقالىپ, ەستۋ قابىلەتىم تومەندەدى. ادەتتە مۇنداي قىلمىس ءۇشىن 5 ءتۇرلى جازا بار ەكەن. 2,5 ميلليون تەڭگەگە دەيىن ايىپپۇل سالۋ, 600 ساعاتتان اسپايتىن جۇمىسقا تارتۋ, 2 جىلعا بوستاندىعىن شەكتەۋ نەمەسە ايىرۋ جازاسى. نەگىزى ميتروشەنكونىڭ وڭاي جازامەن قۇتىلاتىنى ءبىر جىل بويى ءىستى قايتا-قايتا توقتاتۋ امالدارىنىڭ كەزىندە-اق تۇسىنىكتى بولىپ ەدى. بىراق ءبىز سوندا دا پروكۋرور بولسىن, تەرگەۋشى بولسىن, تىنباستان ەسىكتەرىن قاعىپ ءجۇرىپ, ءىستى وسى كۇنگە جەتكىزگەن بولاتىنبىز. جالپى, وسى مۇعالىمدەردى, ۇستاز دەگەن ۇلى ەسىمدى بولاشاقتا وسىنداي اتا-انالار تاراپىنان قورلاۋ وقيعاسىن بولدىرماۋ ماقساتىندا العان بەتىمىزدەن قايتپاعان ەدىك. سوندىقتان بۇل مەن ءۇشىن وتە ادىلەتسىز شەشىم, - دەيدى گۇلزيرا.
ال سوت وتىرىسىندا ءوز ايىبىن مويىنداعان اتا-انا نادەجدا ميتروشەنكو اشۋ ۇستىندە جاساعان ارەكەتى ءۇشىن گۇلزيرا بايدىلداەۆادان جانە بۇكىل ۇستازدار قاۋىمىنان كەشىرىم سۇرادى. سونداي-اق, ايىپكەر جابىرلەنۋشى تاراپقا 100 000 تەڭگە كولەمىندە مورالدىق وتەماقى تولەيتىن بولدى.
وسىلايشا جىلعا جۋىق ۋاقىت بويى ەلدى ەلەڭدەتكەن مۇعالىمدى جابىرلەگەن اتا-انا ىسىنە نۇكتە قويىلعان سىڭايلى. بىراق, 15 كۇن ىشىندە تالاپ ارىز بەرۋ ارقىلى وبلىستىق سوتقا جۇگىنەتىن جابىرلەنۋشى تاراپ ادىلەت ورناپ, اۋداندىق سوت شەشىمىنىڭ كۇشى جويىلادى دەگەن ۇمىتتە.
قالماحانبەت مۇقامەتقالي,
«Egemen Qazaqstan»
الماتى وبلىسى
