جوعارى سىنىپ وقۋشىلارى, كوللەدج ستۋدەنتتەرى, ۇكىمەتتىك ەمەس ۇيىمدار , مەملەكەتتىك ورگاندار وكىلدەرىنىڭ قاتىسۋىمەن وتكەن باسقوسۋدا ايماق باسشىسىنىڭ ورىنباسارى ماديار قوجاحمەت ەلباسى «جاستار جىلىنىڭ» اشىلۋ سالتاناتىندا سويلەگەن سوزىندە سالاماتتى ءومىر ءسۇرۋ سالتىنا زور ماڭىز بەرگەنىن,ءتالىم-تاربيە سالاسى بويىنشا بىرقاتار مىندەتتەر قويعانىن اتاپ ءوتتى. «ەسىرتكىسىز بولاشاق» اكتسياسى جان-جاقتى قولداۋ تاباتىنىنا سەنىم ءبىلدىردى.
جينالعاندار نازارىنا ەسىرتكى بيزنەسىنە قارسى كۇرەس باسقارماسىنىڭ تاپسىرماسىمەن تۇسىرىلگەن «تۇزدار جانە سپايستار. قۇردىمعا اپارار جول» اتتى بەينەفيلم ۇسىنىلدى. وندا ەسىرتكىگە تاۋەلدى بولعان بالانىڭ اناسىنىڭ ايانىشتى تاعدىرى, دارمەنسىزدىگى ۇلكەن وي تاسايدى.
پوليتسيا دەپارتامەنتى ازىرلەگەن ۆەدوموستۆوارالىق باعدارلاما ماڭىزدىلىعىمەن, ومىرشەڭدىگىمەن ەرەكشەلەندى.
«وسىدان ءۇش جىل بۇرىن وڭىردە سينتەتيكالىق ەسىرتكى زاتتارى, تۇزدار مەن سپايستار پايدا بولىپ, جاۋىننان كەيىنگى ساڭىراۋقۇلاق قۇساپ قاپتاپ بارادى. وعان توقتاۋ سالماسا, ادام اعزاسىنا زيانى وتە مول حيميالىق قوسپالاردان تۇراتىنى تۇسىندىرىلمەسە جاستاردىڭ ومىرىنە زور قاۋىپ توندىرەدى. سينتەتيكالىق ەسىرتكى زاتتارىنا تاۋەلدى جاندار ءبىر جىلدان ارتىق ءومىر سۇرە المايدى.بىلتىر ونىڭ زاردابىنان 50 سولتۇستىكقازاقستاندىقتىڭ كوز ءجۇمۋى—سوزىمىزدىڭ دالەلى. ولاردىڭ 13-ءى– كامەلەتتىك جاسقا تولماعان بالالار. 263 ادامنىڭ ەسىرتكى تۇتىناتىنى انىقتالدى. ولاردىڭ 52-ءى سينتەتيكالىق زاتتارمەن اۋەستەنەدى. سينتەتيكالىق ەسىرتكى ساتاتىن 60-تان استام سايت جابىلدى»,دەيدى ەسىرتكى بيزنەسىنە قارسى كۇرەس باسقارماسىنىڭ جەتەكشىسى جاندوس باسىباەۆ.
«نادەجدا NORD» قوعامدىق-قايىرىمدىلىق قورىنىڭ توراعاسى ەۆگەني زايانتستىڭ ايتۋىنشا ەسىرتكى زاتتارىن ۇزدىكسىز قولدانۋ پسيحيكالىق اۋىتقۋلارعا, ميدىڭ زاقىمدانۋىنا, قوعامنان الشاقتاپ, قىلمىستىق ارەكەتتەر جاساۋعا سوقتىرادى. جىل وتكەن سايىن ولاردىڭ قاتارى جاسارا تۇسۋدە.
جيىن سوڭىندا جاستار ارنايى دايىندالعان فلەشموبقا قاتىستى. «ەسىرتكىسىز بولاشاق» اتاۋى جازىلعان باننەرگە قولتاڭبالارىن قالدىردى.
وتكەن جىلى ۇيلەردىڭ قابىرعالارىنا, دۋالدارعا ۋلى زاتتاردى ساۋدالايتىن سايتتاردى جارنامالايتىن جازبالاردى قالدىرعان ادامدارعا 75 ايلىق ەسەپتىك كورسەتكىش مولشەرىندە ايىپپۇل سالىنىپتى.
مۇنداي تانىمدىق شارالار اۋدانداردا دا وتكىزىلەتىن بولادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
