بريفينگكە وبلىستىق جۇمىلدىرۋ دايىندىعى باسقارماسىنىڭ باسشىسى اسىلبەك شامەنوۆ, وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ەرجان ابدىقالىقوۆ, وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ, وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسىنىڭ ورىنباسارى ەرلان جولامانوۆ, وبلىستىق مەملەكەتتىك ساۋلەت-قۇرىلىس باقىلاۋى باسقارماسىنىڭ باسشىسى مارسبەك مولداباەۆ قاتىستى.
وتكەن جىل ءوڭىر ەكونوميكاسىنداعى دامۋ تەندەنتسياسى جوعارى بولدى. قۇرىلىس سالاسى قارقىندى دامىدى.
وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ 2018 جىلى وبلىس بويىنشا بارلىق قارجىلاندىرۋ كوزدەرىنەن 1790 پاتەرلى 70 كوپپاتەرلى تۇرعىن ءۇيدىڭ قۇرىلىسى جۇرگىزىلىپ, جىل قورىتىندىسىمەن 1222 پاتەرلى 56 تۇرعىن ءۇي پايدالانۋعا بەرىلگەندىگىن ايتتى. سونداي-اق, وتكەن جىلى وبلىستا ساتىپ الۋ قۇقىعىنسىز جالعا بەرىلەتىن تۇرعىن ۇيلەردىڭ قۇرىلىسىن جۇرگىزۋگە بولىنگەن 4,3 ملرد.تەڭگە تولىعىمەن يگەرىلدى. بۇل قارجىعا 620 پاتەرلى 17 تۇرعىن ءۇيدىڭ قۇرىلىسى جۇرگىزىلىپ, ونىڭ 292 پاتەردى قۇرايتىن 7 تۇرعىن ءۇيى پايدالانۋعا بەرىلدى.
- قازىرگى ۋاقىتقا, قىزىلوردا وبلىسىندا جوندەۋدى قاجەت ەتەتىن كوپقاباتتى تۇرعىن ۇيلەر سانى 629 قۇراپ وتىر. 2011-2015 جىلدارى تۇرعىن ۇيلەردىڭ كۇردەلى جوندەۋ جۇمىستارىنا جۇمسالعان قارجىنىڭ قايتارىمى 59,1 پايىز. قىزىلوردا قالاسىندا قايتارىم قاراجات ەسەبىنەن 359,9 ملن.تەڭگەگە 8 كوپپاتەرلى تۇرعىن ۇيگە كۇردەلى جوندەۋ جۇمىستارى جۇرگىزىلە باستالدى. قازىرگى تاڭدا 7 كوپپاتەرلى تۇرعىن ءۇيدىڭ جوندەۋ جۇمىستارى اياقتالدى. قالعان 1 كوپپاتەرلى تۇرعىن ءۇي وسى جىلعا وتپەلى, - دەدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسىنىڭ ورىنباسارى ەرلان جولامانوۆ.
ەلباسى حالىققا جولداۋىندا قۇرىلىس سالاسىنا مەملەكەتتىك تۇرعىدان باقىلاۋدى كۇشەيتۋدى تاپسىرعان بولاتىن. وسىعان وراي, بۇگىندە «قۇرىلىس تۋرالى» جاڭا زاڭ جوباسى پارلامەنت قاراۋىندا. اتالعان زاڭ قولدانىسقا ەنگەننەن كەيىن ساۋلەت-قۇرىلىس سالاسىنداعى نورماتيۆتەر مەن ەرەجەلەر تۇبەگەيلى وزگەرەتىن بولادى.
باقتيار تايجان,
«Egemen Qazaqstan»
قىزىلوردا وبلىسى
