قولدانىستاعى زاڭنامالاردا «جاس كاسىپكەر», «جاستار كاسىپكەرلىگى» دەگەن ۇعىم بەكىتىلمەگەندىكتەن, مەملەكەت تاراپىنان ولاردى قولداۋ شارالارى دا جۇيەلى جۇرگىزىلمەيدى. سول سەبەپتى «جاس كاسىپكەر», «جاستار كاسىپكەرلىگى» ۇعىمىن زاڭ جۇزىندە ناقتىلاپ, بەكىتىپ, ولارعا قاتىستى مەملەكەتتىك قولداۋدى زاڭنامالىق تۇرعىدان قامتاماسىز ەتۋدى, سونىمەن قاتار جاس كاسىپكەرلەردىڭ رەەسترىن قالىپتاستىرۋدى ۇسىنامىن. وسىلايشا, جاستاردىڭ جەكە ءىس باستاۋىنا, ءوز بەتىنشە جۇمىس ىستەۋىنە, تابىس تابۋىنا جاعداي جاساپ, قوعامعا پايدالى ازامات بولۋىنا جول اشۋ كەرەك.
ەلباسىمىز شاعىن جانە ورتا بيزنەستى دامىتۋ كەرەكتىگىن ۇنەمى ايتىپ كەلەدى. كەشەگى سالتاناتتى جيىندا دا ۇكىمەتكە «بيزنەستىڭ جول كارتاسى-2020» باعدارلاماسىنىڭ اياسىندا جاس كاسىپكەرلەر ءۇشىن قارجىلاي گرانت كولەمىن ەكى ەسەگە ارتتىرۋدى تاپسىردى, ستۋدەنتتەردى دە بيزنەسكە باۋلۋدى ۇسىندى. ەلىمىزدە شاعىن جانە ورتا بيزنەستى دامىتۋعا 3 جىلدىڭ ىشىندە 32 ملرد تەڭگە ءبولۋ ۇلكەن قولداۋ ەكەنى ءسوزسىز. شاعىن كاسىپكەرلىكتى دامىتۋدا جاس كاسىپكەرلەردىڭ مۇمكىندىگى مول. سەبەبى ولار وتە بەلسەندى, ىسكەر, بيزنەستىڭ قىر-سىرى تۋرالى بىلىمدەرى كەمەل. قوعامنىڭ نەگىزگى قوزعاۋشى كۇشىنە اينالۋعا قابىلەتتى. ولارعا دەر شاعىندا قولداۋ جاساپ قولتىعىنان دەمەسە, از جىلدا جاس كاسىپكەرلەردىڭ ءىسى كەڭ قانات جاياتىنىنا سەنىمىم كامىل.
جالپى, بيىلعى جىل جاستار ماسەلەسىنە قاتىستى باسقا دا ماڭىزدى ماسەلەلەر مەن باستامالاردىڭ باستاۋى بولادى دەپ سانايمىن. جاستار ماسەلەسى ءاردايىم وزەكتى بولعانىمەن, بۇرىن كەيبىر دۇنيەلەر كەيىنگە قالدىرىلىپ كەلگەنى جاسىرىن ەمەس. ەندى ءبارى باسقاشا بولۋى كەرەك. ءار سالاداعى ماسەلەلەردى تۇپكىلىكتى شەشەتىن ۇزاق مەرزىمدى ستراتەگيالىق شەشىمدەر قابىلدانسا, كەشەندى شارالار اتقارىلسا دەپ تىلەيمىن جانە وعان ءۇمىت ارتامىن.
جاستارعا نەگىزگى قۇندىلىقتاردى انىقتاپ بەرسەك, وندا الداعى جىلدارى سونىڭ جەمىسىن كورە باستايمىز.
ماقسات قوجامبەك,
قازاقستاننىڭ جاس كاسىپكەرلەرى قاۋىمداستىعىنىڭ توراعاسى
