وبلىسىمىزدىڭ باسقا وڭىرلەردەن ەرەكشەلىگى, «سەرپىن» باعدارلاماسىمەن كەلىپ وقىپ جاتقان جاستار بار. ولار وسىندا تۇراقتاپ قالۋى ءۇشىن تۇرعىن ءۇي بەرۋ ماسەلەسىن كوتەرىپ ءجۇرمىز. اۋدان-قالا اكىمدەرىنە حات تا جازىلدى. جاس ماماندار بارعىسى كەلسە دە, كەيبىر اۋدانداردا ولار تۇراتىن ءۇي جوق. بۇل تۇيتكىلدەر ەندى شەشىمىن تابادى دەپ ويلايمىز.
ەرىكتىلەر جۇمىسى ءبىزدىڭ وبلىستا بۇرىننان جاقسى جولعا قويىلعان. قارتتار ۇيىنە, بالالار ۇيىنە, انالار ۇيىنە ءجيى بارىپ تۇرامىز. ء«ۇمىت» بالالار ءۇيى تۇراقتى تۇردە قامقورلىققا الىنعان. ءبىزدىڭ ەرىكتىلەرىمىز حالىقارالىق ەكسپو كورمەسىنە دە اتسالىستى. بەس جىل بۇرىن قازان قالاسىندا وتكەن ۋنيۆەرسيادادا ءوڭىردىڭ ەرىكتىلەرى ءتورت مەملەكەتتىڭ اراسىندا ۇزدىك اتانعان بولاتىن. بۇل باعىتتاعى جۇمىستاردى ودان ءارى شيراتاتىن بولامىز.
جاستار جىلىنىڭ سالتاناتتى اشىلۋىندا ەلباسىنىڭ ءوزى ەرەكشە توقتالعان جاستاردىڭ اجىراسۋى وڭىرىمىزدە وزەكتى ماسەلەلەردىڭ قاتارىندا. اسىرەسە جاستاردىڭ اجىراسۋى اۋىلدى جەرلەردە بەلەڭ الىپ تۇر. پسيحولوگتاردىڭ جەتكىلىكسىزدىگى, ايەل ادامداردا سىر بولىسەتىن, شەر تارقاتاتىن جانداردىڭ بولماۋى, دەنساۋلىعىنداعى كىنارات – اجىراسۋدىڭ كوپ سەبەپتەرىنىڭ ءبىرى. جاسىراتىنى جوق, قازاقى مەنتاليتەتىمىزگە بايلانىستى اۋىلدى جەرلەردە ايەل قاۋىمىنىڭ كوپشىلىگى دارىگەردىڭ الدىنا بارۋعا ىڭعايسىزدانادى. ۇيالادى. كەيبىر وتباسىلار بالا بولماۋى سەبەپتى اجىراسىپ جاتىر. وسىنىڭ سالدارىنان ءوز-وزىنە قول جۇمساپ جاتقان ادامدار دا بار. سوندىقتان بۇل تاراپتا ءبىزدى اۋقىمدى جۇمىستار كۇتىپ تۇر. وسى ماسەلەمەن كەشەندى تۇردە شۇعىلدانۋ ءۇشىن ارنايى جۇمىس توبىن قۇرىپ, اۋدان-اۋىلداردى ارالايتىن بولامىز. توپ قۇرامىنا ۋنيۆەرسيتەتتەردىڭ پسيحولوگ ماماندارى, دەنساۋلىق ساقتاۋ باسقارماسىنىڭ وكىلدەرى, بىلىكتى دارىگەرلەر – ۋرولوگتار, گينەكولوگتار كىرەدى. جۇمىس توبى ءاربىر اۋىلدىق وكرۋگتەرگە بارىپ, ۇكىمەتتىك ەمەس ۇيىمدارمەن, سونداعى اقساقالدار, انالار القاسىمەن بىرلەسە جۇمىس ىستەيتىن بولادى. قازىر وبلىستىڭ اۋداندارىندا داعدارىس ورتالىقتارى اشىلىپ جاتىر. زايسان اۋدانىندا ايەل ادامدارعا ارنالعان «وتباسىندا زورلىق-زومبىلىققا جول جوق» دەگەن ورتالىق جۇمىسىن باستادى. وسى باعىتتاعى جۇمىستاردى جانداندىرۋ ويىمىزدا بار.
جالپى, وڭىردە جاستار جىلىنا بايلانىستى بىرنەشە باعىتتى قامتيتىن ۇلكەن جۇمىس جوسپارى ازىرلەنىپ جاتىر. ءبىز جاستار جىلىندا الاۋلاتىپ-جالاۋلاتقان, ۇرانداتقان فلەش-موب, فورۋم, اكتسيالاردان گورى جەكە ادامدارعا پايداسى تيەتىن, ناقتى, ادرەستىك جۇمىستاردى قولعا الساق, جۇمىسسىز جۇرگەن جاستاردى قولداساق دەيمىز. ماسەلەن, بىلتىر وبلىسىمىزدا «Zhas project» جوباسىنا جاستارىمىز بەلسەندى قاتىستى. بارلىق اۋىلدارعا بارىپ, كەزدەسۋلەر وتكىزىپ, جەكە بيزنەسىن اشامىن دەگەن جاستارعا قولداۋ كورسەتتىك. جاستار ورتالىعىنىڭ ماماندارى ولاردى اۋداندار مەن قالالارداعى «دامۋ» مەن «اتامەكەننىڭ» فيليالدارىنا قولدارىنان جەتەكتەپ اپارۋعا دايىن. 2018 جىلى «Zhas project» جوباسىنا وڭىردەن 150 جوبا ۇسىنىپ, 300 ميلليون تەڭگە ۇتىپ الدىق. 150 جوباعا 500 جاس قاتىستى. 120 جاس ءوزىنىڭ شاعىن بيزنەسىن اشتى. وسىنداي جاستارعا پايدالى جۇمىستار بيىل دا جالعاسادى.
ارايلىم ەسىمبەكقىزى,
وبلىستىق جاستار رەسۋرستىق ورتالىعىنىڭ ديرەكتورى
وسكەمەن
