جىل باسىنان بەرى پوليتسەيلەرگە ءۇي توناۋ مەن مال ۇرلىعىنا قاتىستى شاعىمدانۋشىلار لەگى ارتقان كورىنەدى. وبالى نە كەرەك, ءتارتىپ ساقشىلارى تاراپىنان جەدەل ارەكەت جاسالىپ جاتىر. ولار جاڭا جىلدان بەرى سۋىق ءجۇرىس پەن ۇرلىقتى كاسىپ ەتكەن بىرنەشە قىلمىستىق توپتى اشكەرەلەگەن. سونداي-اق, بارىمتاعا كەتكەن مالدىڭ باسى تابىلىپ, يەسىنە قايتارىلعانى جايىل دا جاعىمدى حابار بار.
جاقىندا ىلە اۋدانى قاراوي اۋىلىنىڭ تۇرعىنى قوراسىنداعى 13 باس جىلقىنىڭ قولدى بولعانىن ايتىپ, ىشكى ىستەر بولىمىنە شاعىمدانعان ەكەن. ءىز كەسۋشىلەر جەدەل قيمىلداپ, كۇدىكتىنى تاپتى. ول 47 جاستاعى سول اۋىلدىڭ تۇرعىنى بولىپ شىقتى. ۇزاماي جوعالعان جىلقىنىڭ ءىزى شىعىپ, كورشى وبلىس اۋماعىنا اسىپ كەتكەن 13 باس جىلقى ءدىن امان قالپى كەرى قايتارىلدى.
- 16 قاڭتاردا قاروي اۋىلىنىڭ تۇرعىنى ىلە اۋداندىق ىشكى ىستەر باسقارماسىنا 13 باس جىلقىسىنىڭ ۇرلانعانىن ايتىپ, 3 ميلليون 250 مىڭ تەڭگە شىعىن شەككەنى جايىندا ارىز بەرگەن بولاتىن. پوليتسيا تاراپىنان جەدەل ارەكەت جاسالىپ, 20 قاڭتاردا كۇدىكتىنى ۇستادىق. جوعالعان جىلقى تابىلدى. قازىر ول ادامنىڭ ۇستىنەن تەرگەۋ باستالىپ, باسقا دا مال ۇرلىعىنا قاتىسى بار-جوعى تەكسەرىلۋدە, - دەيدى الماتى وبلىستىق ءىىد ءباسپاسوز قىزمەتىنىڭ وكىلى كوبەيحان نۇراحمەت.
قالماحانبەت مۇقامەتقالي,
«Egemen Qazaqstan»
الماتى وبلىسى
