جانكۇيەرلەردىڭ باستاماسىمەن «حالىق ارەنا» كەشەنىن سپورتشىنىڭ ەسىمىنە اۋىستىرۋ تۋرالى ونلاين پەتيتسيا ازىرلەنگەن.
ء«بىز, دەنيس تەننىڭ جانكۇيەرلەرى, دوستارى, ونى جاقسى كورەتىن جاندار الماتى اكىمدىگىنەن الماتى قالاسى قۇلجا تراكت, 2 كوشەسىندە ورنالاسقان حالىق ارەنا مۇز ايدىنىنىڭ اتاۋىن تاۋەلسىز قازاقستان تاريحىندا وليمپيادا ويىندارىنىڭ (2014), الەم چەمپيوناتتارىنىڭ (2013, 2015), ءتورت كونتينەنت چەمپيوناتىنىڭ (2015), قىسقى ۋنيۆەرسيادا, قىسقى ازيا ويىندارىنىڭ مەدالدەرىنە (2017) يە بولعان ءبىرىنشى جانە جالعىز قازاقستاندىق مانەرلەپ سىرعاناۋشى, يسۋ ءتۋرنيرىنىڭ مەدالىن جەڭىپ العان, قازاقستان رەسپۋبليكاسىنىڭ ەڭبەك سىڭىرگەن شەبەرى, الماتىلىق دەنيس تەننىڭ اتىنا اۋىستىرۋ ماسەلەسىن قايتا قاراۋدى سۇرايمىز.
دەنيس تەن قازاقستاندىق مانەرلەپ سىرعاناۋدىڭ بەتكەۇستارى بولدى, ەلىمىزدەگى سپورتتىڭ بۇل ءتۇرىنىڭ نەگىزىن قالاۋشى جانە قازاقستاننىڭ حالىقارالىق سپورت ءيميدجىنىڭ نىعايۋىنا وزىندىك ۇلەسىن قوستى.
دەنيس ءومىرىن ەلىنىڭ ءوسىپ-وركەندەۋىنە ارنادى, شىعارماشىل جاستارعا , جاس سپورتشىلارعا جانە وتانداستارىنا شابىت سىيلادى.
ءبىز, قازاقستان ازاماتتارى قازاسى الەمدى قايعىرتقان كورنەكتى مانەرلەپ سىرعاناۋشىنىڭ ەسىمىن مۇز ايدىنىنا بەرۋدى ءجون سانايمىز جانە ونىڭ ەسىمىن وسىلاي ارداقتاعىمىز كەلەدى», - دەلىنگەن پەتيتسيادا.
بۇگىنگە دەيىن ونلاين پەتيتسياعا 11 مىڭنان اسا ادام قول قويعان.
