ەلباسى قولداۋى ەرەكشە كۇش-جىگەر بەرەدى
جاستار جىلى اشىلدى. قازاقستاننىڭ جاستارى – ەلدىڭ باستى بايلىعى. ەلىمىزدىڭ بولاشاعى دا جاستار, سوندىقتان ولارعا ۇلكەن ءۇمىت ارتىلىپ وتىر. تاۋەلسىزدىك جىلدارىندا كوپ جەتىستىككە قول جەتكىزدىك. مەملەكەتىمىزدىڭ نىعايا تۇسۋىنە بۇرىنعىدان دا مول ۇلەس قوسۋ ءۇشىن جاستار ەندى بۇرىنعىدان دا بەلسەندى بولۋى كەرەك.
بيىل اۋىلداعى جاستاردىڭ كاسىپكەرلىكپەن اينالىسۋىنا ءومىرى مەن جۇمىسىنا قولايلى جاعداي جاسالماق. اۋىل – مەملەكەتتىڭ تىرەگى, ۇلتجاندىلىق پەن رۋحاني كۇشتىڭ قاينار كوزى.
25 جىل بۇرىن قالادان اۋىلعا جۇمىس ىستەۋگە كەلدىم. بارلىعىن جوقتان باستادىم. بىراق ءاردايىم پرەزيدەنتتىڭ قولداۋىن كوردىم, ول اۋىل شارۋاشىلىعىن دامىتۋعا ارنالعان باعدارلامالارى ارقىلى جاستارعا جىگەر بەردى. قازىر مەندە قارقىندى دامىپ كەلە جاتقان شاعىن شارۋا قوجالىعى بار. ءوزىم اگرو جانە اۋىل تۋريزمىمەن دە اينالىسامىن, «قازاقستاننىڭ بولاشاق اگرارشىسى» اتتى جوبانى جۇرگىزەمىن, جاستارعا جاڭا جۇمىس ورىندارىن اشامىن, جاس فەرمەرلەردى دايىندايمىن, قىسقاسى, اۋىل جاستارىمەن جۇمىس ىستەيمىن. «Open World» باعدارلاماسى بويىنشا اقش-تا وقىپ كەلدىم. «جاستارعا جاسالعان» تاۋارلار مەن قىزمەتتەردى ساتۋ ورتالىعىن قۇردىم.
2018 جىلى قازاقستان حالقى اسسامبلەياسىنىڭ سەسسياسىندا ەلباسىمەن كەزدەستىم. سوندا سويلەگەن ءسوزىم, ايتقاندارىم مەملەكەت باسشىسىنىڭ ىقىلاسىنا يە بولدى. بۇل ماعان جىگەر بەردى. مىنە, ەندى پرەزيدەنت قىزمەتتىڭ ءتۇرلى سالاسىندا بارلىق قازاقستان جاستارىنا قولداۋ كورسەتىلەتىنىن ايتىپ وتىر. ەلباسى اگرارلىق سەكتورعا ايرىقشا كوڭىل ءبولىپ كەلەدى. ءبىزدىڭ دە ايتار العىسىمىز مول!
جاستار جىلى – جاستاردىڭ ءوزىن دامىتۋىنا ۇلكەن مۇمكىندىك. ەلىمىزدىڭ بارلىق جاستارىنا تەك ساتتىلىك تىلەيمىن!
دميتري كورەپانوۆ,
فەرمەر, اۋداندىق ءماسليحاتتىڭ دەپۋتاتى
پاۆلودار وبلىسى, پاۆلودار اۋدانى
جاڭاشا ويلايتىن جاس بۋىن ءوسىپ كەلەدى
مەملەكەت باسشىسى نۇرسۇلتان نازارباەۆ جاستار جىلىن رەسمي تۇردە اشتى. قاراعاندى مەديتسينا ۋنيۆەرسيتەتىنىڭ قىزمەتكەرى جانە قازاقستان حالقى اسسامبلەياسىنىڭ «جاڭعىرۋ جولى» جاستار رەسپۋبليكالىق قوزعالىسى قاراعاندى وڭىرلىك شتابىنىڭ باسشىسى رەتىندە ماعان ەندى جاستارمەن جۇمىس ىستەۋگە كەڭ مۇمكىندىك تۋادى عوي دەپ ويلايمىن.
پرەزيدەنتتىڭ فورۋم بارىسىندا ايتقان باستامالارى مەن تاپسىرمالارى قازاقستاننىڭ جاس بۋىنىن جان-جاقتى قولداۋعا باعىتتالعان. ماسەلەن, استانا, الماتى جانە شىمكەنت (جاقىن ارادا قاراعاندى قوسىلادى) قالالارىنىڭ ەڭبەك جاستارى ءۇشىن جالعا بەرىلەتىن پاتەرلەر سالۋ, عىلىم مەن جاستار كاسىپكەرلىگىن دامىتۋ ءۇشىن قوسىمشا گرانتتار ءبولۋ, وتباسى ينستيتۋتىن دامىتۋ جانە نىعايتۋ, «Astana Open University» اشىق ۋنيۆەرسيتەتىن قۇرۋ جانە ت.ب. وسى ءسوزىمنىڭ ايعاعى.
مەملەكەت باسشىسىنىڭ ءاربىر وڭىردە نازارباەۆ ۋنيۆەرسيتەت ۇلگىسى بويىنشا 1 جوعارى وقۋ ورنىن قۇرۋ جونىندەگى باستاماسى وتە ماڭىزدى دەپ بىلەمىن. بۇل – وبلىس ورتالىقتارى مەن رەسپۋبليكالىق ماڭىزى بار قالالاردا عىلىمي جانە ءبىلىم بەرۋ حابى اشىلادى دەگەن ءسوز.
نۇرسۇلتان ءابىش ۇلى بارشا جاستى وتانشىلدىقتى كورسەتەتىن, ەلگە الەمنىڭ ەڭ دامىعان 30 ەلىنىڭ قاتارىنا قوسىلۋعا كومەكتەسەتىن, وتانعا دەگەن سۇيىسپەنشىلىكتى ارتتىراتىن ناقتى ءىس-ارەكەتتەرگە شاقىردى. ءبىزدىڭ «جاڭعىرۋ جولى» رەسپۋبليكالىق شتابىمىز ەلباسىنىڭ « ۇلى دالانىڭ جەتى قىرى» ماقالاسىنان العان اسەردەن سوڭ, جاستارعا وسى جىل اياسىندا استانا قالاسىندا الما باعىن ءوسىرۋدى ۇسىندى. بۇل ۇسىنىس, وزدەرىڭىز كۋا بولعانداي, شتابىمىزدىڭ مۇشەسى تاميلا روزمەتوۆا ارقىلى جەتكىزىلدى. باستامامىزدى ەلباسى قولدادى. ءوز تاراپىمىزدان ناقتى شارالار جوسپارلاپ وتىرمىز. ءبىرىنشىسى – قاراعاندىدا 28 قاڭتاردا «سارىارقا جاستارى» ستۋدەنت جاستاردىڭ فورۋمى وتەدى.
بۇل جىلدى ەلدەگى جاس بۋىن وزدەرىنىڭ يدەيالارى مەن باستامالارىن جۇزەگە اسىرۋعا, ءبىلىم مەن عىلىمدى دامىتۋعا, باسەكەگە قابىلەتتى جاڭا قوعام قۇرۋعا اتسالىسۋعا ارنايتىن بولادى. ەلىمىزدە جاستاردىڭ كرەاتيۆتى, جاڭاشا ويلاي بىلەتىن جاڭا تولقىنى ءوسىپ كەلە جاتقانىنا سەنىمدىمىن!
الەكساندر ۋرماشوۆ,
«جاڭعىرۋ جولى» جاستار رەسپۋبليكالىق قوزعالىسى وڭىرلىك شتابىنىڭ باسشىسى
قاراعاندى
كاسىپكەرلىككە كەڭ جول اشادى
مەملەكەت باسشىسى نۇرسۇلتان نازارباەۆ جاستار جىلىنىڭ اشىلۋ راسىمىندە ەلىمىزدەگى جاس كاسىپكەرلەرگە مەملەكەت تاراپىنان بەرىلگەن مۇمكىندىكتەر مەن كورسەتىلىپ جاتقان كومەكتىڭ ناتيجەسىندە ءىرى باستامالاردىڭ ءساتتى جۇزەگە اسقاندىعىن ايتتى. پرەزيدەنت «اتامەكەن» ۇلتتىق كاسىپكەرلەر پالاتاسىنىڭ تاجىريبەسى تۋرالى ايتىپ, «جاس كاسىپكەر» باعدارلاماسىن ازىرلەۋدى تاپسىردى. بۇل باعدارلامانى شاعىن نەسيە بەرۋدىڭ جانە وقىتۋ ءىسىنىڭ وڭ تاجىريبەسى نەگىزىندە قۇرۋ قاجەتتىگىن دە باسا ايتتى. ءتىپتى, جوبا اياسىندا جىل سايىن ءبىلىم الاتىن جۇمىسسىز جاستار مەن ءوزىن ءوزى جۇمىسپەن قامتىعاندار سانىن 100 مىڭعا دەيىن جەتكىزۋ مەجەسىن بەلگىلەپ بەردى. بۇل باستامانى تولىقتاي ىسكە اسىرۋعا بارلىق مۇمكىندىك بار. ەلباسى مىسالعا العان سوڭعى جىلداعى «اتامەكەن» ۇلتتىق كاسىپكەرلەر پالاتاسىنىڭ «باستاۋ» جوباسى اياسىندا اۋىلدار مەن شاعىن قالالاردا 43 مىڭ تۇرعىن كاسىپكەرلىكتىڭ قىر-سىرىن مەڭگەرىپ شىقتى. «باستاۋ» كاسىپكەرلىك نەگىزدەرىن وقىتۋ جوباسى مەملەكەتتىك باعدارلاماعا ەنبەس بۇرىن, 2016 جىلى ەكى وبلىستىڭ (ماڭعىستاۋ, اقتوبە) 3 اۋدانىندا سىناقتان وتكىزىلىپ, وقىتۋ فورماتى «اتامەكەن» ۇكپ-دا پىسىقتالىپ, جەتىلدىرىلدى. العاشقى جىلى جوبا 80 اۋداندى قامتىسا, 2018 جىلى وعان 160 اۋدان مەن 40 قالانىڭ جۇمىسسىز جانە ءوزىڭ ءوزى جۇمىسپەن قامتىعان ادامدارى قاتىستى.
ەلباسىنىڭ «پرەزيدەنتتىڭ بەس الەۋمەتتىك باستاماسى» ۇندەۋىنىڭ ناتيجەسىندە 2018 جىلى «ەڭبەك» باعدارلاماسى اياسىندا 2017 جىلمەن سالىستىرعاندا شاعىن نەسيەلەۋگە بولىنگەن قارجى كولەمى ەكى ەسە ارتتى. بىلتىر شاعىن نەسيەلەۋگە 62 ملرد تەڭگە ءبولىنىپ, 14 مىڭ كاسىپكەر قامتىلدى. قارجىلاندىرىلعان جوبالاردىڭ باسىم بولىگى اۋىلدىق ەلدى مەكەندەر مەن شاعىن قالالارعا تيەسىلى. بىلتىرعى جىلدىڭ قورىتىندىسى بويىنشا «باستاۋ» جوباسى اياسىندا 7 692 قاتىسۋشى بيزنەستەرىن اشسا, ەندى ءبىرازى كاسىبىن كەڭەيتتى.
«باستاۋ» وقىتۋ جوباسىنا قاتىسقانداردىڭ 25 پايىزى 18-29 جاس ارالىعىنداعى جاستار. ەلباسى جاستار جىلىنا قاتىستى سالتاناتتى جيىندا «بيزنەستىڭ جول كارتاسى-2020» باعدارلاماسى اياسىندا جاس كاسىپكەرلەر ءۇشىن گرانتتار سانىن ارتتىرۋدى تاپسىردى. پرەزيدەنت اتاپ وتكەندەي, بۇل مۇمكىندىك بارىسىندا ءۇش جىلدا شامامەن 300 مىڭعا جۋىق جاس بيزنەستىڭ قىر-سىرىن مەڭگەرىپ شىعادى. ولاردىڭ تورتتەن ءبىرى, كەم دەگەندە 80 مىڭ ادام ءوز كاسىبىن باستايدى. بۇل كاسىپكەرلىك نەگىزدەرىن وقىتۋ جوبالارىنا جاستاردىڭ نەعۇرلىم كوبىرەك كەلۋىنە سەپتىگىن تيگىزبەك.
بۇعان قوسا, مەملەكەت باسشىسى ۋنيۆەرسيتەتتىڭ جوعارعى كۋرستارىندا وقيتىن ستۋدەنتتەردى دە بيزنەسكە باۋلۋدى ۇسىندى. وسى باعىتتا باعدارلاما دايىندالىپ, ونى جۇزەگە اسىرۋعا ەل قازىناسىنان 32 ملرد تەڭگە ءبولۋ تاپسىرىلدى. بۇگىندە ەلىمىزدەگى ءبىتىرۋشى كۋرستاردا, ۋنيۆەرسيتەتتىڭ جوعارعى كۋرسىندا وقيتىن 60 مىڭعا جۋىق ستۋدەنتتىڭ كاسىپكەرلىككە قادام باسىپ, ءوز ءىسىن باستاۋىنا بۇل وراسان زور مۇمكىندىك دەپ ەسەپتەيمىن.
باۋىرجان ورازعاليەۆ,
«اتامەكەن» ۇلتتىق كاسىپكەرلەر پالاتاسى جاپپاي كاسىپكەرلىك جانە شاعىن قارجىلاندىرۋ دەپارتامەنتىنىڭ باسقارۋشى ديرەكتورى
ۇزدىك جوبالارعا ساتتىلىك
ەلباسى نۇرسۇلتان نازارباەۆتىڭ 2019 جىلدى جاستار جىلى دەپ جاريالاۋى – ءبىز ءۇشىن قۋانتارلىق جاعداي. مەملەكەت تاراپىنان جاستارعا ەرەكشە نازار اۋدارىلىپ, جاعداي جاسالعالى وتىرعاندىقتان, وسى كۇنگە دەيىن شەتەلدە جانە قازاقستاندا العان ءبىلىمىمىز بەن تاجىريبەمىزدى ەلىمىزگە ارناۋعا دايىنبىز.
مەن ۇلىبريتانياداعى ۋوريك ۋنيۆەرسيتەتىنىڭ جانە نازارباەۆ ۋنيۆەرسيتەتتىڭ تۇلەگىمىن. قازىرگى ۋاقىتتا جوعارى ءبىلىم بەرۋ مەكتەبىندە پوستدوكتورانت-زەرتتەۋشىمىن. ءبىزدىڭ مەكتەپتە ءبىلىم بەرۋ جانە زەرتتەۋ سالاسىنا ۇلەس قوسىپ جۇرگەن بىرنەشە جاس عالىم جۇمىس ىستەيدى, كوپتەگەن تالانتتى ماگيسترانت جانە دوكتورانت جاس ءبىلىم الادى. ءبىز, جاس زەرتتەۋشىلەر ءۇش تىلدە ءبىلىم بەرۋ, جوعارى ءبىلىم بەرۋ سالاسىن باسقارۋ, ينكليۋزيۆتى ءبىلىم بەرۋ سياقتى اسا ماڭىزدى تاقىرىپتاردى زەرتتەۋمەن اينالىسامىز. زەرتتەۋ ناتيجەلەرىنە سۇيەنە وتىرىپ, ەلىمىزدەگى ءبىلىم جۇيەسىن جاقسارتۋعا باعىتتالعان ۇسىنىستار دايىندايمىز جانە ستەيكحولدەرلەر اراسىندا تاراتۋعا تىرىسامىز.
جاستار جىلىنىڭ سالتاناتتى اشىلۋىنا قاتىسقان ينجەنەريا مەكتەبىنىڭ دوكتورانتى, ارىپتەسىمىز داميرا پەرنەباەۆانىڭ ايتقان ۇسىنىسىنا ەلباسى قولداۋ ءبىلدىردى. قازاقستان جاستارى اراسىندا ەڭ ۇزدىك 100 عىلىمي زەرتتەۋ جۇمىسىن انىقتاۋ, شىن مانىندە, كوپتەگەن سالاداعى جاس زەرتتەۋشىلەردى ىنتالاندىرىپ, ەلىمىزدەگى عىلىم ساپاسىن جەتىلدىرىپ, جاڭا سەرپىن بەرەدى. ۇزاق مەرزىمدى تۇرعىدان الساق, مۇنداي زەرتتەۋ جۇمىستارىنىڭ ەلىمىزدىڭ ەكونوميكاسى مەن الەۋمەتتىك سالاسىن جاقسارتۋدا الەۋەتى زور. وسى ۇزدىك 100 جوبانىڭ اراسىندا ءبىلىم بەرۋ سالاسىندا جۇرگىزىلگەن زەرتتەۋ جۇمىستارىنا ءبىز دە اتسالىساتىن بولامىز.
لاۋرا قاراباسوۆا,
نازارباەۆ ۋنيۆەرسيتەت جوعارى ءبىلىم بەرۋ مەكتەبىنىڭ پوستدوكتورانتى, «بولاشاق» حالىقارالىق باعدارلاماسىنىڭ تۇلەگى
