«بۇل ءىس-شارانى وتكىزۋدەگى باستى ماقساتىمىز – ەلباسى ن.ءا.نازارباەۆتىڭ « ۇلى دالانىڭ جەتى قىرى» ماقالاسىندا كوتەرىلگەن تۇركى الەمىنىڭ گەنەزيسى, ۇلى دالانىڭ ۇلى ەسىمدەرى, دالا وركەنيەتى, ۇلتتىق بىرەگەيلىك سىندى ۇلتتىق-رۋحاني تۇرعىسىنداعى ماڭىزدى ماسەلەلەر تالقىلاۋ. ماقالادا ايتىلعان قۇندىلىقتاردى قازىرگى قوعام ساناسىنا وڭتايلى ءسىڭىرۋ, جاس ۇرپاق ءتالىم-تاربيەسى وزەگىنە اينالدىرۋدىڭ ۇتىمدى جولدارىن زەردەلەۋ», دەدى جيىنعا مودەراتورلىق ەتكەن استانا قالاسى اكىمدىگى «رۋحانيات» كوممۋنالدىق مەملەكەتتىك مەكەمەسىنىڭ باسشىسى ەرجان ەڭسەباي.
جيىندا ءسوز العان استانا قالاسى وقۋشىلار سارايىنىڭ ديرەكتورى, قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى ەربول ىرگەباي ۇلى دالانىڭ ۇلى تۇلعالارىن جاس ۇرپاققا ناسيحاتتاۋ توڭىرەگىندە وي قوزعاپ, وقۋشىلار سارايىندا جاسالىپ جاتقان جۇمىستارعا توقتالسا, ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ اتقارۋشى ديرەكتورى, فيلولوگيا عىلىمدارىنىڭ كانديداتى ەربول تىلەشوۆ ۇلتتىق بىرەگەيلىكتى ساقتاۋداعى ءالىپبي ماڭىزى تۋرالى ايتتى. «كەشە عانا «Egemen Qazaqstan» گازەتىندە ۇلتتىق كوميسسيا ماقۇلداعان «جاڭا ءالىپبي نەگىزىندەگى قازاق ءتىلى ەملەسىنىڭ ەرەجەلەرى» جارىق كوردى. ەندى وسى نۇسقانى قولدانا بەرۋگە بولادى. بۇيىرسا, كوكتەمدە قازاقستان رەسپۋبليكاسىنىڭ ءتىل تۋرالى زاڭىنا وزگەرىستەر مەن تولىقتىرۋلار ەنەدى, سول كەزدە ارنايى قاۋلىمەن نەمەسە جارلىقپەن بەكىتىلەتىن بولادى», دەدى.
بۇدان وزگە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى, جازۋشى تۇرسىنحان زاكەن ۇلى «تۇركى الەمىنىڭ گەنەزيسى قىتاي دەرەكتەرىندە» اتتى بايانداما جاساسا, تاريح عىلىمدارىنىڭ دوكتورى مارات ابسەمەتوۆ «الاش ارىستارىنىڭ مۇراسى جانە مۇراعات ءىسى», قازاق ۇلتتىق ونەر ۋنيۆەرسيتەتىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى, ونەرتانۋشى, كۇيشى جانعالي ءجۇزباي « ۇلى دالا فولكلورىنىڭ مىڭجىلدىق مۇراسى: وتاندىق ونەرتانۋ عىلىمىنىڭ ماقساتى مەن مىندەتى» تاقىرىبىندا بايانداما جاسادى. ل.ن.گۋميلەۆ اتىنداعى ەۇۋ ەۋرازيالىق زەرتتەۋلەر كافەدراسىنىڭ پروفەسسورى, تاريح عىلىمدارىنىڭ دوكتورى ماقسات الپىسبەس «شەجىرە جانە ۇلى دالانىڭ ۇلى ەسىمدەرى» جايىندا, argymaq.kz ۇلتتىق تانىمدىق پورتالىنىڭ باس رەداكتورى ەرجان جاۋباي « ۇلى دالا جانە اتقا ءمىنۋ مادەنيەتى» تاقىرىبىندا باياندادى.
ءىس-شاراعا زيالى قاۋىم وكىلدەرى, استانا قالاسى ءبىلىم بەرۋ مەكەمەلەرىنىڭ باسشىلارى مەن ۇستازدارى, جاس عالىمدار مەن قالامگەرلەر, رۋحانيات جانە مادەنيەت سالاسىنىڭ وكىلدەرى, قوعام بەلسەندىلەرى قاتىستى.
ۇلاربەك نۇرعالىم ۇلى,
«Egemen Qazaqstan»
