«ۇلتتىق قۇراما الماتى وبلىسىندا جاتتىعۋ جيىنىندا وتكىزىپ جاتىر. بۇل ءبىزدىڭ سپورتشىلار ءۇشىن كوپتەن كۇتكەن جيىن بولاتىن. سەبەبى, بىزدە مۇنداي شارالار ءجيى ۇيىمداستىرىلا بەرمەيدى. ءيا, جاڭا جىلمەن بىرگە جاڭا ماۋسىم دا باستالدى. بۇل ماۋسىمنىڭ ءبىز ءۇشىن وڭاي بولماسى انىق. ويتكەنى, الدا وليمپيادا ويىندارى كەلە جاتىر», - دەيدى ولگا دوۆگۋن.
باس باپكەر 2020 جىلعى توكيو ويىندارىنا جولداما قالاي تاراتىلاتىنىن ءتۇسىندىردى.
«مەرگەندەر وليمپيادا جولداماسىن الەم كۋبوگى كەزەڭدەرى مەن ازيا چەمپيوناتىندا ساراپقا سالادى. اتاپ ايتار بولساق, ءبىزدىڭ سپورتشىلاردى ءتورت بىردەي الەم كۋبوگى كەزەڭى كۇتىپ تۇر. الەمدىك دودادا ءار جاتتىعۋ تۇرىنەن ەكى وليمپيادالىق كۆوتا بەرىلەدى. ەگەر 1-2 ورىنداعى سپورتشىلار جولداماعا يەلىك ەتكەن بولسا, كۆوتا 3-4 ساتىداعى مەرگەندەرگە وتەدى. ال ازيا چەمپيوناتىندا ءار جاتتىعۋدان ءتورت كۆوتا تاراتىلاتىنى انىقتالدى», - دەيدى باس باپكەر.
ولگا دوۆگۋن مەرگەندەر الدىندا قانداي تالاپ بارىن دا جاسىرمادى. باس باپكەردىڭ ايتۋىنشا, كوماندا مۇشەلەرىنە 3 جولداما جەڭىپ الۋ تاپسىرىلعان.
«وليمپياداعا ءۇش جولداما يەلەنسەك دەگەن ماقسات قويدىق. سول سەبەپتى, جىلدىڭ باستى جارىستارىنا نەگىزگى قۇرام سپورتشىلارىن اپارامىز. ارينە, بۇل جاستار شەت قالادى دەگەن ءسوز ەمەس. تالانتتى جاس مەرگەندەردى دە قاتارعا قوسامىز», - دەيدى ول.
نىسانا كوزدەۋدەن قازاقستان ۇلتتىق قۇراماسىنىڭ بيىلعى ماۋسىمداعى العاشقى رەسمي ءتۋرنيرى ءۇندىستاندا وتەدى.
