«استانا ەكونوميكا قۇرىلىمىنداعى شوب ۇلەسى بويىنشا وڭىرلەر اراسىندا كوش باستاپ تۇر. ەلوردا مەملەكەت باسشىسى قويعان مىندەتتى مەرزىمىنەن بۇرىن ورىندادى. ەسىڭىزدە بولسا, 2050 جىلعا دەيىن جالپى وڭىرلىك ونىمدەگى شوب-تىڭ 50%-ىن قامتاماسىز ەتۋ تاپسىرىلعان بولاتىن. بىزدە – 61%. بۇل استانادا ءوز ءىسىن اشۋ ءۇشىن جاعىمدى كليمات قۇرىلعانىن كورسەتەدى», – دەدى ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى الىشەر ابدىقادىروۆ.
اكىمدىك ءوز تاراپىنان بيزنەستى ەنگىزۋ ءۇشىن بارلىق پروتسەدۋرالاردى وڭتايلاندىرۋ بويىنشا جۇيەلى جۇمىستاردى جۇرگىزۋدە. مىسال رەتىندە, باسقارما باسشىسى ەلوردالىق «1000 ورىن – كوشە ساۋداسى» باعدارلاماسىن اتادى. «وتكەن جىلى ءبىزدىڭ باسقارما Bitfury كومپانياسىمەن بىرلەسىپ, پيلوتتىق جوبا جاساۋعا كەلىستى. «1000 ورىن – كوشە ساۋداسى» قالالىق باعدارلاماسى اياسىندا جەر تەلىمدەرىن ءبولۋ اۋكتسيوندارىندا تەحنولوگيانى ەنگىزۋ شەشىلدى. ەگەر بۇرىن اۋكتسيون كۇنى بويى ءوتىپ, كاسىپكەرلەردىڭ ۋاقىتىن السا, ەندى بارلىعى ونلاين تۇردە وتەتىن بولادى. تىركەۋ, كەپىلدىك جارنانى تولەۋ جانە ساۋدا-ساتتىققا قاتىسۋ ەندى تەلەفون ارقىلى دا قولجەتىمدى.
ال ساۋدا-ساتتىقتى ناقتى ۋاقىت رەجيمىندە كەز كەلگەن ادام قاراي الادى. بلوكتاردى ەنگىزۋ پروتسەستى تولىقتاي اشىق جانە ترانسپارەنتتى ەتۋگە مۇمكىندىك بەردى. اۋكتسيونداردىڭ بارلىق ستاۆكالارى مەن ناتيجەلەرى ەندى باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىمەن جۇرگىزىلەدى», – دەپ ءتۇسىندىردى ول.
ا.ابدىقادىروۆتىڭ اقپاراتى بويىنشا, 2019 جىلدىڭ 1 قاڭتارىنداعى جاعدايعا سايكەس, استانادا كاسىپكەرلىك سۋبەكتىلەرىنىڭ سانى 125 مىڭدى قۇراپ, وتكەن جىلمەن سالىستىرعاندا 30%-عا ارتتى. 2018 جىلدىڭ قورىتىندىسى بويىنشا ەلوردادا 13 مىڭنان استام شوب سۋبەكتىسى تىركەلگەن. ولاردىڭ جۇمىسى ءونىم شىعارۋدى 21,9%-عا ۇلعايتتى.
