كەزدەسۋدە ستۋدەنتتەردىڭ بيىلعى جاستار جىلىندا ۇيىمداستىراتىن ءىس-شارلارى, ماقسات-مىندەتتەرى, ۇسىنىستارى تىڭدالىپ, سارالاندى. رەكتور بارلىق بىلىمگەرلەر ءۇشىن قۋانىشتى حابار, وقۋ ورنى جانىنان جاستار ورتالىعى اشىلعانىن ايتتى. ۋنيۆەرسيتەتتىڭ قۇرىلىمدىق ءبولىمىنىڭ ءبىرى بولاتىن وسى ورتالىققا 12 ستۋدەنت شتات بويىنشا قىزمەتكە الىنباقشى. ولار ءبىلىم ورداسىنداعى ءتۇرلى ۇيىمداردىڭ جەتەكشىسى رەتىندە ەڭبەك سىڭىرەتىن بولادى. ماسەلەن, ەرىكتىلەر توبىنا, دەبات ۇيىمدارىنا, ءار باعىتتاعى كلۋبتارعا جەتەكشىلىك ەتىپ, ستۋدەنتتىك دەكان قىزمەتىن دە بەلسەندى جاستار اتقارماق.
سونىمەن قاتار ۋنيۆەرسيتەت اكىمشىلىگى شىعارماشىلىق باعىتتا ىزدەنىپ جۇرگەن ستۋدەنتتەردىڭ حالىقارالىق, رەسپۋبليكالىق دەڭگەيدە وتكىزىلەتىن ءتۇرلى بايقاۋلارعا قاتىسۋىنا ەكى ەسە قولداۋ كورسەتەدى. جيىندا كاسىپپەن, عىلىمي زەرتتەۋلەرمەن اينالىسقىسى كەلگەن ستۋدەنتتەر ءۇشىن ەرەكشە جاعداي جاسالاتىندىعى دا ايتىلدى. ستۋدەنتتەردىڭ شەتەلگە شىعۋ ساپارلارى دا نازاردان تىس قالمادى. مىسالعا, الداعى دەمالىس كەزىندە ەستونيا ەلىمەن تاجىريبە الماسۋ ماقساتىندا 10 كۇندىك جازعى مەكتەپ ۇيىمداستىرىلاتىن بولدى.
كەزدەسۋ سوڭىندا ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزاەۆ بەلسەندى ستۋدەنتتەردى ەلباسى ارتقان سەنىم ۇدەسىنەن شىعىپ, وتانىمىزدىڭ گۇلدەنۋىنە قىزمەت ەتەتىن ۇلت پاتريوتى بولۋعا شاقىردى.
قالماحانبەت مۇقامەتقالي,
«Egemen Qazaqstan»
الماتى وبلىسى
