شارا اياسىندا كەز كەلگەن تۇرعىن ءوزىن مازالاعان جايت تۋرالى نەمەسە ۇسىنىس-پىكىرلەرىن تىكەلەي مەكەمە باسشىسىمەن كەزدەسۋدە تالقىلاي الادى. جىلىوي اۋدانىنا جۇمىس ساپارى بارىسىندا الەۋمەتتىك ماسەلەلەر جونىندە كوشپەلى وتىرىس وتكىزگەن وبلىس اكىمى نۇرلان نوعاەۆ وسىنداي تاپسىرما بەردى. وسىلايشا حالىقپەن كەرى بايلانىس ورناتۋدىڭ جاڭا كەزەڭى جۇزەگە اسپاق.
- ازاماتتاردى جەكە سۇراقتارىمەن قابىلداعان كەزدە بىزگە مەكتەپ, بالاباقشا ديرەكتورلارىنىڭ جۇمىسىنا, مەديتسينالىق مەكەمەلەردىڭ قىزمەتىنە شاعىمدانىپ جاتادى. تۇرعىندار ماسەلەلەرىن باسشىلارمەن تىكەلەي شەشە المايدى. بۇلاي بولماۋى كەرەك. مەملەكەت باسشىسىنىڭ حالىقپەن كەرى بايلانىس مەحانيزمىن جولعا قويۋ تۋرالى تاپسىرماسى بارى بارشاڭىزعا بەلگىلى,- دەپ اتاپ ءوتتى نۇرلان نوعاەۆ.
وڭىردە مەملەكەتتىك ورگانداردىڭ باسشىلارى, بارلىق دەڭگەيدەگى اكىمدەر بريفينگتەرگە قاتىسادى, تەلەارنالاردا تىكەلەي ەفير ارقىلى تۇرعىنداردىڭ ساۋالدارىنا جاۋاپ بەرەدى. ەندى اقپان ايىنان باستاپ الەۋمەتتىك جەلىلەردى دە وسى ماقساتقا پايدالانۋ كوزدەلىپ وتىر.
- اتىراۋ وبلىسى اكىمىنىڭ تاپسىرماسى بويىنشا مەملەكەتتىك ورگانداردىڭ باسشىلارى الەۋمەتتىك جەلىلەردەگى اتىراۋ وبلىسى اكىمدىگىنىڭ رەسمي پاراقشالارىندا تىكەلەي ەفير ارقىلى اپتا سايىن ەسەپ بەرەتىن بولادى. بۇل - ۋاقىت تالابى. وبلىس تۇرعىندارى Facebook نەمەسە Instagram جەلىلەرى ارقىلى ۇيلەرىنەن شىقپاي-اق تىكەلەي بايلانىسپەن سۇراقتارىن قويا الادى, - دەيدى وبلىس اكىمىنىڭ ءباسپاسوز حاتشىسى سەرىكجان ەرمەنتاەۆ. - مەملەكەتتىك ورگان باسشىلارى Live رەجيمدە بارلىق سۇراقتارعا جاۋاپ بەرەدى, الەۋمەتتىك جەلىلەردىڭ ءبىر ارتىقشىلىعى, سپيكەرلەر ەفير ۋاقىتىنا تاۋەلدى ەمەس.
سونىمەن قاتار, ايماقتا Telegram قوسىمشاسىندا چات-كانال جۇمىس ىستەيدى. 7 مىڭنان استام ادام تىركەلگەن «اتىراۋ تسيفرلىق قابىلداۋ» ءموبيلدى قوسىمشاسى دا بار. بيلىك پەن بۇقارا اراسىندا تىعىز بايلانىس ورناتۋدى ماقسات ەتكەن باستاما باياندى بولسا يگى.
باقىتگۇل باباش,
«Egemen Qazaqstan»
اتىراۋ
