كۇنى كەشە عانا جەتىسۋدىڭ جاۋھارىنا بالاناتىن «شىمبۇلاق» پەن رەسەيدىڭ «روزا حۋتور» تاۋ كۋرورتتارى ءوزارا ىنتىماقتاستىق كەلىسىمگە كەلدى. بۇل رەسەي مەن قازاقستاننىڭ تۋريزم سالاسىنداعى بايلانىسىن نىعايتىپ, ەكى ەل اراسىنداعى دوستىق قاتىناستاردىڭ بەرىكتىگىن ارتتىرا تۇسەدى. اتالعان مەموراندۋم كۋرورتتاردىڭ تانىمالدىعىن ارتتىرۋ, تاۋ ءتۋريزمىن دامىتۋ, بەلسەندى دەمالىس, سپورتپەن شۇعىلدانۋ جانە سالاۋاتتى ءومىر سالتىن ناسيحاتتاۋ ماقساتىنداعى ءوزارا ءىس-قيمىلداردى كوزدەپ وتىر.
ء«بىزدى پوست-كەڭەستىك كەڭىستىكتەگى ەڭ ۇزدىك تاۋ كۋرورتتارىنىڭ بىرىمەن ىنتىماقتاستىقتىڭ وسىنداي فورماتى ەرەكشە قىزىقتىردى. مۇنداي سينەرگيا قوناقتارىمىزدىڭ شەڭبەرىن كەڭەيتۋگە قابىلەتتى جانە قازىر ءبىز قازاقستان مەن رەسەيدىڭ تۋريستىك نارىقتارىن جاڭادان اشۋ ۇستىندەمىز. بىزدە ءبىر-بىرىمىزگە ۇسىنا الاتىن دۇنيە كوپ, وسى تاڭدا ءوزارا ءتيىمدى قاتىناستاردى دامىتۋعا ىقپال ەتەتىن ناقتى ماركەتينگتىك شەشىمدەر بەلگىلەندى»,- دەيدى «روزا حۋتور» تاۋ كۋرورتىنىڭ باس ديرەكتورى سەرگەي باچين.
ەكى جاقتى كەلىسىمگە سايكەس, قازاقستاندىق جانە رەسەيلىك تاۋ كۋرورتتارىنىڭ اكىمشىلىگى تۋريزم جانە مادەني-ساۋىقتىرۋ دەمالىسى, كونفەرەنتسيالار, سەمينارلار جانە باسقا دا ءىس-شارالار مەن بىرلەسكەن جوبالاردى ىسكە اسىرۋ ءۇشىن بارلىق قولجەتىمدى تەتىكتەردى پايدالاناتىن بولادى. بۇل رەتتە ءوزارا اقپاراتتىق, ءبىلىم بەرۋ, ادىستەمەلىك جانە كونسۋلتاتسيالىق قولداۋ كورسەتۋ جوسپارلانۋدا. مۇنداي قىزمەتتىڭ ماڭىزدى تارماعى – ستاتيستيكالىق, انىقتامالىق مالىمەتتەرمەن جانە باسقا دا دەرەكتەرمەن الماسۋ. ماماندار, بۇل قادام شاڭعى كۋرورتتارىنا كورشى ەلدەردىڭ تاۋ شاڭعىسى, تاۋ, سپورتتىق تۋريزم ەرەكشەلىكتەرىن جاقسىراق تۇسىنۋگە مۇمكىندىك بەرەتىنىن, سونداي-اق بولاشاقتا قازاقستاندىق بەلسەندى دەمالىس اۋەسقويلارى اراسىندا «روزا حۋتوردىڭ», رەسەيلىكتەر اراسىندا «شىمبۇلاقتىڭ» تانىمالدىلىعىن ارتتىراتىنىن ايتادى. قوس تاراپ الەۋەتتى تۋريستەردىڭ قالاۋى مەن سۇرانىستارىن زەردەلەۋ ارقىلى سەرىكتەس-كۋرورتتارعا قازاقستاندىقتاردى, رەسەيلىكتەردى جانە باسقا مەملەكەتتەردىڭ وكىلدەرىن تارتۋ ستراتەگياسىن ازىرلەۋگە كۇش سالاتىندارىن ايتىپ وتىر.
– قازاقستاندىق جانە رەسەيلىك كۋرورتتاردىڭ ءوزارا تانىمالدىلىعىن ارتتىرۋعا بىرلەسكەن جەڭىلدىك باعدارلامالارى ىقپال ەتەدى دەپ ۇمىتتەنەمىز جانە ولاردىڭ ارەكەتى «شىمبۇلاقتىڭ» جانە «روزا حۋتوردىڭ» دا قوناقتارىنا قولدانىلادى. مىسالى, وسىنداي ناۋقانداردىڭ شەڭبەرىندە كۋرورتتاردىڭ بىرىندە اپتالىق سكي-پاسس ساتىپ الاتىن تۋريستەر وسى كۋرورتتا نەمەسە ونىڭ اكىمشىلىگى ۇسىنعان قوناق ۇيلەردىڭ بىرىندە ورنالاسقان قوناق ۇيدە تۇرعان جاعدايدا سەرىكتەس كۋرورتتان تەگىن ءبىر اپتالىق سكي-پاسستى الۋ قۇقىعىنا يە بولادى, – دەيدى «شىمبۇلاق» تاۋ كۋرورتىنىڭ باس ديرەكتورى ەرجان ەركىنباەۆ.
جاڭا باستامادا ەرەكشە وقيعالار مەن كۇندەرگە, اسىرەسە سەرىكتەس-كۋرورت كۇنىنە ورايلاستىرىلعان ارنايى مەرەكەلەر وتكىزۋ جوباسى قولعا الىنعان. مۇنداي كۇندەرى «روزا حۋتوردا» دەمالاتىن تۋريستەر «شىمبۇلاققا» ارنالعان فوتوكورمەلەردى, شىعارماشىلىق ۇجىمداردىڭ كونتسەرتتەرىن تاماشالاپ, قازاقتىڭ ۇلتتىق تاعامدارىنان ءدام تاتا الادى. ءوز كەزەگىندە ىلە الاتاۋىنداعى ەڭ تانىمال تاۋ كۋرورتىنىڭ قوناقتارى دا سوچيدەگى وليمپيادا مۇراسىنىڭ ەڭ ءىرى نىسانى اتانعان رەسەي كۋرورتىنىڭ تاقىرىپتىق كۇندەرىنە قاتىسۋعا مۇمكىندىگى بار. وسىنىڭ بارلىعى كورشىلەس ەلدەردىڭ تۋريستىك باعىتتار رەتىندە تانىلۋىنا ىقپال ەتپەك.
ارمان وكتيابر,
«ەگەمەن قازاقستان»
الماتى
