مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتتىڭ باستاماسىمەن جۇزەگە اسقان جوبا جاستاردى مەملەكەتتىك قىزمەتكە تارتۋدى ەرتە باستان دايىنداۋ ماقساتىن كوزدەيدى. ازىرگە بۇل ءىس وڭ ناتيجەلى.
- «جەتىسۋ» مەملەكەتتىك قىزمەت مەكتەبى اشىلعان كۇننەن بەرى ۋنيۆەرسيتەت ستۋدەنتتەرى كەلىپ, قوسىمشا ءبىلىم الۋدا. ولاردىڭ اراسىندا قازىردىڭ وزىندە بولشاعىن ايقىنداپ, مەملەكەتتىڭ قىزمەتشى اتانعاندارى بار. دەپارتامەنت باستاماسىمەن جۇزەگە اسقان جوباعا بىلتىر قاتىسقان 43 ادامنىڭ ىشىنەن 10 جاس مامان بوس ورىندارعا جاريالانعان كونكۋرستارعا قاتىسىپ, جۇمىسقا تۇردى, - دەيدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتىنىڭ ءباسپاسوز حاتشىسى سىمبات يسراپۋلوۆا.
ءداستۇرلى ساباق بيىل دا قايتا جالعاسىن تاپتى. قازىر «جەتىسۋ» مەملەكەتتىك قىزمەت مەكتەبى تەك ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى عانا ەمەس, قالاداعى باسقا دا وقۋ ورىندارىندا ءبىلىم الىپ جۇرگەن 28 جاس وقۋعا نيەت بىلدىرۋدە. ىنتالى توپقا مەملەكەتتىك باسقارۋ اكادەمياسى تالدىقورعان فيليالىنىڭ وقىتۋشىلارى ءدارىس جۇرگىزەدى.
قازىر اپتاسىنا 3 ساعات مەملەكەتتىك قىزمەت سالاسىنداعى بىرىڭعاي قۇزىرەتتەر شەڭبەرىندە سەمينار-ترەنينگ ساباقتارى ءوتىپ جاتىر. ستۋدەنتتەر بۇل دارىستەن «حالىققا قىزمەت ەتۋ» قاعيداسىنا نەگىزدەلگەن قازىرگى زامانعى مەملەكەتتىك اپپارات جايىندا ماعلۇمات الادى.
قالماحانبەت مۇقامەتقالي,
«Egemen Qazaqstan»
الماتى وبلىسى
