ەستەرىڭىزگە سالار بولساق, قالا اكىمى عابيدوللا ءابدىراحىموۆ 2016 جىلدىڭ ناۋرىزىندا وتكەن ءباسپاسوز ءماسليحاتىندا 2018 جىلعا دەيىن شىمكەنتتە ءۇش اۋىسىمداعى مەكتەپتەردىڭ ماسەلەسى تولىق شەشىلەدى دەپ سەندىرگەن بولاتىن.
«مەكتەپ تاپشىلىعىن بولدىرماۋدىڭ بىردەن-ءبىر جولى جىل سايىن 5-6 جاڭا مەكتەپ سالۋ. ءتىپتى, ءبىلىم جانە عىلىم مينيسترلىگىنىڭ ارنايى تاپسىرماسىنا سايكەس مەكتەپتەردىڭ جانىنان قوسىمشا وقۋ كورپۋستارى رەتىندە عيماراتتار سالۋىمىزعا بولادى» دەگەن ەدى وتكەن جىلعى تامىز كەڭەسىندە.
«شىمكەنت قالاسىندا بالا تۋ كورسەتكىشى جوعارى بولعاندىقتان ءبىرىنشى سىنىپقا باراتىن بالالاردىڭ سانى رەكوردتىق كورسەتكىش قۇراپ وتىر» دەگەن اڭگىمەلەر ايتىلۋدا. دەگەنمەن, مەملەكەتتىك باعدارلاما اياسىندا سالىنىپ جاتقان ءبىلىم بەرۋ مەكەمەلەرى سول قاجەتتىلىكتى قامتاماسىز ەتە الماي ما؟
ماسەلەن, شاھاردىڭ قاق ورتاسىنداعى ء«نۇرسات» مولتەكاۋدانىندا 2007 جىلى پايدالانۋعا بەرىلگەن №80 مەكتەپ-ليتسەيىنە ءبىر سىنىپتا ورتاشا ەسەپپەن 30 وقۋشى ءبىلىم الۋدا. 2018 جىلدىڭ قىركۇيەگىندە 1-سىنىپ تابالدىرىعىن اتتاعان بالا سانىنىڭ ءوزى – 530. بۇل ماسەلە تۋرالى ءبىلىم باسقارماسىنىڭ جاۋاپتى تۇلعالارى باسقارما تاراپىنان مەكتەپكە جاقىن ماڭنان عيمارات جالعا الىنعانىن تىلگە تيەك ەتەدى.
شىمكەنت قالاسىنداعى ءۇش اۋىسىمدى مەكتەپ ماسەلەسى جالعا عيمارات الۋمەن شەشىلىپ كەتپەيتىنى بەلگىلى. شىمشاھاردا جاعدايى ءدال وسىنداي 19 ءبىلىم ورداسى بار. سانداردى تىزبەكتەر بولساق, كۇزگى وقۋ جىلىندا قالاداعى №1 مەكتەپ-گيمنازيادا 591 بالا العاشقى الىپپەمەن تانىسقان. وكىنىشتىسى, 1100 ورىندى مەكتەپتە بۇگىنگى تاڭدا 4238 وقۋشى ساباق وقىپ ءجۇر. دەمەك, ءبىر سىنىپتا 50-گە تارتا بالا بولسا, ءبىر مۇعالىم 2 سىنىپقا جاۋاپتى دەگەن ءسوز.
شىمشاھارداعى 15 شاقتى مەكتەپتە سىنىپ جەتىسپەۋ جاعدايى بايقالادى. ال قوسىمشا قۇرىلىس جۇمىستارىن جۇرگىزۋگە ازىرگە جەر تەلىمى بەرىلمەي جاتقاندىعىن العا تارتادى سالا جاۋاپتىلارى.
ەلباسى ەل حالقىنا جولداۋىندا وسكەلەڭ ۇرپاقتىڭ ساپالى ءبىلىم الۋى ءۇشىن قازىنادان مەكتەپتەردىڭ قۇرىلىسىنا 50 ملرد تەڭگە قارجى جۇمسالىپ, اپاتتى جاعدايداعى جانە ءۇش اۋىسىمدى ءبىلىم وردالارىنىڭ ماسەلەسى ءبىرجولا شەشىلەتىندىگىن جەتكىزگەن ەدى.
ال, ازىرگە شىمقالادا سمەتالىق قۇجاتى ەسەپتەلىپ, جۋىق ارادا قۇرىلىسى اياقتالىپ, جاس ۇرپاقتىڭ ءبىلىم الۋىنا بەرىلەدى دەگەن ءبىلىم وشاقتارى ساۋساقپەن سانارلىق.
ايتا كەتەرلىگى, سوڭعى جىلدارى قالاعا كەلگەن باسشىلاردىڭ ناقتى اتقارعان جۇمىسىنان بەرگەن ۋادەلەرى كوپتەۋ بولىپ تۇر. بىلتىر شىمكەنت قالاسىنىڭ ەكس-اكىمى نۇرلان ساۋرانباەۆ حالىق الدىنداعى ەسەپتى كەزدەسۋدە شىمكەنتتەگى ءۇش اۋىسىمدى مەكتەپتەردىڭ ماسەلەسى جىل سوڭىنا دەيىن شەشىلەدى دەپ سەندىرگەن بولاتىن.
«2017 جىلى كوپتەن بەرى العاش رەت قالادا 124 مەكتەپتى جوندەۋگە جانە ءۇش مەكتەپتى كۇردەلى جوندەۋگە قاراجات ءبولىندى. بارلىق جۇمىستار تولىعىمەن اياقتالدى. التى مەكتەپ جانە 4 قوسىمشا عيمارات پايدالانۋعا بەرىلدى. تاعى دا جاڭا بەس مەكتەپتىڭ قۇرىلىسى مەن ءتورت قوسىمشا عيمارات سالۋ جۇمىستارى باستالدى. قۇرىلىستى 2018 جىلى اياقتاۋ جوسپارلانۋدا» دەگەن ەدى ءوز سوزىندە ن.ساۋرانباەۆ.
جۋىردا عانا شىمكەنت قالاسىنا قاراستى اۋدان اكىمدەرىنىڭ قۇتپان جىلىن قورىتىندىلاعان ەسەپتى كەزدەسۋىندە ءبىلىم سالاسىنا بايلانىستى تۇرعىنداردىڭ سۇراعىنا شاھار باسشىسى ەكىۇشتى جاۋاپ ايتقانى ەل ەسىندە.
اباي اۋدانىنىڭ اكىمى بۇقارباي پارمانوۆتىڭ حالىق الدىنداعى جىلدىق ەسەبىندە قالا اكىمى ءابدىراحىموۆ قۇرىلىسى 2012 جىلى باستالىپ, 2013 جىلى تامىز ايىندا قولدانىسقا بەرىلگەن ت.تاجىباەۆ اتىنداعى №81 جالپى ورتا مەكتەبىن ءبىز سوعىپ بەردىك دەپ جاڭىلعان بولاتىن.
ءبىر سوزبەن ايتقاندا, قالاداعى ءبىلىم وشاقتارىنداعى سىنىپ جەتىسپەۋ ماسەلەسى - الداعى ۋاقىتتا كەزەك كۇتتىرمەيتىن ماسەلەنىڭ ءبىرى. سەبەبى, ەلدىڭ ەرتەڭى جاس ۇرپاقتىڭ ساپالى ءبىلىم الۋىنا تىكەلەي قاتىستى ماسەلەنى كەيىنگە شەگەرۋدىڭ سالدارى وڭاي بولماسى انىق.
نۇرشات توكەن,
«ەگەمەن قازاقستان»
