2018 جىل ءوڭىردىڭ اۋىل شارۋاشىلىعى ءۇشىن جامان بولعان جوق. اۋىل شارۋاشىلىعى باسقارماسىنىڭ مالىمەتى بويىنشا, ءوڭىر شارۋالارى 228,2 ملرد تەڭگەگە نەمەسە بىلتىرعىدان 6,2% دەڭگەيدەن كوپ ءونىم ءوندىرىپ, وتكەن جىلمەن سالىستىرعاندا 17,2 ملرد تەڭگە نەمەسە 156,1% ينۆەتيتسيا تارتىلعان.
سۋارمالى جەرلەر الاڭى 758,4 مىڭ گەكتاردى قۇرادى, بۇل 2017 جىلمەن سالىستىرعاندا 102,4 مىڭ گەكتارعا نەمەسە 15,6%-عا كوبىرەك. 440 مىڭ جەرگە ءداندى داقىلدار ەگىلدى. جينالعان استىقتىڭ جالپى كولەمى 514,0 مىڭ توننا, ورتاشا ءتۇسىم 11,7 تس / گا.
وبلىستا 190 اۋىل شارۋاشىلىعى كووپەراتيۆى جۇمىس ىستەيدى. ولاردىڭ ىشىندە 105-ءى ەت, 64-ءى سۇت, 6-ءۋى داستۇرلى اۋىل شارۋاشىلىعىمەن جانە 15-ءسى كوكونىس شارۋاشىلىعىمەن اينالىسادى.
بىلتىر 9,7 ملرد تەڭگە سۋبسيديا بولىنگەن بولاتىن. بارلىق قارجى ينستيتۋتتارى مەن نەسيە ۇيىمدارىنان 25,3 ملرد تەڭگە الىندى, بۇل 1620 جوبانى قارجىلاندىرۋعا مۇمكىندىك بەردى.
مال شارۋاشىلىعىندا مال باسىنىڭ كوبەيگەنى بايقالادى. ءىرى قارا مال باسى سانى 9% (464 مىڭ باس), قوي-ەشكى 2,2% (1109,4 مىڭ باس), شوشقا 12,8% (57,4 مىڭ باس), جىلقى 14,2% (128,7 مىڭ باس) جانە تۇيە 1,1% (17,5 مىڭ باس) ءوستى. وتكەن جىلدىڭ ىشىندە 2 541,5 توننا ەت ەكسپورتتالدى, بۇل 2017 جىلعا قاراعاندا 4,7 ەسە كوپ.
الايدا, بەردىبەك ساپارباەۆ وبلىس اۋداندارىنىڭ بارلىعى بىردەي جەرگىلىكتى اۋىل شارۋاشىلىعى ونىمدەرىن ەكسپورتتامايتىندارىن اتاپ ءوتتى. اۋدان اكىمدەرى مەن باسقارما باسشىلارىنا اتالمىش باعىتتى باقىلاۋعا الۋعا تاپسىرما بەرىلدى.
ءداستۇرلى ەمەس اۋىل شارۋاشىلىعى سالاسىنا كەلەر بولساق, بۇگىندە وڭىردە 57 ءسۇت, 17 ارا وسىرەتىن شارۋاشىلىقتار, 58 بودەنە, 1 مارال وسىرەتىن, 49 قاز جانە 43 ۇيرەك فەرماسى بار, 38-ءى شارۋاشىلىق ءۇي قوياندارىن وسىرۋمەن اينالىسادى. وبلىستا بارلىعى 263 فەرمەرلىك شارۋاشىلىق پەن شارۋا ۇيلەرى ءداستۇرلى ەمەس اۋىل شارۋاشىلىعىمەن اينالىسادى. ءداستۇرلى ەمەس اۋىل شارۋاشىلىعى داقىلدارىن جينايتىن الاڭ وتكەن جىلدارمەن سالىستىرعاندا 2,5 ەسە كوبەيدى. بىراق, ءوڭىر باسشىسى مايلى داقىلداردى وسىرۋمەن بەلسەندىرەك اينالىسۋدى, ال شارۋالارعا ومارتاشىلىق سەكىلدى سالاعا نازار اۋدارۋ كەرەكتىگىن اتاپ ءوتتى.
بۇدان باسقا, وبلىس باسشىسى وسىمدىك شارۋاشىلىعىنىڭ جاڭا تاسىلىنە قاتىستى سۇراقتىڭ بۇرىننان كوتەرىلىپ كەلە جاتقانىن ەسكە سالدى.
«رەسۋرستاردى, سونىڭ ىشىندە تابيعي رەستۋرستاردى پايدالانۋ كەرەك. سۋ ايدىندارىندا, كولدەر مەن اڭعارلاردا كوكونىس داقىلدارىن ءوسىرۋ قاجەت. مەكتەپتەر وقۋ عيماراتىنىڭ جانىنان ءوز جىلىجايلارىن سالۋلارى كەرەك. بۇل وقۋشىلار ءۇشىن جاقسى تاجىريبە عانا ەمەس, سونىمەن قاتار, وزدەرىن كوكوكىس قورىمەن تولىقتاي قامتۋعا جاقسى مۇمكىندىك. ال ويىل اۋدانى «ويىل تارىسىنىڭ» بۇرىنعى اتاعىن باياعىدا-اق قالپىنا كەلتىرۋلەرى كەرەك ەدى»,- دەدى ول.
جيىندى تۇيىندەگەن بەردىبەك ساپارباۆ اۋىل شارۋاشىلىعىنا تسيفرلاندىرۋدى ەنگىزۋ, مەملەكەتتىك باعدارلامالاردى ءتيىمدى جۇزەگە اسىرۋ جۇمىستارىن كۇشەيتۋدى تاپسىردى.
جيىن سەمينارمەن جالعاسىپ, سىبايلاس جەمقورلىققا جول بەرمەۋ جانە مەملەكەتتىك قىزمەت كورسەتۋ سالاسىنداعى وزەكتى سۇراقتار تالقىلاندى. اقتوبە وبلىسىندا «بيزنەستىڭ جول كارتاسى-2020» مەملەكەتتىك باعدارلاماسىن جۇزەگە اسىرۋ, الەۋمەتتىك نىسانداردى جوبالاۋ, جاستار جىلىندا جاستار رەسۋرستارى ورتالىعىنىڭ جۇمىس جوسپارلارى تۋرالى باياندامالار تىڭدالدى.
