ۇلى دالانىڭ جەتى قىرىن ايقىنداپ بەرەتىن بۇل ماقالادا پرەزيدەنت تۇركى دۇنيەسى حالىقتارىنىڭ, ونىڭ ىشىندە ساقتار مەن عۇندار جانە باسقا تۇركى حالىقتارىنىڭ دۇنيە تاريحىندا ماڭىزدى ءرول اتقارىپ, الەم وركەنيەتىنە جانە مادەني دامۋىنا سالماقتى ۇلەس قوسقانىنا ەرەكشە ءمان بەرەدى. سەبەبى ءاربىر حالىق ءوزىنىڭ ەجەلگى تاريحىن, قايدان, قالاي پايدا بولعانىن بىلمەي تۇرىپ, قازىرگى تاريحىن بىلە المايدى. سوندىقتان دا بۇل ماقالانىڭ ءدال كەزىندە جارىق كورگەنىن اتاپ وتكەن ورىندى.
پرەزيدەنت ماقالاسىندا تۇركى حالىقتارىنىڭ عاسىرلاردان قالىپتاسىپ, ۋاقىتتان وزىپ, ۇرپاقتان ۇرپاققا مۇرا بولىپ كەلە جاتقان تاريحىن ۇلىقتاۋ, ناسيحاتتاۋ ارقىلى ءوزىمىزدى تانىپ بىلۋگە, باي رۋحاني مۇراسىن, ادەبيەتى مەن مادەنيەتىن, تاريحى مەن ءتىلىن زەرتتەپ, بابالار ءداستۇرىن جالعاستىرۋعا شاقىرادى. ونى جۇزەگە اسىرۋ ءۇشىن ماڭىزدى 6 تاپسىرما: «ارحيۆ – 2025» باعدارلاماسىن جاساۋدى, « ۇلى دالانىڭ ۇلى ەسىمدەرى» اتتى وقۋ-اعارتۋ ەنتسيكلوپەديالىق ساياباعىن اشۋدى, «تۇركى وركەنيەتى: ءتۇپ-تامىرىنان قازىرگى زامانعا دەيىن» اتتى جوبانى قولعا الۋدى, « ۇلى دالا» اتتى ەجەلگى ونەر جانە تەحنولوگيالار مۋزەيىن اشۋدى, «دالا فولكلورىنىڭ انتولوگياسىن» جاساۋدى, قازاقستاننىڭ وركەنيەت تاريحىنىڭ ۇزدىكسىز دامۋىن كورسەتەتىن دەرەكتى-قويىلىمدىق فيلمدەردىڭ, تەلەۆيزيالىق سەريالدار مەن تولىقمەتراجدى كوركەم كارتينالاردىڭ ارنايى تسيكلىن وندىرىسكە ەنگىزۋدى تەز ارادا قولعا الۋدى جۇكتەيدى.
ەلباسى ماقالاسىنداعى بۇل باعىتتار مەن باستامالاردى قولداپ, جۇزەگە اسىرۋ بۇكىل قازاقستاندىقتاردىڭ مىندەتى.
پاتيگۇل ماحساتوۆا,
قازاقستان جازۋشىلار وداعى جانىنداعى ۇيعىر ادەبيەتى كەڭەسىنىڭ ءتورايىمى
