بارىمىزگە بەلگىلى ەكى جىل بۇرىن ۇلىبريتانيا ەو-دان شىعاتىنىن مالىمدەدى. بىراق بۇگىنگە دەيىن جاعداي ءالى دە تۇسىنىكسىز. جاعدايدىڭ شيەلەنىسۋىنە ءتورت سەبەپ بار. ولار:
- ەكى جاقتىڭ كەلىسىمگە كەلە الماۋى. ۇلىبريتانيا پارلامەنتىندە وتكەن داۋىس بەرۋ ناتيجەسىندە دەپۋتاتتاردىڭ 52%-ى كەلىسىپ, 48%-ى قارسىلىعىن بىلدىرگەن-ءدى. بىراق داۋىس بەرۋ كەزىندە ەشكىم «برەكسيت» ماسەلەسىنىڭ قالاي بولارىن تۇسىنبەگەن دە ەدى.
ەۋرووداق پەن ۇلىبريتانيا كەلىسىمگە كەلدى. ەندىگى كەزەك ۇلىبريتانيا پارلامەنتىنىڭ كەلىسىمىندە. تەرەزا مەي كەشەگى جەڭىلىسىنەن كەيىن ءۇش كۇن ىشىندە «ب» جوسپارىن ۇسىنۋعا مىندەتتى.
- «جەڭىل» الدە «قاتاڭ» برەكسيت؟ بريتانيا مەن ەو دوستىعى ساقتالىپ قالا ما؟
قاتتى برەكسيت جاعدايىندا ەو-مەن بايلانىستى ۇزۋگە تۋرا كەلسە, جەڭىل برەكسيت جاعدايىندا مەملەكەت ەو-مەن دوستىعىن ساقتاپ قالادى, الايدا ولاردىڭ ەرەجەلەرى مەن زاڭدارىنا باعىنۋعا مىندەتتى بولادى.
- يمميگراتسيا. پرەمەر-مينيستر «برەكسيتتەن» كەيىن ۇلىبريتانياعا كەلە الاتىن ەو ازاماتتارىنىڭ سانىن قىسقارتقىسى كەلەدى. بۇل ەۋروپاعا كوشىپ جاتقان بريتاندىقتارعا دا اسەرىن تيگىزۋى مۇمكىن.
- سولتۇستىك يرلانديا ماسەلەسى. يرلانديا مەن سولتۇستىك يرلانديا ەكى مەملەكەتتىڭ جەرىندە ورنالاسقان. دەگەنمەن ارالارىندا ەشقانداي شەكارا جوق. ەگەر بىرىككەن كورولدىك شەكارا وداعىنان كەتسە, مەملەكەتتەر اراسىنداعى جۇك ماشينالارىن تەكسەرەتىن شەكارا بەلگىلەۋ كەرەك بولادى. بۇل – برەكسيتتى تىعىرىققا تىرەگەن ماسەلە. شەكارانى قايتا تۇرعىزۋ سولتۇستىك يرلانديادا ورىن العان بۇرىنعى زورلىق پەن ۋشىعۋعا الىپ كەلەدى دەسەدى.
نەگىزى, ەكى جاق تا شەكارا ماسەلەسىن قالامايدى. بىراق بۇدان قۇتقارار امال بار ما؟ سوڭعى كەلىسسوزدە ۇلىبريتانيا ەو-دان شىققان كەزدەگى «وتپەلى كەزەڭ» ماسەلەسى قاراستىرىلدى. شەكارا ماسەلەسى شەشىلمەيىنشە, ۇلىبريتانيا ەۋرووداق زاڭدارىنا باعىنىشتى بولا بەرەدى. بۇل ەو-مەن كەلىسىمگە قارسى تاراپتى الاڭداتىپ جاتىر. «وتپەلى كەزەڭ» مەرىزىمىنە دەيىن شەكارا ماسەلەسى شەشىلمەسە, «قوسىمشا جوسپارعا» جۇگىنۋدەن باسقا امال قالمايدى. بۇل ەكى جاق رايىنان قايتپايىنشا, سولتۇستىك يرلانديا شەكارا وداعىنىڭ قۇرامىندا قالادى دەگەن ءسوز.
ەو-دان شىعۋ 2019 جىلدىڭ 29 ناۋرىزىنا ساعات 23:00-گە (لوندون بويىنشا) بەلگىلەنگەن. شەشىم قابىلداۋ ءۇشىن ساناۋلى كۇندەر قالدى.