بۇل ءبىر كەرەمەت ويىن بولدى. باسەكەنىڭ 29 سەكۋندىندا قحل-دىڭ ەڭ بويشاڭ ويىنشىسى ۆيكتور سۆەدبەرگ (بويى 204 سانتيمەتر) «سپارتاكتىڭ» قاقپاسىن ءدال كوزدەپ, جەرگىلىكتى جانكۇيەرلەردى ءبىر جەلپىندىرىپ تاستاسا, باس-اياعى جەتى-سەگىز مينۋت ارالىعىندا استانالىقتار تاعى ەكى مارتە مەرگەندىك تانىتتى. بۇل گولداردىڭ اۆتورلارى – مەتت فرەتتين مەن اندرە پەتەرسسون. الايدا بۇل جاعداي قوناقتاردىڭ ساعىن سىندىرا العان جوق. ۇزىلىسكە دەيىن ولار ەكى شايبا سوعىپ, ەسەپ ايىرماشىلىعىن قىسقارتتى. ەكىنشى تايمدا دا شيەلەنىستى تارتىس ءوز جالعاسىن تاپتى. بىراق بۇل جولى باسىمدىق «سپارتاك» جاعىندا بولدى. قارسىلاستار كومانداسى سوققان ءۇش شايباعا ايدىن يەلەرى ءبىر عانا گولمەن جاۋاپ قايتاردى. ءۇشىنشى كەزەڭدە قوس كوماندانىڭ الما-كەزەك شابۋىلى ەش ناتيجە بەرگەن جوق. قورىتىندى ەسەپ – 4:5.
قازىرگى كەزدە «بارىس» تۇراقتى بىرىنشىلىكتىڭ جارىس كەستەسىندە 8 ورىندا كەلەدى. جەرلەستەرىمىز 48 كەزدەسۋ وتكىزىپ, 67 ۇپايدى ولجالاۋدا. ەندى ءوزىنىڭ كەلەسى باسەكەسىن استانالىقتار ءوز ايدىنىندا وتكىزەدى. بۇگىن ءبىزدىڭ جىگىتتەر ۋفانىڭ «سالاۆات يۋلاەۆىنا» قارسى وينايدى.
دايىنداعان عالىم سۇلەيمەن,
«ەگەمەن قازاقستان»
