اۆتوبۋستىڭ ۇستىندە جاس ايەل بەتىن جۋعان كوز جاسىن سۇرتۋمەن بولدى. قولىنداعى تەلەفوننىڭ ۋاتسابىنا تانىسى « گەراسيموۆ كەنەتتەن قايتىس بولدى» دەپ جازعان ەكەن. «دارىگەر گەراسيموۆ پا؟» - دەپ انىقتايدى ول.
« ءيا, دميتري ۆلاديميروۆيچ. اسىل ادام ەدى عوي» دەپ جازادى تانىسى. سىمباتتىڭ قايتىپ جازۋعا شاماسى كەلمەي, كوز جاسىنا ەرىك بەرگەنى سول ەكەن.
– قىزىمنىڭ نىسانالى تۋعان اياعىن جوندەپ, ەمدەپ بەرگەن كىسى ەدى. اۋرۋحانادا جاتقاندا پالاتاداعى ءار بالانىڭ رۋحاني اكەسىندەي, اتاسىنداي بولدى. بىلىكتى, جوعارى ساناتتى دارىگەر ەكەنى ءوز الدىنا, زيالىلىعى, قاراپايىمدىلىعى, مەيىرىمدىلىگى قانداي ەدى! بارلىق اتا-انامەن سويلەسۋگە ۋاقىت تاباتىن, الدىنا كەلگەن ادامعا رياسىز قۇرمەتپەن قارايتىن. مەن اۋرۋحانادا جاتقان از ۋاقىتتا وسى ءبىر مەيىرىمدى ادامدى ءوزىمنىڭ تۋعان اعامداي, باۋىرىمداي كورىپ كەتتىم. جانىمدا جاتقان جاس انالاردىڭ بارلىعى بالامىز ءتاۋىر بولعانعا قۋانىپ, ول كىسىمەن قيماي قوشتاسقان ەدىك, – دەيدى ول جىلاپ تۇرىپ.
قىرىق التى عانا جاس جاساعان دميتري ءۆلاديميروۆيچتىڭ قازاسى قوستانايلىقتارعا عانا ەمەس, ودان تىس جەرلەردەگى ونى بىلەتىن جاندارعا اۋىر تيگەنى ءمالىم. سەبەبى جوعارى ساناتتى دارىگەر, بالالار ورتوپەدياسىنىڭ بىلگىرى دميتري گەراسيموۆكە ادامدار ناۋقاس بالاسىن جەتەكتەپ سوڭعى ءۇمىتىن ارتىپ, وبلىس توڭىرەگىن بىلاي قويعاندا, قازاقستاننىڭ وزگە وڭىرلەرىنەن, ءتىپتى رەسەيدەن, ودان دا ءارى ەلدەردەن كەلەتىن. ول كوز الدىندا جازىلىپ, ويناپ كەتكەن ءار بالانى قۋانىش كوردى. وبلىس باسشىلىعى مەن جۇرتشىلىق وكىلدەرى بەرگەن قازانامادا: «ول تابيعاتىندا ناعىز بالالار دارىگەرى ەدى, ونى ءسابيدىڭ ءوزى سەزىنگەندەي بولاتىن» دەپ جازدى.
جاقسىنىڭ جاقسىلىعى ەل گازەتى «ەگەمەننىڭ» دە نازارىنان تىس قالماعان ەدى. 2017 جىلى شىلدەدە «ەگەمەن قازاقستاندا» جاريالاعان ماقالامىزدا: ء«بىز تىلدەسۋگە كەلگەن كۇنى دميتري ۆلاديميروۆيچ سەگىز وپەراتسيا جاسادى. قىس ايلارىندا بالانىڭ جاراقاتتانۋى سيرەكسىگەندەي بولعانىمەن, جازعى كانيكۋل كۇندەرىندە كۇيىپ قالعان, بيىكتەن قۇلاعان, يت قاپقان سەكىلدى بالالاردىڭ جاراقاتى تولاستامايتىنى بار. ونىڭ ۇستىنە ىشتەن كەمىس تۋعان بالالارعا جوسپارمەن جاسالاتىن وپەراتسيالار قانشاما. ونىڭ اراسىندا كابينەتىنىڭ الدىندا بالاسىن جەتەكتەگەن اتا-انالار كەزەگى تاعى بار.
...سۇيەكتى بالانىڭ بۋىنى قاتپاي تۇرىپ, تۇزەپ جىبەرگەنگە نە جەتسىن. ول وسى ماسەلە بويىنشا «ۆەستنيك حيرۋرگي كازاحستانا» جۋرنالىنا بىرنەشە ماقالالار جاريالادى. 2012 جىلى بىرنەشە ماقالالار جەلىسى قازاقستان تراۆماتولوگتارى–ورتوپەدتەرى سەزىنە قاتىسۋشىلاردىڭ ۇزدىك تاجىريبەلەرى قاتارىندا جارىق كوردى. 2010 جىلى رەسەيلىك عالىم, مەديتسينا عىدىمدارىنىڭ كانديداتى, جاراتىلىستانۋ اكادەميگى ن.ن.سمەلىشەۆپەن بىرلەسىپ, «رۋكوۆودستۆو پو چرەكوستنومۋ وستەوسينتەزۋ» اتتى كىتاپ شىعاردى. بۇل قازىر رەسەيدە دە, قازاقستاندا دا ورتوپەدتەر مەن حيرۋرگتار ستولىنىڭ ۇستىندە جاتاتىن ادىستەمەلىك قۇرال بولىپ سانالادى. كىتاپتى مىڭ دانا ەتىپ شىعارىپ, تەگىن تاراتتى» دەپ جازىپپىن.
دارىگەردىڭ جانازاسىنا جينالعان جۇرتتان جەر قايىسقانداي ەدى. جاقسىنى قيماعان جۇرەكتەر شىمىرلايدى. «جاقسى ءبىر ولمەس بولسايشى!..» دەگەن وسى ەكەن.
ءنازيرا جارىمبەت,
«ەگەمەن قازاقستان»
قوستاناي
