ۆەدومستۆوارالىق ساراپتاما توبىنىڭ مۇشەلەرى, باق وكىلدەرى, قىزىلوردا وبلىسى قوعامدىق دەنساۋلىق ساقتاۋ دەپارتامەنتى, قىزىلوردا وبلىسىنىڭ كاسىپكەرلەر پالاتاسى, «نۇر وتان» پارتياسى قىزىلوردا وبلىستىق فيليالى جانىنداعى پارتيالىق باقىلاۋ كوميسسياسىنىڭ توراعاسى, اتا-انالار كوميتەتى, ۇەۇ توراعاسى, وبلىستىق, قالالىق ءبىلىم ءبولىمىنىڭ ماماندارى, وبلىستىق پارتيا فيليالىنىڭ ۇيىمداستىرۋ-باقىلاۋ ءبولىمىنىڭ كەڭەسشىلەرى قاتىسقان ءىس-شارادا كوپتەگەن كەمشىلىكتىڭ بەتى اشىلدى.
مەكتەپتەگى تاماقتانۋ ساپاسىن كۇن سايىن باقىلاۋعا جانە ولقىلىقتاردى انىقتاپ وتىرۋعا مىندەتتى مەكتەپتىڭ ساراپشىلىق كوميسسياسىنىڭ ەسەپتىك قۇجاتتاماسى مەن بەلسەندىلىگى تەكسەرىلدى. قىزىق بولعاندا, كوپتەگەن مەكتەپتە ولار جۇمىس ىستەمەيدى ەكەن. ەسكەرتۋى بار بىردە-ءبىر حاتتاما نەمەسە ولقىلىقتاردى جويۋ بويىنشا بىردە-ءبىر اكت انىقتالماعان.
پارتيالىق ۆەدومستۆوارالىق ساراپتامالىق توپ مەكتەپ اكىمشىلىگىنىڭ كەزەكشىلىك كەستەسىنىڭ بولۋىنا ۆيزۋالدى تەكسەرىس جۇرگىزدى, وقۋشىلاردىڭ تاماقتانۋ ءتارتىبىن قارادى.
مەكتەپتەردەگى بالالاردىڭ تاماقتانۋ ساپاسى جايلى قالاي ايتۋعا بولادى, ەگەر كوپتەگەن مەكتەپتەگى اسحانالاردا جوسپارلى ءمازىر تالاپقا ساي كەلمەيتىن بولسا. تاماق قۇنارسىز. تاعامداردى ساقتاۋدا تالاپ ساقتالا بەرمەيدى. ىدىس-اياقتىڭ ءوزىن تازا ۇستاۋ جاعىنان كەمشىلىكتەر بار. رەيد بارىسىندا وسىنداي كەلەڭسىزدىكتەر توپ مۇشەلەرىنىڭ الدىنان شىقتى.
ارنايى مونيتورينگتىك توپ جەتەكشىسى جاندوس تۇرماعامبەتوۆ ءبىر كۇندىك تاماق مولشەرى ءبىر وقۋشىعا 220 تەڭگە بولاتىنىن اقىلعا قونىمسىز دەپ سانايدى. ويتكەنى, مۇنداي از اقشاعا قۇنارلى تاعام ءمازىرىن جاساۋ مۇمكىن ەمەس. سوندىقتان, انىقتالعان كەمشىلىكتەر بويىنشا پارتيا فيليالىنا ۇسىنىستار بەرمەك.
- ءار بالاعا اس مازىرىندەگى بەلگىلەنگەن ناقتى ءبىر تاعامنىڭ بۇگىنگە مولشەرى 223 تەڭگە دەپ قالالىق ءبىلىم ءبولىمى بەكىتىپ وتىر. بەكىتىلگەن ستاندارتقا سايكەس بالاعا ءتيىستى قاجەتتى بارلىق دارۋمەندەرمەن قامتاماسىز ەتىلۋ كەرەك. وسى ماسەلەگە اسا ءمان بەرىلمەگەندىكتەن ءبىراز بالاعا ءتيىستى تاماق دۇرىس جەتكىزىلمەي وتىر دەپ ەسەپتەيمىز, - دەيدى «نۇر وتان» پارتياسى قو فيليالى جانىنداعى پارتيالىق باقىلاۋ كوميسسياسىنىڭ ءتورايىمى ايدا ابيبۋللاەۆا.
اتا-انالار دا ءوز پايىمداۋلارىن ايتقان. ولار مەكتەپ اسحانالارىنا تاعام دايىنداۋدا مەملەكەتتىك ساتىپ الۋ ساتىسىندا كەمشىلىكتەر بارىن سىنعا العان. ارينە, تەندەردە ەڭ تومەن باعا قويعان كاسىپكەر جەڭىسكە جەتەدى. نارىقتاعى باعادان تومەن قويىپ, جەڭىسكە جەتكەن كاسىپكەر وزىنە پايدا قالۋ ءۇشىن ءار ءتۇرلى امالدارعا بارادى. قۇنارسىز جاسىق ەت, ماي ورنىنا مارگارين, بوتقالاردىڭ دا ساپاسىزى, مەرزىمى وتىڭكىرەگەن تاعامدار مەكتەپ اسحاناسىنا بارادى.
سول كاسىپكەرلەر تەندەردى وتكىزگەن ورىندار مەن مەكتەپ باسشىلارىنىڭ دا جىلى-جۇمساقتان دامەتەتىنىن ايتىپ قالادى. «ۇستالماعان ۇرى ەمەس» دەگەنمەن, مۇنداي فاكتىلەردىڭ ورىن الىپ جاتقاندىعى راس. وتكەندە ءبىر بلوگەر مەكتەپ اسحاناسىنان تاعامدار ۇرلاناتىنىن ايتىپ, جاشىك-جاشىك تاماق ونىمدەرىن قوسالقى ەسىك ارقىلى الىپ بارا جاتقان ادامدى ۇستاپ, الەۋمەتتىك جەلىگە سالدى.
بيۋدجەتتە اعىل-تەگىل اقتارىلىپ جاتقان قارجى جوق. جوققا جۇيرىك جەتپەيدى. سولاي بولا تۇرا اتا-انالار ماردىمسىز دەگەن قارجىنىڭ وزىنە بالالاردىڭ اعزاسىنا پايداسى بار دارۋمەندى تاعامداردى دايىنداۋعا ابدەن بولادى.
كوپ مەكتەپتە براكەراجدىق كوميسسياعا سول مەكتەپتىڭ قىزمەتكەرلەرىن ەنگىزىپ قوياتىن فاكتىلەر بار.
بۇل, ارينە, دۇرىس ەمەس. اتا-انالاردان بولەك, اقپارات سالاسىنىڭ مۇشەلەرى ەنسە, «سىردىڭ سۋى سيراعىنان كەلمەيتىندەر» اياعىن اڭداپ باسار ەدى.
كەمشىلىكتەر بىرەر كۇندىك رەيدپەن تۇزەلىپ كەتپەيدى. «بالا - باۋىر ەتى» دەيدى حالقىمىز. ولاردىڭ بولاشاعى جارقىن بولۋى ءۇشىن ەڭ الدىمەن دەنساۋلىعى مىقتى بولۋى كەرەك.
«نۇر وتان» پارتياسىنىڭ بۇل جوباسى وقۋشىلار ءۇشىن دەڭساۋلىقتىڭ كەپىلى بولىپ تۇر.
باقتيار تايجان,
«ەگەمەن قازاقستان»
قىزىلوردا وبلىسى
