اتالعان زاڭ جوباسىندا پەداگوگ قىزمەتىمەن بايلانىستى پەداگوگتاردىڭ قۇقىقتىق جاعدايىن ساپالى جاقسارتۋعا ىقپال ەتىپ, ولاردى الەۋمەتتىك قورعاۋعا كەپىلدىك بەرەتىن قۇقىقتىق, الەۋمەتتىك-ەكونوميكالىق قارىم-قاتىناستى رەتتەۋ كوزدەلگەن. ءبىلىم جانە عىلىم ۆيتسە-ءمينيسترى ە.سۋحانبەرديەۆانىڭ ايتۋىنشا, زاڭ جوباسىن ازىرلەۋ بارىسىندا قىتاي, فينليانديا, قىرعىزستان, وزبەكستان جانە باسقا دا شەكارالاس مەملەكەتتەردىڭ ۇقساس زاڭدارى قاراستىرىلعان.
اتاپ وتكەن ءجون, زاڭ جوباسى 2018 جىلعى جەلتوقسان ايىندا الماتى قالاسىنىڭ پەداگوگتار قاۋىمداستىعىمەن بىرگە تالقىلانعان بولاتىن. ال 2018 جىلعى 14 جەلتوقساندا ادىلەت مينيسترلىگىندە زاڭ قىزمەتى ماسەلەلەرى بويىنشا وتكەن ۆەدومستۆوارالىق كوميسسيانىڭ وتىرىسىندا «پەداگوگ مارتەبەسى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەداگوگ مارتەبەسى, مۇعالىم مەن وقۋشىعا جۇكتەمەنى تومەندەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردىڭ تۇجىرىمدامالارى بارلىق كوميسسيا مۇشەلەرىنەن ءبىراۋىزدان قولداۋ تاپتى. سونداي-اق بۇقارالىق اقپارات قۇرالدارىندا, الەۋمەتتىك جەلىلەردە جانە پەداگوگيكالىق ۇجىمداردا زاڭ جوباسى بەلسەندى تالقىلانىپ, 8 مىڭنان استام ۇسىنىس كەلىپ تۇسكەن. ءبىز ولاردىڭ بارلىعىن نازارعا الا وتىرىپ ۇكىمەتكە, ءماجىلىس پەن سەناتتىڭ قاراۋىنا ۇسىنامىز. سودان كەيىن ماۋسىم ايىندا ەلباسى قول قويادى» دەدى ۆيتسە-مينيستر.
سونداي-اق زاڭ جوباسىندا مۇعالىمدەرگە جىلىنا ساۋىقتىرۋعا قازىرگىدەي ءبىر ەمەس, ەكى جالاقى كولەمىندە كومەك بەرۋ قارالعان. داپتەر تەكسەرۋ مەن سىنىپ جەتەكشىلىگىنە 15 مىڭ تەڭگەدەي قوسىلادى. جاس مۇعالىمدەرگە تالىمگەرلىك جاساعاندار مەن عىلىمي اتاعى بار ۇستازدارعا دا قوسىمشا اقشا تولەنەدى. بۇل جاڭاشىلدىقتاردىڭ كوپشىلىگىن پەداگوگتاردىڭ كاسىپوداعى ۇسىنعان.
«بالاباقشادا جۇمىس ىستەيتىن ادىسكەرلەرىمىز 42 كۇن دەمالادى. ال ەندى مەكتەپتە, جوعارى وقۋ ورىندارىندا, كوللەدجدەردە جۇمىس ىستەيتىن ۇستازداردىڭ بارىنە بىردەي 56 كۇن ەڭبەك دەمالىسى بەرىلەدى دەگەن سيپاتتاعى نورمانى زاڭ جوباسىنا قوستىق» دەدى ءبىلىم جانە عىلىم قىزمەتكەرلەرى سالالىق كاسىپوداعى توراعاسىنىڭ ورىنباسارى ايگۇل مۇقاشەۆا.
زاڭ جوباسى 6-تاراۋ جانە 21-باپتان تۇرادى. «پەداگوگ مارتەبەسى تۋرالى» زاڭ جوباسىندا پەداگوگ مارتەبەسى جانە ونىڭ پەداگوگيكالىق قىزمەتى, پەداگوگ ادەبى, پەداگوگتىڭ ار-نامىسى مەن قادىر-قاسيەتىن قورعاۋ, پەداگوگكە كاسىپتىك قىزمەتكە رۇقسات بەرۋ ماسەلەلەرى قاراستىرىلعان.
راۋان قايدار,
«ەگەمەن قازاقستان»
